የሳማንታ ፓወር የኢትዮጵያ ጉብኝት

ዩናይትድ ስቴትስ ኢትዮጵያን እንደ ጠንካራ አጋር መመልከቷን እንደምትቀጥልና በሀገሪቱም ያለ አድልዎ ሰብዓዊ ድጋፎችን እንደምታደርግ የአሜሪካ ሰብዓዊ ተራድኦ ድርጅት (USAID) ኃላፊ ሳማንታ ፓወር ገለጹ። ኃላፊዋ በኢትዮጵያ ያደረጉትን የሁለት ቀናት የሥራ ጉብኝት ትናንት ሲያጠናቅቁ ማምሻውን ለጋዜጠኞች በሰጡት ማብራሪያ፤ የሀገራቸው ፍላጎት ከኢትዮጵያውያንና መንግሥታቸው ጋር በመሆን አሁን በአገሪቱ ግጭት ላስከተለው ሰብዓዊ ቀውስ እልባት መስጠት ነው ብለዋል። ጠቅላይ ሚኒስትር ዐቢይ አህመድን አግኝተው የመነጋገር ውጥናቸው ባይሳካም ከሰላም ሚኒስትሯ ጋር መወያየታቸውን ገልጸዋል። 

ሳማንታ ፓወር በዋና መዲና አዲስ አበባ አቅራቢያ የሚገኘውን የUSAID ሰብዓዊ ድጋፍ ቁሳቁስ መጋዘንም ጎብኝተዋል። በትግራይ ክልል ያለውን የሰብዓዊ ድጋፍ ፍላጎት ለማሳካት በሳምንት ከ500 እስከ 600 የርዳታ ቁሳቁስ የጫኑ ተሸከርካሪዎች መግባት አለባቸው ያሉት ኃላፊዋ የርዳታ ሠራተኞች ከዘለፋ ነጻ ሆነው እንዲሠሩ ጥበቃ እንዲደረግላቸው መነጋገራቸውንም አክለዋል። ከዚህም ሌላ የሰላም ሚኒስትር ሙፈሪያት ካሚልም በበኩላቸው ለጋዜጠኞች የተናገሩት የጠራ መረጃ እንዲይዙ ማብራሪያ እንደተደረገላቸውና በሰሜን ኢትዮጵያ የሚደረገው ሰብዓዊ ድጋፍ ሁለንተናዊ መሆን እንደሚገባው መስማማታቸውን ገልጸዋል። በአፋር 76 ሺህ እና በአማራ ክልል የትግራይ አዋሳኝ አከባቢዎች 150 ሺህ ዜጎች የመፈናቀላቸው መረጃ ደርሶናል ያሉት ሳማንታ ፓወር በበኩላቸው ያለ አድሎ ድጋፉን ለማድረስ ቁርጠኛ መሆናቸውንም አብራርተዋል።

ስዩም ጌቱ

ሸዋዬ ለገሠ

ነጋሽ መሐመድ