1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ
ማስታወቂያ
ማስታወቂያ

ዜና | 29.07.2021 | 22:00

ዤኔቭ-ትግራይ ዉስጥ 100 ሺሕ ልጆች ይራባሉ

ሠሜን ኢትዮጵያ ትግራይ ክልል ዉስጥ በሚቀጥለዉ አንድ ዓመት ከ100 ሺሕ የሚበልጡ ልጆች ለሕይወት ለሚያሰጋ ረሐብ መጋለጣቸዉ እንደማይቀር የተባበሩት መንግስታት ድርጅት አስታወቁ።የዓለም አቀፉ የሕፃናት መርጃ ድርጅት (UNICEF) እንደሚለዉ ትግራይ ዉስጥ ዘንድሮ ለከፋ ረሐብ የተጋለጠዉና ይጋለጣል ተብሎ የሚገመተዉ ልጅ ቁጥር ከዚሕ ቀደም በየዓመቱ በአማካይ ከሚራበዉ በ10 እጥፍ የጨመረ ነዉ።በቅርቡ የትግራይን ክልልን የጎበኙት የUNICEF ቃል አቀባይ ማርክሲ ሜርካዶ ለተባበሩት መንግስታት ድርጅት እንዳስረዱት እርጉዝና አጥቢ እናቶችም ለከፋ ረሐብ ተጋልጠዋል።ቃል አቀባይዋ፣ ለችግረኞቹ ርዳታ ለማድረስ ያለምንም ገደብ ትግራይ መግባትና መዉጣት «መቻል አለብን» ብለዋል።የተባበሩት መንግስታት ቃል አቀባይ የንስ ሌርከ በበኩላቸዉ ድርጅቱ ትግራይ ዉስጥ ዕርዳታ ለማቅረብ የሳተላይት ስልክና ሌሎች የመገናኛ ዘዴዎች ሥለሚያስፈልጉት የኢትዮጵያ መንግስት መሳሪያዎቹ እንዲገቡ ይፈቅድ ዘንድ ጠይቀዋል።

ዋሽግተን-የአሜሪካና የተመድ የርዳታ ኃላፊዎች ኢትዮጵያ ዉስጥ ይወያያሉ

የዩናይትድ ስቴትስ የርዳታ ድርጅት (USAID)ና የተባበሩት መንግስታት የሠብአዊ ርዳታ የበላይ ኃላፊዎች በጦርነት ለተጎዳዉ ለትግራይ ሕዝብ ርዳታ ሥለሚደርስበት ሁኔታ ኢትዮጵያ ዉስጥ ይወያያሉ።የተባበሩት መንግስታት የሰብአዊ ርዳታ ጉዳይን የምክትል ዋና ፀሐፊነት ስልጣንን በቅርቡ የተሾሙት ማርቲን ግሪፍቲስ ኢትዮጵያን እየጎበኙ ነዉ።በየመን የቀድሞዉ የተባበሩት መንግስታት ድርጅት ልዩ መልዕክተኛ ዛሬ ከአዲስ አበባ ወደ መቀሌ መጓዛቸዉ ተዘግቧል።የዩናይትድ ስቴትስዋ የርዳታ ጉዳይ የበላይ ሳማንታ ፓወር ደግሞ ዛሬ ወይም ነገ አዲስ አበባ ይገባሉ ተብሎ እየተጠበቁ ነዉ።ሁለቱ ባለስልጣናት ከኢትዮጵያ ባለስልጣናት ጋር በተናጥል ካደረጉና ከሚያደርጉት ዉይይት በተጨማሪ የድርጅቶቻቸዉን ርዳታ ስለሚያቀናጁበት ሥልት ይነጋገራሉ።የተባበሩት መንግስታት ድርጅት የሰብአዊ ርዳታ ማስተባበሪያ ቢሮ እንደሚለዉ ትግራይ ዉስጥ 5.2 ሚሊዮን ሕዝብ ርዳታ ያስፈልገዋል።የአሜሪካዉ የርዳታ ድርጅት እንዳስታወቀዉ፣ ፓወር ከኢትዮጵያ ባለስልጣናት ጋር በሚያደርጉት ዉይይት ከትግራይ ክልል በተጨማሪ በሌሎች የኢትዮጵያ አካባቢዎች ለሚኖረዉ ችግረኛ ሕዝብም ድርጅታቸዉ ርዳታ ሥለሚያቀርብበት ሁኔታ ለመነጋገር አቅደዋል።ፓወር ሱዳን የሠፈሩ ኢትዮጵያዉያን ስደተኞችን ይጎበኛሉ ተብሏልም።

