Ana zaben sabon shugaban kasar Sabiya
April 2, 2017An fara kada kuri'a domin zaben sabon shugaban kasar Sabiya a wannan rana ta Lahadi, zaben da ake ganin Firaminista Aleksandar Vucic mai karfin fada aji zai kai labari da samun kashi hamshin cikin dari na kuri'un da aka kada tun a zagayen farko.Vucic mai shekaru 47 shi ne dan takarar da kuri'ar jin ra'ayin jama'a a kasar ta nunar da cewa shi ke gaba, ya dai taka rawa wajen ganin tattalin arzikin kasar ya farfado tun bayan da aka zabe shi firaminista a 2014. Sai dai a bisa kiyasin dan kasar Sabiya tsaka-tsaki na iya samun Euro 330 ne kawai a wata, yayin da ake da kashi 15 cikin dari na marasa aikin yi. Wasu dai na kallon dantakarar a matsayin dan kama karya, ga shi kuma 'yan adawa na Democrats Sasa Jankovic da Vuk Jeremic kansu ba a hade ba.
Ana dai kallon Vucic a matsayin wanda ya mamaye kafafan yada labarai abin da ake ganin ya taimaka wajen haskakawarsa yayin da sauran 'yan takara basu da dama irin tasa.