ፖል ካጋሜ የህብረቱን ሊቀመንበርነት ተረክበዋል | አፍሪቃ | DW | 28.01.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

አፍሪቃ

ፖል ካጋሜ የህብረቱን ሊቀመንበርነት ተረክበዋል

30ኛው የአፍሪቃ ህብረት የመሪዎች ጉባኤ ዛሬ የህብረቱ መቀመጫ በሆነችው አዲስ አበባ ተጀምሯል። የዘንድሮው ጉባኤ ሙስናን በመዋጋት ላይ አተኩሯል።

አውዲዮውን ያዳምጡ። 03:30

የአፍሪካ ህብረት የመሪዎች ጉባኤ

የአፍሪቃ ህብረት የመሪዎች ጉባኤው እንደተለመደው ጠዋት ሳይሆን በሰዓታት ዘግይቶ ከሰዓት ላይ ነው የጀመረው። የሩዋንዳው ፕሬዝዳንት ፖል ካጋሜ ላለፈው አንድ ዓመት የአፍሪካ ህብረት ሊቀመንበር ሆነው ካገለገሉት የጊኒ ፕሬዝዳንት አልፋ ኮንዴ ኃላፊነቱን በይፋ ተረክበዋል። ዛሬ እና ነገ በሚካሄደው ጉባኤ ዋና የመወያያ አጀንዳ ከሆነው ሙስናን መዋጋት በተጨማሪ በፕሬዝዳንት ካጋሜ የተዘጋጀው የአፍሪካ ህብረት ማሻሻያም እቅድም መነጋገሪያ ይሆናል ተብሏል። 

በአዲስ አበባው ጉባኤ ከዚህ ቀደም እንደተለመደው በአህጉሪቱ ያሉ የጸጥታ እና የሰላም ችግሮች ትኩረት እንደሚሰጣቸው በኢትዮጵያ ውጭ ጉዳይ መስሪያ ቤት ያሉ የዶይቼ ቬለ ምንጮች ጠቁመዋል። የአፍሪካ ህብረት ኮሚሽን ሊቀመንበር ሙሳ ፋኪም በመክፈቻ ጉባኤ ላይ ባሰሙት ንግግር በአህጉሪቱ ካሉ ግጭቶች የደቡብ ሱዳንን አንስተዋል፡፡ ፋኪ በደቡብ ሱዳን “ለሰላም እንቅፋት የሚሆኑት ላይ ማዕቀብ መጣያ ጊዜው እየመጣ ነው” ብለዋል፡፡ ሊቀመንበሩ በንግግራቸው በደቡብ ሱዳን ያሉ ተቀናቃኝ ኃይሎች የሚያደርጉትን “የማይታመን ጭካኔ” እና “ትርጉም የለሽ ብጥብጥ” ብለውታል፡፡ ድርጊቱንም አውግዘዋል፡፡

የመሪዎቹ ጉባኤ የተለያዩ የጎንዩሽ ስብሰባዎችን እያስተናገደ ይገኛል፡፡ የኢትዮጵያው  ጠቅላይ ሚኒስትር ኃይለማርያም ደሳለኝ ዛሬ ከሱዳን፣ ጅቡቲ እና ሶማሊያ ፕሬዝዳንቶች ጋር ተገናኝተው ተነጋግረዋል፡፡ የኢትዮጵያ፣ የግብጽ እና የሱዳን መሪዎች በነገው ዕለት ተገናኝተው በአባይ ግድብ ዙሪያ እንደሚመክሩም የኢትዮጵያ የውጭ ጉዳይ ሚኒስቴር አስታወቋል፡፡ ስለ ዛሬው ጉባኤ በስፍራው የተገኘውን ዘጋቢያችን ጌታቸው ተድላ ኃይለ ጊዮርጊስን አነጋግረነዋል። ሙሉ ቃለ ምልልሱን ለማድመጥ የድምጽ ማዕቀፉን ይጫኑ። 

ተስፋለም ወልደየስ

ልደት አበበ

 

Audios and videos on the topic

ተዛማጅ ዘገባዎች