ቱኒስ-የፕሬዝደንቱ ሹመት፣ የተቃዋሚዎች ጥሪና የዉጪዉ ሥጋት

የቱኒዚያ ፕሬዝደንት ካይስ ሳይድ የሐገሪቱን ምክር ቤት ማገዳቸዉና ጠቅላይ ሚንስትሩን ሽረዉ የሥራ-አስፈፃሚ ስልጣኑን ጠቅልለዉ መያዛቸዉ የቀሰቀሰዉ ተቃዉሞ፣ፖለቲካዊ ቀዉስና ሥጋት ዛሬም እንደቀጠለ ነዉ።የቱኒዚያ ፀጥታ አስከባሪዎች ዛሬ አንድ የምክር ቤት እንደራሴን አስረዋል።ዛሬ ከቀትር በኋላ ከቤታቸዉ ተወድዉ የታሰሩት ያሲን አያሪ ፕሬዝደንቱን አጥብቀዉ ከሚተቹ ፖለቲከኞች አንዱ ናቸዉ።ፕሬዝደንቱ ከተቃዋሚ ፓርቲዎች ጋር እንዲደራደሩ ከዉጪም ከዉስጥም ግፊት ቢደረግባቸዉም እስካሁን አልተቀበሉትም።በቱኒዚያ ሕዝብ ዘንድ ከፍተኛ ድጋፍ አለዉ የሚባለዉ የአነሕዳ ፓርቲ መሪና ፕሬዝደንቱ ያገዱት ምክር ቤት አፈ-ጉባኤ ረሺድ ጋኑሺ ትናንት ፕሬዝደንቱ የሐገሪቱን ሕገ-መንግሥት እንዲያከብሩ በድጋሚ ጠይቀዋል።«ቱኒዚያ ወደ ዴሞክራሲ እንድትመለስ አስፈላጊዉን ነገር ሁሉ እናደርጋለን።በ2013 ቱኒዚያ ሕገ-መንግስት እንዲኖራት በማሰብ ሥልጣናችንን በሙሉ እስከመስጠት ደርሰናል።ከኛ ሥልጣን ይልቅ የቱኒዚያ ዴሞክራሲ በጣም አስፈላጊ ነዉ።አምባገነናዊ ሥርዓትና መፈንቅለ መንግስት ሳይሆን ዴሞክራሲያዊ ሥርዓት እንዲመለስ መክፈል ያለብንን ዋጋ ሁሉ እንከፍላለን።»ፕሬዝደንቱ ግን የተቃዋሚዎቻቸዉን ጥሪ አልተቀበሉትም።እንዲያዉም ትናንትናዉኑ ማታ አዲስ የሐገር ዉስጥ ጉዳይ ሚንስትር ሾመዋል።ፕሬዝደንቱ ከበተኑት ካቢኔ አባላት ሁሉ መርጠዉ የሐገር ዉስጥ ፀጥታን ለሚቆጣጠረዉ መስሪያ ቤት አዲስ ሚንስትር መሾማቸዉ የሚፈራዉን ሕዝባዊ አመፅ ለመደፍለቅ የመዘጋጀታቸዉ ምልክት ተደርጎ ተወስዷል።በአረብ ሕዝባዊ አብዮት የሥርዓት ለዉጥ ከተደረገባቸዉ ሐገራት ሁሉ የዲሞክራሲዉን ፈር የያዘችዉ ቱኒዚያ እንደነ ግብፅ ወደ አምባገነናዊ ሥርዓት፣ ወይም እንደነ የመን ወደ ሥርዓተ-አልበኝነት ትገባለች የሚለዉ ሥጋት እንዳየለ ነዉ።

