Abba Kabir Yusuf ya lashe zaben Gwamnan Kano
March 19, 2023
A jihar Kano cibiyar kasuwancin arewacin Najeriya dubban magoya bayan jam'iyyar NNPP ta tsohon gwamna Sanata Rabiu Musa Kwankwaso sun bazama tituna suna shagulgulan murnar lashe zaben gwamnan jihar. Jama'a da dama sun baiyana nasarar ta NNPP da cewa nasara ce ta al'ummar Kano baki daya sun kuma tunatar da shi da ya cika alkawuran da ya yi wa al’ummar jihar.
A jihar Bauchi, Sanata Bala Muhammad kuma dan takarar gwamnan Jihar Bauchi a karkashin lemar PDP, ya samu nasarar sake zama gwamnan Jihar bayan zaben da aka gudanar a ranar Asabar din da ta gabata.
Da ya ke sanar da sakamakon zaben, Farfesa Abdulkarim Sabo Mohammed, mukaddashin shugaban jami’ar gwamnatin tarayya da ke Dutse a jihar Jigawa, ya shaida cewar Bala Muhammad ya sami nasarar sake zama gwamnan Jihar Bauchi ne da kuri’u 525,280 da ya kayar da babban abokin hamaiyarsa na jam’iyyar APC, Air Marshal Sadique Baba Abubakar da ya sami kuri’u 432,272
A jihar Sokoto hukumar zabe ta bayyana Jam’iyyar APC mai adawa a jihar a matsayin wadda ta lashe zaben gwamna, sai dai Jama’iyyar PDP mai mulki ta yi watsi da sakamakon ta na cewa zasu yi nazari kan sakamakon zabe. A jihar Kebbi kuwa hukumar zaben ta kasa INEC ta ce zaben gwamnan bai kammala ba.
Hukumar zabe ta kasa a jihar Filato ta sanar da dan takarar jam'iyyar PDP Caleb Mufwan a matsayin wanda ya lashe zaben gwamnan jihar bayan ya sami kuriu 525, 209 inda ya kada abokin takarar sa Nantawe Yilwada na jam'iyyar APC wanda ya sami kuri'u 481, 370
Daga jihar Nasarawa Engineer Abdullahi Sule na jam'iyyar APC yayi nasara inda ya kada abokin takararsa na jam'iyyar PDP.
A jihar Benue kuwa, jam'iyyar APC ce ta lashe zabeni, inda Rev. Father Hyacinth Alia, ya kada abokin takarar sa Titus Uba na jami'yyar PDP da kuriu 473, 973, yayin da Titus Uba na jam'iyyar PDP ya zami kuri'u 223, 913.
A kudu maso kudu da kudu maso gabashin Najeriya sakamakon zabe ya fara fita a yankunan Sai dai jahohin Rivers da na yankin Igbo kamar Enugu,da Abia ana ci gaba da tattara alkaluman sakamakon zaben da kuma fuskantar kalubalen wakilan Jam'iyyu a dakin zauren tattara sakamakon.