1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ
ማስታወቂያ
ማስታወቂያ

ዜና | 27.11.2020 | 00:00

ናይሮቢ-የኢትዮጵያና ጠቅላይ ሚንስትርና አሕ መልዕክተኞች ዉይይት

የኢትዮጵያ ጠቅላይ ሚንስትር ዐቢይ አሕመድ በመንግስታቸዉ ላይ ካመፁት ከሕዝባዊ ወያኔ ሐርነት ትግራይ መሪዎች ጋር እንዲደራደሩ የሚደረግባቸዉን ግፊት በድጋሚ ዉድቅ አደረጉት።ጠቅላይ ሚንስትሩ ዛሬ ለአፍሪቃ ሕብረት መልዕክተኞች እንደነገሩት ትግራይ ዉስጥ ከሚሰሩ «ሕጋዊ ዕዉቅና» ካላቸዉ ወገኖች ወጪ ከሌሎቹ ጋር አይደራደሩም።የአሜሪካዉ ዜና ወኪል አሶስስየትድ ፕረስ እንደዘገበዉ የወቅቱ የአፍሪቃ ሕብረት ሊቀመንበር የደቡብ አፍሪቃ ፕሬዝደንት ሲርየል ራማፎዛ የሰየሙት የሕብረቱ የመልዕክተኞች ጓድ ዛሬ ለሁለተኛ ጊዜ ከኢትዮጵያዉ ጠቅላይ ሚንስትር ጋር ያደረገዉ ዉይይት ዉጤት በዝርዝር አልተነገረም።ጠቅላይ ሚንስትር ዐቢይ የቀድሞዎቹን የላይቤሪያ፣ የሞዛምቢክና የደቡብ አፍሪቃ ፕሬዝደንቶችን ካነጋገሩ በኋላ ጽሕፈት ቤታቸዉ ባወጣዉ መግለጫ ግን ጠቅላይ ሚንስትሩ መንግሥታቸዉ «ሕግን ለማስከበር» ስለከፈተዉ ዘመቻ ለመልዕክተኞቹ አስረድተዋል።

በርሊን-የኢትዮጵያ ምክትል ጠቅላይ ሚንስትር ጉብኝት

የኢትዮጵያ መንግስት በሕዝባዊ ወያኔ ሐርነት ትግራይ (ሕወሓት) ላይ ለከፈተዉ «ሕግን ማስከበር» ላለዉ ዘመቻ ድጋፍ ለማሰባሰብ የተለያዩ ሐገራትን የሚጎበኙት የሐገሪቱ ምክትል ጠቅላይ ሚንስትርና የዉጪ ጉዳይ ሚንስትር ደመቀ መኮንን ዛሬ ከጀርመን ባለስልጣናት ጋር ተነጋግረዋል። አቶ ደመቀ የጀርመን ባለስልጣናትን ለማነጋገር በርሊን የገቡት የአዉሮጳ ሕብረትና የፈረንሳይ መሪዎችን ሰሞኑን ካነጋገሩ በኋላ ነዉ። የኢትዮጵያዉ ምክትል ጠቅላይ ሚንስትርና የዉጪ ጉዳይ ሚንስትር ዛሬ ከጀርመን ዉጪ ጉዳይ ሚንስትር ሐይኮ ማስና ከመራሒተ መንግሥት አንጌላ ሜርክል አማካሪ ጋር ተነጋግረዋል። የጀርመኑ ዉጪ ጉዳይ ሚንስትር ሐይኮ ማስ ለኢትዮጵያዊ እንግዳቸዉ እንደነገሩት ኢትዮጵያ ባሁኑ ወቅት የተኩስ አቁም ያስፈልጋታል። ግጭቱን ለማስወገድ የአፍሪቃ ሕብረት የሚያደርገዉን ጥረት ጀርመን እንደምትደግፍም ዉጪ ጉዳይ ሚንስትሩ አስታዉቀዋል። በሕዝቡ ላይ የሚደርሰዉ መከራ እንደሚያሳዝናቸዉ ዉጪ ጉዳይ ሚንስትሩ ጠቅሰዉ፣ በሰላማዊ ሰዎች ላይ የደረሰዉ የሰብአዊ መብት ጥሰት ተጣርቶ ጥፋተኞች ለፍርድ መቅረብ አለባቸዉ ብለዋልም።በኢትዮጵያና ፌደራዊ መንግስትና በሕወሓት መካከል የሚደረገዉ ግጭት የብሔር መልክና ማባሕሪ መያዝ የለበትም-እንደ ጀርመኑ የዉጪ ጉዳይ ሚንስትር አስተያየት

