در حمله افراد مسلح بر پوسته مرزی تاجیکستان ۱۷ تن کشته شدند

مقام‌های تاجیکستان روز چهارشنبه گفتند که در این حمله مسلحانه ۱۵ فرد مهاجم، یک سرباز و یک پولیس کشته شده اند.

وزارت داخله تاجیکستان اعلام کرده است که چهار تن از مهاجمان را بازداشت کرده است، اما محافظان مرزی از بازداشت پنج فرد مهاجم خبر داده اند.

به گفته وزارت داخله تاجیکستان، حدود ۲۰ فرد مسلح که ماسک پوشیده بودند، در ساعات اول صبح چهارشنبه بر این پوسته در منطقه مرزی با ازبیکستان حمله کردند. این پوسته مرزی در ۵۰ کیلومتری شهر دوشنبه، پایتخت این کشور، موقعیت دارد. وزارت داخله تاجیکستان تصاویری از اجساد و موترهای به آتش کشیده شده را نشر کرده است.

امام علی رحمان، رئیس جمهور طولانی مدت تاجیکستان فعلاَ در یک سفر نادر در اروپا به سر می‌برد. او قرار است در روزهای آینده با امانوئل ماکرون رئیس جمهور فرانسه ملاقات کند و بعد از آن به جمهوری چک سفر خواهد داشت.

تاجیکستان که با افغانستان مرز مشترک دارد، فقیرترین جمهوری پیشین اتحاد جماهیر شوروی است. امام علی رحمان از سال ۱۹۹۲ در این کشور حکمروایی می‌کند.

af/si (AFP, dpa, Reuters)