ቤንጋዚ-አዉራጎዳዉ እንዲከፈት ሒፍጣር ፈቀዱ

የሊቢያን ምሥራቃዊ አካባቢ ከሐገሪቱ ምዕራባዊ ግዛት ጋር የሚያገናኘው አውራ መንገድ እንዲከፈት የተደረገውን ሥምምነት የሐገሪቱ ዕውቅ የጦር አበጋዝ ኸሊፋ ሒፍጠር ተስማሙ። የሜድትራኒያን ባሕር ደቡባዊ ጠረፍን እየታከከ ከምዕራባዊቱ ርዕሠ-ከተማ ትሪፖሊ፣ እስከ ምሥራቃዊቱ ሁለተኛ ትልቅ ከተማ ቤንጋዚ የሚደርሰው አውራ መንገድ እንዲከፈት 5+5 የሚባሉት የቀድሞዎቹ ተፋላሚ ኃይላት ተወካዮች ተስማምተዋል። እራሳቸዉን ፊልድ ማርሻል ብለዉ የሾሙት ሒፍጠር ዛሬ በሰጡት መግለጫ የአውራ ጎዳናው መከፈት ሰላም ለማውረድ ለሚደረገው ጥረት ትልቅ እመርታ ነው።ዘላቂ ሰላም የሚሰፍነው ግን የውጪ ኃይላት ከሊቢያ ለቅቀው ሲወጡ ብቻ ነው ብለዋል።«ሊቢያዉያን የሚመኙትን ፍትሐዊና የተሟላ ሠላም ለማስፈን ከልብና በቅንነት እንደምጥር እናረጋግጣለን። ይሁንና የውጪ ኃይላት እና ቅጥረኞች የሊቢያን ግዛት ያለምንም ቅድመ ሁኔታ፣ ዛይዘገዩ ለቅቀው ካልወጡ የሚፈለገው ሰላም አይፀናም።»1800 ኪሎ ሜትር የሚረዝመዉ አውራ መንገድ የተዘጋው የሒፍጠር ጦር የተባበሩት መንግሥታት ድርጅት የሰየመweን የሐገሪቱን መንግሥት ለማስወገድ የዛሬ ሁለት ዓመት ግድም ትሪፖሊን ባጠቃበት ወቅት ነበር ።በተባበሩት መንግሥታት ድርጅት አደራዳሪነት በተደረገው ስምምነት መሠረት ተፋላሚ ኃይላት ተኩስ አቁመዋል። በመጪዉ ታኅሣስ ምርጫ እስኪደረግ ድረስ ሐገሪቱን የሚመራ ጊዚያዊ መንግሥት መስርተዋልም።

ዋሽግተን-200 አፍቃኒስታናዉያን አሜሪካ ገቡ

አፍቃኒስታን ሠፍሮ ለነበረዉ የዩናይትድ ስቴትስ ጦር በአስተርጓሚነት፣ በመንገድ መሪነትና ጠቋሚነት ይሠሩ ከነበሩ የአፍቃኒስታን ዜጎች 200ዉ ዛሬ አሜሪካ ገቡ።የዩናይትድ ስቴትስ መንግስት ለጦሩ፣ ለዲፕሎማቶችና ለሰላዮቹ ለ20 ዓመት ግድም የሠሩና የተባበሩ 20 ሺሕ የአፍቃኒስታን ተወላጆችን አሜሪካ ዉስጥ ለማስፈር ወስኗል።ዩናይትድ ስቴትስ «ተባባሪ ስደተኞች» ባለችዉ ዘመቻ የአፍቃኒስታን ተባባሪዎችዋን አሜሪካ ዉስጥ ለማስፈር 1.1 ቢሊዮን ዶላር መድባለች።ዩናይትድ ስቴትስ ዉስጥ የሚሰፍሩት የአሜሪካ አገልጋዮች ከነቤተሰቦቻቸዉ 100 ሺሕ ይገመታሉ።ይሕ በንዲሕ እንዳለ የዩናይትድ ስቴትስና ዩናይትድ ስቴትስ መራሹን የሰሜን አትላንቲካ ጦር ቃል ኪዳን ድርጅት ወታደሮችን ሲወጋ የነበረዉ የአፍቃኒስታን አማፂ ቡድን ታሊባን በርካታ አካባቢዎችን እየተቆጣጠረ ነዉ።የታሊባን ታጣቂዎች ዛሬ ሒራት በተባለችዉ የሚገኘዉን የተባበሩት መንግስታት ድርጅት ፅሕፈት ቤትን ማጥቃቱ ተዘግቧል።በጥቃቱ አንድ የአፍቃኒስታን ዜጋ ተገድሏል።

