ጠ/ሚኒስትር ኃይለማርያም ደሳለኝ የስራ መልቀቂያ አስገቡ | ኢትዮጵያ | DW | 15.02.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

ኢትዮጵያ

ጠ/ሚኒስትር ኃይለማርያም ደሳለኝ የስራ መልቀቂያ አስገቡ

የኢትዮጵያ ጠቅላይ ሚኒስትር አቶ ኃይለ ማርያም ደሳለኝ በገዛ ፈቃዳቸው ከኢህአዴግ ሊቀመንበርነት እና ከጠቅላይ ሚኒስትርነት ለመነሳት መጠየቃቸውን አስታወቁ። አቶ ኃይለ ማርያም ዛሬ አዲስ አበባ ውስጥ በሰጡት መግለጫ እንዳሉት ከጠቅላይ ሚኒስትርነት ለመነሳት የሥራ መልቀቂያ ደብዳቤያቸውን ለኢትዮጵያ የህዝብ ተወካዮች ምክር ቤት አስገብተዋል።

 ከሃላፊነታቸው የሚነሱትም በሀገሪቱ የተፈጠረውን አለመረጋጋት እና የፖለቲካ ችግር ለማስወገድ የሚወሰደው መፍትሄ አካል ለመሆን በማሰብ መሆኑን በመግለጫቸው ተናግረዋል።

ከኢትዮጵያ ህዝቦች አብዮታዊ ዴሞክራሲያዊ ግንባር ኢህአዴግ ሊቀመንበርነት ለመነሳት ለግንባሩ ምክር ቤት የመልቀቂያ ደብዳቤ ማስገባታቸውንም የገለጹት አቶ ኃይለ ማርያም በቅርቡ የኢህአዴግ ምክር ቤት በሚያካሂደው ስብሰባ ለጥያቄአቸው የመጨረሻ ውሳኔ ይሰጣል ብለው እንደሚያምኑ ተናግረዋል። ከደቡብ ኢትዮጵያ ህዝቦች ዴሞክራሲያዊ ንቅናቄ ዲኢህዴን ሊቀመንበርነት ለመነሳት ያቀረቡት ጥያቄ ተቀባይነት ማግኘቱን የተናገሩት አቶ ኃይለ ማርያም የኢትዮጵያ የህዝብ ተወካዮች ምክር ቤትም ጥያቄአቸውን ይቀበላል ብለው እንደሚጠብቁም አስታውቀዋል። ያስገቧቸው የሥራ መልቀቂያ ደብዳቤዎች ውሳኔ እስከሚያገኙ በሃላፊነታቸው እንደሚቆዩም ተናግረዋል። አቶ ኃይለ ማርያም በዛሬ መግለጫቸው ለወቅታዊዎቹ የሀገሪቱ ችግሮች መፍትሄ ፍለጋ ህዝቡ የበኩሉን ድርሻ እንዲወጣም ጥሪ አስተላልፈዋል። የ52 ዓመቱ አቶ ኃይለማርያም የቀድሞ የኢትዮጵያ ጠቅላይ ሚኒስትር አቶ መለስ ዜና በሞት ከተለዩ በኋላ ከመስከረም 2005 ዓም አንስቶ በጠቅላይ ሚኒስርነት ከዚያ ቀደም ሲልም በምክትል ጠቅላይ ሚኒስትርነት እና በውጭ ጉዳይ ሚኒስትርነት አገልግለዋል።

ኂሩት መለሰ

እሸቴ በቀለ

 

 

ተዛማጅ ዘገባዎች