Novi njemački stav prema Rijadu? | Politika | DW | 22.10.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Reklama

Politika

Novi njemački stav prema Rijadu?

Njemačka Vlada se posljednjih mjeseci trudila da ponovo uspostavi dobre odnose sa Saudijskom Arabijom, pa je dozvolila velikodušni izvoz njemačkog oružja u tu zemlju. Sada se ta politika preispituje.

Njemački ministar spoljnih poslova Hajko Mas nagovijestio je preokret. Sve dok traje istraga u slučaju ubistva Džamala Kašogija ne postoji osnova za pozitivan stav o izvozu oružja u Saudijsku Arabiju.

Mas je to izjavio u glavnom dnevniku Prvog programa njemačke televizije još u subotu (20.10). Sada je njemačka šefica vlade Angela Merkel na led stavila kompletan izvoz oružja u Saudijsku Arabiju, rekavši da se on „neće desiti u stanju u kojem se trenutno nalazimo“. Ostale reakcije njemačka kancelarka želi da dogovori na međunarodnom planu.

Nedavno su odnosi bili popravljeni

Takve izjave njemačkih političara ukazuju na promjenu kursa Berlina. Njemačka kancelarka u septembru je odobrila izvoz protivartiljerijskih sistema u Saudijsku Arabiju i potrudila se da popravi odnos sa saudijskom kraljevskom kućom.

Taj odnos se ohladio kada je Masov prethodnik na mjestu šefa njemačke diplomatije, Zigmar Gabrijel, Rijadu prebacio „politički avanturizam“, jer su Saudijci na svojoj teritoriji zadržali libanskog premijera Rafika al Haririja. Saudijska Arabija je povukla ambasadora iz Berlina na konsultacije. Ambasador se vratio u Berlin tek početkom oktobra, kada je Kašogi već nestao.

Korektura korekture

Sada se izgleda korekcija kursa koriguje. Da li se Berlin ponovo distancira od Rijada? Tomas Rihter, stručnjak za zalivski region u hamburškom institutu GIGA, smatra da je u svakom slučaju evidentno „ozbiljno preispitivanje“ teze da je saudijski prestolonasljednik Mohamed bin Salman reformista, kako su ga do sada vidjeli. On dodaje da princ sada djeluje kao vladar koji se ne uzdržava od bilo kojeg vida represije.

Raskošni partneri: predsednička palata u Rijadu

Raskošni partneri: predsednička palata u Rijadu

„Zato se nadam da će se nametnuti realističan pogled na Saudijsku Arabiju i na aktuelni razvoj – u tom smislu realističan da se uvidi kako se i dalje radi o autoritarnoj monarhiji kojom upravlja nekolicina ljudi“.

Njemačka kancelarka mogla je da shvati mnogo ranije da je to tako. Prema pisanju magazina „Špigel" njemačka obavještajna služba BND je još decembra 2015. upozoravala na osobine prestolonasljednika: „Dosadašnje oprezno diplomatsko držanje starijih vodećih članova kraljevske kuće zamijenjeno je impulsivnom intervencionističkom politikom“.

Upozorenje BND

BND je upozoravao prije svega na spoljnopolitičke rizike koji se mogu pojaviti u vezi s novim prestolonasljednikom. Kralj Salman i njegov sin Mohamed žele da se profilišu kao „predvodnici arapskog sveta". Prema procjeni njemačke obavještajne analitike, oni pokušavaju da prošire manevarski prostor Saudijske Arabije „jakom vojnom komponentom i novim regionalnim alijansama".

Prema tom izvještaju Saudijska Arabija gubi povjerenje u dosadašnju zaštitu Sjedinjenih Američkih Država, pa Rijad teži preuzimanju uloge novog regionalnog hegemona. I to po cenu otvorenog rivalstva sa svojim regionalnim takmacem Iranom. To se najbolje vidi po ratu u Jemenu. Rijad nije oklijevao da preuzme „ogroman vojni, finansijski i politički rizik da se ne bi u regionu politička našao u zapećku“.