ዤኔቭ፟-የተመድ ርዳታ ለኢትዮጵያዉያን

የኢትዮጵያ ፌደራዊ መንግስት ጦርና የሕዝባዊ ወያኔ ሐርነት ትግራይ (ሕወሓት) ታጣቂዎች የገጠሙትን ዉጊያ ሸሽተዉ ወደ ሱዳን ለተሰደዱ ኢትዮጵያዉያ መርጃ 32 ቶን ርዳታ መላኩን የተባበሩት መንግታት ድርጅት አስታወቀ።የተባበሩት መንግስታት የስደተኞች ጉዳይ ከፍተኛ ኮሚሽነር ዛሬ እንዳስታወቀዉ ለስደተኞቹ መርጃ የሚወለዉን ቁሳቁስ ጭኖ ከዱባይ የተነሳዉ አዉሮፕላን ዛሬ ጠዋት ካርቱም ገብቷል።የድርጅቱ ቃል አቀባይ ባባር ባሎች እንዳሉት ድርጅታቸዉ በመጪዉ ሰኞም 100 ቶን የሚመዝን የርዳታ ቁሳቁስ ወደ ሱዳን ለመላክ አቅዷል።ይሁንና ድርጅቱ ተጨማሪ ርዳታ እንደሚያስፈልገዉ ቃል አቀባዩ አክለዉ ገልጠዋል።«ግማሽ ያሕሉ ልጆች ለሆኑት ስደተኞች ዕርዳታ ለመስጠት ጥረት እየተደገ ነዉ።የሰብአዊ ርዳታ ድርጅቶች ለስደተኞቹ መጠለያና ሌሎች ቁሳቁሶችን እየረዱ ነዉ።ይሁንና ስደተኞቹን ለመርዳት ተጨማሪ ሐብት ያስፈላጋል።ሱዳንም በአስቸኳይ ዓለም አቀፍ ርዳታ ሊደረግላት ይገባል።»ቃል አቀባይ ባሎች ዉጊያ በሚደረግበት የትግራይ አካባቢ የተጠለሉ የኤርትራ ስደተኞች ደሕንነት ድርጅታቸዉን እንዳሳሰበ አስታዉቀዋልም።ጦርነት ከተጀመረ ጀምሮ ለኤርትራዉያን ስደተኞች እርዳታ አልተሰጠም።ትግራይ ዉስጥ በ4 መጠለያ ጣቢያዎች ወደ 100 ሺሕ የሚሆኑ የኤርትራ ስደተኞች ተጠልለዋል።

