1. ወደ ይዘቱ ዝለል
  2. ወደ ዋናዉ ገፅ ዝለል
  3. ወደ ተጨማሪ የDW ድረ-ገፅ ዝለል
ሙዚቃ

መዝናኛ፦ የአባይ ዳር ሙዚቃ

እሑድ፣ ጥቅምት 16 2012

ወደ ጢስ አባይ ፏፏቴ የሚጓዙ አገር ጎብኝዎች በትዕይንቱ እና በድምጹ እየተደመሙ ተፈጥሮን ሲደንቁ የአካባቢው ወጣቶች ደግሞ በዋሽንትና በማሲንቆ ጨዋታ ያጅቧቸዋል።

https://p.dw.com/p/3S1b0
Äthiopien - Abay Falls
ምስል DW/A. Mekonnen

መዝናኛ፦ የአባይ ዳር ሙዚቃ

ጢስ ኣባይ ከባሕር ዳር ከተማ 30 ኪሎ ሜትር ርቃ የምትገኝ አነስተኛ የገጠር ከተማ ናት። ከተማዋ ከቅርብ ጊዜ ወዲህ  ወደ ባሕር ዳር ከተማ አስተዳደር ተጠቃልላለች። በዓለም ቅርስነት ተመዘገበው የጢስ አባይ ፏፏቴ የሚገኘውም በዚችው ከተማ አቅራቢያ ነው።  የፏፏቴው የውሀ መጠን ክረምቱን ተከትሎ በከፍተኛ ሁኔታ ይጨምራል። በመስከረምና ጥቅምት ወራት የፏፏቴው መጠን የጎላ ቅናሽ ባያሳይም የውሀው ጥራት ግን እየጨመረ ስለሚሄድ ለፏፏቴው ልዩ ትዕይንት ይፈጥርለታል።

አብዛኛውን ጊዜ በሰማይ የሚታየው ቀስተ ዳመና በፏፏቴው የታችኛው ክፍል ተሰርቶ ማየትም ለአባይ ፏፏቴ ሌለኛው ትዕይንቱ ነው፡፡

የአገር ውስጥ እና የውጭ ጎብኝዎች በብዛት ከሚጎበኙት የአማራ ክልል የተፈጥሮ መስህብ ቦታዎች በመጀመሪያ ረድፍ ከሚጠቀሱት ወስጥ አንዱም ነው። ፏፏቴው ከሚማርከው ትዕይንቱ ባሻገር ድምፁም ልዩ ቦታ ሚሰጠው ነው።

Äthiopien - Abay Falls
የጢስ አባይ ፏፏቴምስል DW/A. Mekonnen

ታዲያ ወደዚህ ፏፏቴ የሚጓዙ ጎብኝዎች በፏፏቴው ትዕይንትና ድምፅ እየተደመሙ ተፈጥሮን ሲደንቁ የአካባቢው ወጣቶች ደግሞ በባሕላዊ ዋሽንትና ማሲንቆ ጨዋታ ያጅቧቸዋል።

ከወጣቶች መካከል አበበ ዓለሙ አንዱ ሲሆን በዋሽንት ቱሪስቶችን ማዝናናት ከጀመረ 10 ኣመታትን አሳልፏል፡፡ እንደየ ወቅቱ ሁኔታ ከአገር ጎብኚዎች በቀን እስከ 100 ብር ድረስ ገቢ እንደሚያገኝ ወደ ቦታው ሄዶ ለነበረው የዶይቼ ቬለ ዘጋቢ ተናግሯል።

ማሲንቆ የሚጫወተው ገብረሕየወት ማረውም ሙያውን ከአባቱ አንደወረሰና በዚሁ ቱሪስት በማዝናናት ስራ ከ10 ኣመታት በላይ እንደቆየበት ተናግሯል።

አሁን በቱሪስት አስጎብኝነት ስራ ላይ የተሰማራው ውብሸት አሳዬ ቀደም ባሉት ዓመታት በዋሽንት ጨዋታ ቱሪስቶችን ያዝናና አንደነበርና  የ3 ዓመት የቱሪዝም ትምህርተ ስልጠና ወስዶ በማስጎብኘት ስራ ላይ መሰማራቱን ናገራል።

ፏፏቴውን ሲጎበኙ ካገኘኋቸው ቱሪስቶች መካከል ስፔናዊው ካርሎስ ፏፏቴውን ከ20 ጊዜ በላይ መጎብኘታቸውን ጠቅሰው አጠቃላይ በኢትዮጵያ ውስጥ ካሉ የተፈጥሮ መስህቦች ጢስ አባይ ፏፏቴ ምርጥና ድንቅ ነው በማለት አስተያየት ሰጥተዋል።

ዓለምነው መኮንን

ተስፋለም ወልደየስ