An alƙawarta wa Siriya dala miliyan dubu 2.4 | Labarai | DW | 15.01.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

An alƙawarta wa Siriya dala miliyan dubu 2.4

An nunar da haka ne a ƙarshen taron ƙasa da ƙasa da aka gudanar a Kuwaiti da nufin tara kuɗin taimaka wa Siryia wadda yaƙin basasa ya ɗaiɗaita.

Ƙasashen yamma da na Larabawan yankin Gulf sun yi alƙawarin ba da sama da dalar Amirka miliyan dubu 2.4 a matsayin agaji ga ƙasar Siriya. Ƙasashen sun ɗauki wannan alkawari ne a taron ƙasa da ƙasa da aka gudanar a Kuwaiti a wannan Laraba da nufin tara kuɗin taimaka wa Siryia wadda yaƙin basasa ya ɗaiɗaita. Majalisar Ɗinkin Duniya wadda ta shiyar taron ta yi fatan samun dalar Amirka miliyan dubu 6.5 a shekarar 2014, wanda aka ƙaddamar a watan da ya gabata, wanda kuma shi ne wani tallafi mafi girma a tarihin Majalisar ta Ɗinkin Duniya. Irin wannan taro da aka gudanar a bara kashi 70 cikin 100 na kuɗaɗen da aka alƙawarta ya shiga batul-malin Majalisar Ɗinkin Duniya. Gamaiyar ta ƙasa da ƙasa ta yi kiyasin cewar rikicin ya mayar da aikin raya ƙasa a Siriya baya da kimanin shekaru 35, inda yanzu haka rabin al'ummar ƙasar ke rayuwa cikin matsanancin talauci.

Mawallafi: Mohammad Nasiru Awal
Edita: Abdourahamane Hassane