የኤኮኖሚ ቀውስ እና የፖሊሲ አቅጣጫዎች በኢትዮጵያ

በተለያዩ ግጭቶች እና ጦርነቶች ውስጥ ለዓመታት በተከታታይ በዘለቀችው  ኢትዮጵያ የኑሮ ውድነቱ ብዙዎችን እያማረረ ነው ። እንደ ተመድ የሐምሌ ወር መረጃ፦ ከ133 ሚሊዮን በላይ ነዋሪ ባላት ኢትዮጵያ አብዛኛው ነዋሪ የዕለት ኑሮውን ለመግፋት እንኳ እጅግ መቸገሩን ሲገልጥ ይደመጣል ። መንግሥት ችግሩን ለመቅረፍ የተለያዩ የኤኮኖሚ ፖሊሲ ማሻሻያዎች በማድረግ ላይ እንደሚገኝ ይነገራል ።

ከዓለም የገንዘብ ድርጅት (IMF) ግፊት በኋላ የኢትዮጵያ መንግስት ብር ከዶላር አኳያ ያለውን የምንዛሪ ተመን በፊት ከነበረው አዳክሟል ።  ለዘመናት በመንግሥት ጥብቅ ቁጥጥር ስር የነበረው አንጋፋው እና ትርፋማ እንደሆነ በተደጋጋሚ የሚገልጠው ኢትዮ-ቴሌኮም በበኩሉ የመጀመሪያ የአክሲዮን ሽያጭ በማካሄድ ላይ ይገኛል ። የኩባንያውን 10 በመቶ ድርሻ ለኢትዮጵያውያን በሽያጭ እንደሚተላለፍም ተገልጧል ። እነዚህና ሌሎች ውሳኔዎች የሀገሪቱን ኤኮኖሚ ለማሻሻል የሚደረጉ ጥረቶች መሆናቸውን መንግስት ይናገራል ።

እንዲያም ሁኖ፦  በኢትዮጵያ እያሻቀበ የመጣው የዋጋ መናር እና የኑሮ ውድነት ማቆሚያ ያለው አልመሰለም ። አዲሱ ዓመት 2017 እንደገባ የኢትዮጵያ ኤሌክትሪክ አግልግሎት፣   ኢትዮ ቴሌኮም፣  የውኃ እና ፍሳሽ   ዋጋ ጭማሪ ማድረጋቸውን ዐሳውቀዋል ። ከፍተኛ የነዳጅ ዋጋ ጭማሪውም ማኅበረሰቡን እጅግ አስጨንቆታል ። ደመወዝ ጭማሪ ቢደረግም ከኑሮ ውድነቱ ጋር የሚጣጣም እንዳልሆነ ብዙዎች ይናገራሉ ። «የኤኮኖሚ ቀውስ እና የፖሊሲ አቅጣጫዎች በኢትዮጵያ» የዛሬው እንወያይ መሰናዶ ዐቢይ ትኩረት ነው ። በውይይቱ 4 እንግዶች ተሳታፊ ናቸው ።

1-ኤሚሬተስ ፕሮፌሰር ዳንኤል ተፈራ፦የኤኮኖሚክስ ምሁር፥ በጡረታ ላይ ይገኛሉ፥ በርካታ መጽሓፍትን እና መጣጥፎችን ለንባብ አብቅተዋል  ።

2-አብዱልመናን መሃመድ (ዶ/ር) የምጣኔ ሃብት ባለሙያ፥ በኢትዮጵያ ኤኮኖሚ እና ፋይናንስ ዘርፍ የመመረቂያ ጽሑፍ አጥንተው ያቀረቡ እና ጥናት በማካሄድ ላይ ያሉ፤ እንግሊዝ ሀገር በፋይናንስ ሞያ ተሰማርተዋል ።

3-አቶ ሸዋፈራሁ ሽታሁን፦ የፖለቲካል ኤኮኖሚ ተንታኝ እና የዲመቴ መጽሐፍ ደራሲ

4- ዓማንይሁን ሲሣይ፦ የንግድ እና ኤኮኖሚ ጉዳዮች አማካሪ ናቸው ።

ሙሉውን ውይይት ከድምፅ ማዕቀፉ ማድመጥ ይቻላል ።

በዚህ ውይይት መንግስት ተሳታፊ እንዲመድብ  ለጠቅላይ ሚንሥትር ጽ/ቤት  ይፋዊ የኢሜል ግብዣ ብንልክም ውይይቱን እስካደረግንበት ጊዜ ድረስ ምላሽ አላገኘንም ። የኢትዮጵያ ኤኮኖሚ ማኅበር ከፍተኛ አመራር በሥራ ጫና ምክንያት መሳተፍ እንደማይችሉ ገልጠዋል ። ሆኖም የማኅበሩ የማክሮ ኤኮኖሚ አንድ ባለሞያ ግን መልሰን እንድንደውል ከገለጡ በኋላ ለስልክ ጥሪያችንም ሆኑ ለተደጋጋሚ የጽሑፍ መልእክታችን ምላሽ አልሰጡንም ።

ማንተጋፍቶት ስለሺ

ነጋሽ መሐመድ