አንካራ-ቃጠሎዉ 4 ሰዉ ገደለ

ደቡባዊ ቱርክን ያጋየዉ ሰደድ እሳት 4 ሰዎችን ገደለ፤ በሺሕ የሚቆጠሩ ነዋሪዎችንና ሐገር ጎብኚዎችን አፈናቀለ።ተወዳጅ የባሕር ዳርቻ መዝናኛ ስፍራዎችን ያነደደዉ እሳት እስከዛሬ ቀትር ድረስ 6 አዉራጃዎችን አዳርሷል።በብዙ ሚሊዮን ዩሮ የሚገመት ሠብል፣ ቤትና ሐብት አዉድሟል።የቱርክ የእርሻና የደን ሚንስትር በኪር ፓክዴሚሪክ እንዳስታወቁት በንፋስ የሚነዳዉ እሳት እስከ ዛሬ ቀትር ድረስ ካነደዳቸዉ 71 ሥፍራዎች፣ 57ቱን የእሳት አደጋ ተከላካይ ሰራተኞች አጥፍተዋል።ቱርክ ቃጠሎዉን ለመከላከል 38 ሔሊኮፕተሮች፣680 የዉኃ ቦቲዎች፣ 55 ከባድ ተሽከርካዎችና ከ4 ሺሕ በላይ ሠራተኞች አዝምታለች።የቱርክ የቅርብ ወዳጅ አዘርበጃን 500 ባለሙያዎች አዝምታለች።የቱርክ ጎረቤት ግን የረጅም ጊዜ ጠላት ግሪክም የእሳት አደጋ ሰራተኞች ለማዝመት ቱርክን ጠይቃለች።የዘንድሮዉ በጋ ክፉኛ ያገረረባት ግሪክ ራስዋም ቃጠሎዉ እንዳይዛመትባት የእሳት ተከላካይ ባለሙያዎችዋን በተጠንቀቅ አቁማለች።

ቶኪዮ-አትሌት ሰለሞን ባረጋ ወርቅ ሜዳይ አገኘ

ቶኪዮ-ጃፓን በተያዘው የዓለም ኦሎፒምክ ውድድር በወንዶች የ10 ሺሕ ሜትር ሩጫ ኢትዮጵያዊው አትሌት ሰለሞን ባረጋ የወርቅ ሜዳይ አሸነፈ።የ21 ዓመቱ ወጣት፣ ከዩጋንዳዊዉ የዓለም የ10 ሺሕ ሜትር ሻምፒዮን ከጆሽዋ ቼፕቴጊ እና ከሌለኛው ዩጋንዳዊ ዕውቅ አትሌት ጄኮብ ኪፒሊሞ ጠንካራ ፉክክር ቢገጥመውም ወርቁን አላስነካቸውም። ሰለሞን ርቀቱን ያጠናቀቀው በ27 ደቂቃ፤ ከ43.22 ሴኮንድ ነው። ዩጋንዳውያኑ የብርና የነሐስ ተሸላሚ ሆነዋል። ሰሎሞን ከሁለት ዓመት በፊት በተደረገው የዓለም ሻምፖዮን በ5ሺሕ ሜትር የነሐስ አሸናፊ ነበር።ዛሬ ሳምንቱን በደፈነው የ2020 የዓለም ኦሎምፒክ ውድድር ቻይና በ18፣ አስተናጋጅዋ ጃፓን በ17፣ ዩናይትድ ስቴትስ በ14 የወርቅ ሜዳያዎች ካንደኛ እስከ ሦስተኛ ያለውን ሥፍራ ይዘዋል። ኢትዮጵያ ሰሎሞን ዛሬ ባስገኘላት ወርቅ 47ኛ ደረጃ ላይ ትገኛለች።NM/SL