Izvoz oružja je „fabrika para"

Uprkos takvim upozorenjima, i sadašnja i prethodne njemačke vlade davale su dozvole za izvoz oružja u Saudijsku Arabiju. Samo u martu ove godine dato je zeleno svjetlo za izvoz u vrijednosti od 254 miliona evra. To se saznalo nakon što je stranka Zelenih postavila pitanje Vladi u Bundestagu.

Glavni urednik žurnala „Amnesti internešnal" Markus Bikel, 2017. objavio je knjigu „Profiteri terora". On tvrdi da je saudijski faktor umiješan u brojne regionalne krize i konflikte, pa je za izvoznike oružja to postala prava „štamparija novca". I to bez obzira na posljedice: „Višak u budžetu stečen u godinama visoke cijene nafte idu na štetu drugih društvenih oblasti u samoj Saudijskoj Arabiji, kao što su zdravstvo i obrazovanje".

Bikel navodi da se njemačke firme trude da sklope poslove i u civilnom i u vojnom sektoru. To je, prema Bikelu, problematično: „Zemlje Golfskog zaliva namjeravaju da se do 2030. oslobode zavisnosti od uvoza oružja. Ali oni se ne mogu odreći transfera tehnologije. Zato vojni i civilni angažman idu ruku pod ruku“.

Njemački stručnjak za saudijsku Arabiju Sebastijan Zons, koji radi za „Njemačko društvo za spoljnu politiku" (DGAP), ukazuje na protivrječnosti njemačke politike prema Saudijskoj Arabiji: „Sa jedne strane, političari u Njemačkoj, kao i u drugim zemljama, neumorno naglašavaju destabilizujuću ulogu Saudijske Arabije u bliskoistočnim regionalnim konfliktima. Sa druge strane, postaju pomagači saudijske strategije kada dozvoljavaju i tolerišu izvoz oružja u tu zemlju“. I Zons je napisao kritično intoniranu knjigu o saudijskoj Arabiji: „Izgrađeno na pijesku: Problematično savezništvo sa Saudijskom Arabijom“.

Tenk tipa Leopard

Njemačka obustavlja izvoz oružja u Saudijsku Arabiju

„Moramo hitno delovati"

Politika se može promijeniti. „Želimo da sve zemlje članice grupe G-7 pozovu na razgovor saudijske ambasadore, a najbolje bi bilo da se to uradi i u grupi zemalja G-20“, kaže političar njemačkih liberala (FDP) Ulrih Lehte, koji je član spoljnopolitičkog odbora Bundestaga: „Naravno da u regionu koji traži svoju stabilnost ne možemo započeti neki lom. Ali Saudijska Arabija je prevršila svaku mjeru. Moramo hitno da djelujemo".

Slično misli i spoljnopolitički portparol poslaničkog kluba demohrišćana Jirgen Hart, kada kaže da će Vlada u najmanju ruku preispitati dosadašnju politiku. U intervjuu za radio „Dojčlandfunk“ on precizira: „U svakom slučaju moramo iskoristiti naše ekonomske poluge na taj način da saudijska Vlada ostane na kursu regionalne stabilnosti. Smatram da je teren za tako nešto pripremljen tijesnim privrednim vezama koje sa Saudijskom Arabijom imaju evropa i Amerika". On doduše priznaje da u saudijskoj kraljevskoj kući „postoje donekle iracionalni elementi u ponašanju“ ali dodaje da se sa tim mora izaći na kraj. Prema njemu je još rano da se predlože konkretne mjere.

Osuda saudijskih vlastodržaca širom sveta

Prema svemu što se do sada saznalo, ubistvo novinara Džamala Kašogija je trebalo da pošalje unutrašnjopolitički signal potencijalnim kritičarima kraljevske kuće. Očito je to način njihovog zastrašivanja.

Međutim, nalogodavci su se preračunali. Vest o ubistvu obišla je svet, a saudijska vlast je na stubu srama. I to ne samo u Njemačkoj.

Čitajte nas i preko DW-aplikacije za Android

Preporuka redakcije