«تاجیکستان به فکر ایجاد اردوگاه برای مهاجران افغان است»

منابع حکومتی تاجیکستان روز دوشنبه به خبرگزاری رویترز گفته اند که حکومت این کشور ایجاد اردوگاه ها برای مهاجران احتمالی افغان را بررسی می کنند. در روزهای اخیر صدها سرباز افغان به تاجیکستان پناه برده اند.

پس از خروج نیروهای ناتو از افغانستان، طالبان در روزهای اخیر چندین ولسوالی را در ولایت های شمالی افغانستان که هم مرز با تاجیکستان می‌باشند، تصرف کرده اند.

یک مقام حکومتی تاجیکستان به شرط فاش نشدن هویتش گفت: «تاجیکستان موضوع اسکان مهاجران افغان را در خاک خود زیر نظر دارد.» وی اضافه کرد: «مسئله ساختن اردوگاه های مهاجران با همکاران نیز مورد بحث قرار گرفته است.» اما این مقام از کشورها و یا سازمان هایی که در این زمینه همکاری می کنند، نامی نبرد.

روز دوشنبه حکومت افغانستان اعلام کرد که محمد اشرف غنی رئیس جمهور این کشور با امام علی حمان، رئیس جمهور تاجیکستان صحبت تلفونی کرده و گفته "حکومت افغانستان در قبال شهروندانش که به خاک تاجیکستان پناه برده اند، مسئول می باشد".

یک مقام امنیتی تاجیکستان نیز مطرح شدن طرح ایجاد اردوگاه های مهاجران در آجندای حکومتی را تایید کرده است.

براساس یک گزارش، واشنگتن از تاجیکستان خواسته است که به افغان هایی که با نیروهای امریکایی کار کرده اند و در تهدید طالبان قرار دارند، به صورت موقتی اسکان بدهد. وزارت خارجه تاجیکستان از اظهارنظر در مورد این که آیا به این درخواست پاسخ مثبت خواهد داد، خودداری کرده است.

روز دوشنبه حکومت تاجیکستان اعلام کرد که بیش از یک هزار سرباز افغان به خاک تاجیکستان وارد شده و به این کشور پناه برده اند. این موضوع جدیت وضع بحرانی در شمال افغانستان را بیان می کند؛ جایی که طالبان پس از آغاز خروج نیروهای امریکایی و ناتو حملات تهاجمی خود را بر آن متمرکز کرده اند.

این گزارش ابتدا در اینفومایگرانتس نشر شده است.

rsh/af (Reuters)