አዲስ አበባ-እነ ጀዋር መሐመድ ልዩ ፍርድ ቤት እንዲሰየምላቸዉ ጠየቁ።

የብሔርና የኃይማኖ ግጭት በመቀስቀስና በተያያዥ ወንጀሎች በነጀዋር መሐመድ መዝገብ የተከሰሱት ተጠርጣሪዎች በታሰሩበት ወሕኒ ቤት አቅራቢያ ልዩ ችሎት እንዲሰየምላቸዉ ጠየቁ። የፖለቲካ አቀንቃኝ፣ ፖለቲከኛና OMN የሚባለዉ ቴሌቪዥን ጣቢያ መስራች ጀዋር መሐመድ፣ የኦሮሞ ፌደራሊስት ኮንግረስ (ኦፌኮ) ምክትል ሊቀመንበር በቀለ ገርባና አቶ ሐምዛ አዳነ ዛሬም ለሰወስተኛ ጊዜ ፍርድ ቤት አልቀረቡም።ሶስቱ ተከሳሾች አዲስ አበባ ባስቻለዉ የፌደራል ከፍተኛ ፍርድ ቤት ልደታ ምድብ ችሎት እንዲቀርቡ ከዛሬዉ ጋር ለ3ኛ ጊዜ ተቀጥረዉ ነበር።ይሁንና ተከሳሾቹ ለችሎቱ በዳብዳቤ በላኩት መልዕክት ፍርድ ቤት ያልቀረቡት «ለደሕንነታችን እንሰጋለን» በሚል ተመሳሳይ ምክንያት ነዉ።ወደፊት ለሚደረገዉ ክርክር ተጠርጣሪዎቹ በታሠሩበት አካባቢ ልዩ ችሎት እንዲሰየምላቸዉ መጠየቃቸዉ ተነግሯልም።ከ3ቱ ጋር የተከሰሱት ሌሎቹ ተጠርጣሪዎች ግን ዛሬ ችሎት ቀርበዉ፣ አቃቤ ሕግ ለመሠረተዉ ክስ የተከሳሾች ጠበቆችን የመጀመሪያ ደረጃ መቃዋሚያ አድምጠዋል።ከመቃወሚያው አንዱ የከሳሽ የጠቅላይ አቃቤ ሕግ ኃላፊ በእንግሊዝኛ ቋንቋ ስለተከሳሾች በመገናኛ ብዙሃን አስተላልፈዉታል ያሉት መረጃ ነዉ።የተከላካይ ጠበቆች ባቀረቡት መቃወሚያ የጠቅላይ አቃቤ ሕጉ ኃላፊ ፍርድ ቤት ሳይወስን በሰጡት አስተያየት በተከሳሾች ላይ የስም ማጥፋት ወንጀል ፈጽመዋል የሚል ሃሳብ ተካቷል፡፡ የተከሳሾች ጠበቃ ቶኩማ ዳባ ለዶይቼ ቬለ እንደተናገሩት ጠበቆቹ "የስም ማጥፋት" ባሉት ሃሳብ ላይ የፌዴራሉን ጠቅላይ ዐቃቤ ሕግ ወክለው ምላሽ የሰጡት መስሪያ ቤቱን እንጂ ኃላፊውን ስለመወከላቸው የሚያረጋግጥ ባለመሆኑ ኃላፊው ቀርበው ምላሽ ሊሰጡበት ይገባል በሚል ተከራክረዋል፡፡ የአዲስ አበባ ወኪላችን ስዩም ጌቱ ዶክተር ቶኩማ ዳባን ጠቅሶ እንደዘገበዉ ፍርድ ቤቱ ዋና ጠቅላይ አቃቤ ሕጉ በመገናኛ ብዙሐን አስተላልፈዉታል የተባለው መልእክት ወደ አማርኛ ተተርጉሞ በሲዲ እንዲቀርብ፤ እነ አቶ ጃዋር መሃመድ ልዩ ችሎት በማረሚያ ቤት አቅራቢያ እንዲቋቋም ላቀረቡት ጥያቄ ግን ከፍርድ ቤቱ የበላይ ኃላፊዎች ጋር ተወያይቶ ምላሽ ለመስጠት ለታህሳስ 08፣ 2013. ተለዋጭ ቀጠሮ ሰጥቷል።እዉቁ ድምፃዊ ሐጫሉ ሁንዴሳ በተገደለ ማግሥት ከሰኔ23 2012 ጀምሮ የተሳሩት አቶ ጃዋር መሃመድ እና አቶ በቀለ ገርባን ጨምሮ 24 ተከሳሾች በ1996 የተደነገዉን የወንጀል ህግ አንቀጽ 240ን በመተላላፍ ብሔር እና ሃይማኖትን መሰረት ያደረገ ግጭት ቀስቅሰዋል በሚል እና በሌሎች የሽብር ወንጀሎች ተከሰዉ እየተከራከሩ ነዉ።

