የፌደራል ስርዓቱ ሊሻሻል ይገባል ተባለ | ኢትዮጵያ | DW | 18.05.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

ኢትዮጵያ

የፌደራል ስርዓቱ ሊሻሻል ይገባል ተባለ

የኢትዮጵያ የፌዴራላዊ ስርአት ብሄር ተኮር ይሁን ወይንስ መልክአ ምድራዊ አቀማመጥን ይከተል በሚለው ዙሪያ ውይይት እና ክርክር በአዲስ አበባ ዩኒቨርሲቲ ተደርጓል፡፡ በውይይቱ ላይ አሁን ያለው የፌዴራል ስርአት አወቃቀር ሙሉ በሙሉ ሃገሪቱ ለገባችበት ቀውስ ምክንያት ባይሆንም የጎላ ችግር ነበረው የሚሉ ሀሳቦች ተነስተዋል።

አውዲዮውን ያዳምጡ። 03:53

የፌደራል ስርዓቱ ሊሻሻል ይገባል ተባለ

አሁን ያለው የፌደራላዊ መንግስት አወቃቀር ስርአት ጊዜውን እና የተለወጡ በርካታ ማህበረ ፖለቲካ እንዲሁም ኢኮኖሚያዊ ሁኔታዎችን ማስተናገድ የማይችል በመሆኑ ሊሻሻል ይገባል የሚል ምክረ ሃሳብ ከአዲስ አበባ ዩኒቨርሲቲ መምህራን ተሰንዝሯል። ከተወያዮቹ መካከል የተለየ ሃሳብና አማራጭ ነው ያሉትን ሃሳብ የዘረዘሩት ፖለቲከኛው አቶ ልደቱ አያሌው ዋናው ስርአት ፌዴራላዊ ሆኖ ነገር ግን ከአሃዳዊ ስርአት በጎ አካሄዶችንም መውሰድ ያስፈልጋል ብለዋል። 

አቶ ልደቱ በቀበሌ እና ወረዳ ደረጃዎች ላይ አሁን ያለው ብሄር ተኮር አወቃቀር መቀጠል አለበት ባይ ናቸው። ሆኖም በማዘጋጃ ቤት ደረጃ መደራጀት የሚችል ህዝብ ቁጥር ያላቸው ከተሞች ላይ አሃዳዊ ስርአት ሊዘረጋ እንደሚገባ አማራጭ ያሉትን አቅርበዋል። በዞን እና በክልል ደረጃ መስፈርቱ ከቋንቋ እና ማንነት በላይ ያሉ ጉዳዮችን ታሳቢ ማድረግ አለበት የሚል ሃሳብም ሰንዝረዋል። 

በውይይቱ ላይ ሃገራዊ አንድነትን እና የአናሳዎችን መብት ማስከበር የሚችል፣ ሁሉም የሚሳተፍበት ኢትዮጵያን እንደኢትዮጵያ ማስቀጠል የሚችል ፌዴራላዊ ስርአት ሊዋቀር ይገባል የሚል ሃሳብ ተንጸባርቋል። የፌደራላዊ ስርዓቱ አሁን በሀገሪቱ ለሚታየው ችግር አስተዋጽኦ እንዳለው የጠቀሱ ተሳታፊዎች በበኩላቸው ከህገመንግስት ጀምሮ ማሻሻያ እንዲደረግበት አሳስበዋል። የትኛው ስርዓት ይሻላል በሚለው ላይ ሁሉም ሊወያይበት ይገባልም ተብሏል።

ሙሉ ዘገባውን ለማድመጥ የድምጽ ማዕቀፉን ይጫኑ። 

ሰለሞን ሙጬ

ተስፋለም ወልደየስ

 

 

Audios and videos on the topic

ተዛማጅ ዘገባዎች