ጁባ-የግብፁ ፕሬዝደንት የጁባ ጉብኝት

የግብጹ ፕሬዝዳንት አብዱል ፈታሕ አል-ሲሲ ነገ ደቡብ ሱዳንን በይፋ ሊጎበኙ ነው።የደቡብ ሱዳን ባለሥልጣናት «ታሪካዊ» ያሉት ጉብኝት ዓላማ፣ አል ሲሲ ከአስተናጋጃቸዉ ከፕሬዝደንት ሳልቫ ኪር ጋር «በጋራ ጉዳዮች ላይ ለመነጋገር» ከማለት ሌላ ዝርዝሩን አልጠቀሱም።ይሁንና ጉብኝቱና ዉይይቱ የሁለቱን ሐገራት የእስካሁን ግንኙነት ይበልጥ ያጠናክራል ብለዉ እንደሚያምኑ ባለስልጣናቱ አስታዉቀዋል።ለፕሬዝደንት አል ሲሲ ክብር የርዕሠ-ከተማ ጁባ ነዋሪ አደባባይ ወጥቶ ደማቅ አቀባባል ያደርጋል ተብሏልም።

ሰነዓ-ርዕሠ-ከተማይቱ በተደጋጋሞ በቦምብ ተመታች

የየመን ሁቲ አማፂያንን የሚወጋዉ ሳዑዲ አረቢያ መራሹ የዓረብ ተባባሪ ሐገራት ጦር ተዋጊ ጄቶች ርዕሠ-ከተማ ሰነዓን ዛሬ በቦምብ ሲያነፍሯት አረፈዱ።የከተማይቱ ነዋሪዎችና የሁቲ መሪዎች እንዳሉት የጦር ጄቶቹ የጣሉት ቦምብና የተኮሱት ሚሳዬል ቁጥራቸዉ በዉል ያልተነገረ ሕንፃዎችና መስሪያ ቤቶችን አጋይተዋል።በጥቃቱ መገደሉ በይፋ የታወቀዉ ግን አንድ ሰዉ ብቻ ናቸዉ።ባለፈዉ ሰኞ ሁቲዎች የተኮሱት ሚሳዬል አራምኮ የተባለዉ የሳዑዲ አረቢያ የነዳጅ ድርጅት የሚያስተዳድረዉን የነዳጅ ማቋቻና ማከፋፋይ ማዕከልን በከፊል አጋይቶት ነበር።የተባባሪዎቹ ሐገራት ጦር ዛሬ ሰነዓን ያጋየዉ ባለፈዉ ሰኞ ሁቲዎች የሰነዘሩትን ጥቃት ለመበቀል ነዉ።አል አረቢያ የተባለዉ የሳዑዲ አረቢያ ቴሌቪዥን ጣቢያ፣ የሳዑዲ አረቢያ ጦር ዛሬ ጠዋት ደቢባዊ ቀይ ባሕር ዉስጥ የተጠመዱ 2 የባሕር ዉስጥ ቦምቦች ማክሸፉን ዘግቦ ነበር።ሳዑዲ ረቢያ የምትመራቸዉ ሐገራት በኢራን ይደገፋሉ የሚባሉትን የየመን ሁቲ አማፂዎችን መዉጋት ከጀመሩ 7ኛ ዓመታቸዉን ይዘዋል።

ቴሕራን-የኢራን የኑክሌር ሳይቲስት ተገደሉ

የኢራን ከፍተኛ የኑክሌር ፊዚክስ ሳይንቲስት ሞሕሴን ፋኽሪዛዳሕ በጥይት ተደብድበዉ ተገደሉ። 59 ዓመታቸዉ ነበር።የኢራን የተለያዩ መገናኛ ዘዴዎች እንደዘገቡት ሳንቲስቱ የተገደሉት አብ-ሳርድ በተባለዉ የቴሕራን መንደር ዉስጥ ነዉ።መገናኛ ዘዴዎቹ «አሸባሪ» ካሏቸዉ ገዳዮች መካከል በርካቶች መገደላቸዉንም አስታዉቀዋል።የእስራኤሉ ጠቅላይ ሚንስትር ቢንያሚን ኔታንያሁ ከዚሕ ቀደም ሳይንቲስቱን «ይሕን ስም እንዳትረሱ። አደገኛ ነዉ» ብለዉ ነበር።በዛሬዉ ግድያ ግን የእስራኤል እጅ ይኑር-አይኑርበት እስካሁን በዉል የታወቀ ነገር የለም።NM/MS