የኢትዮጵያ እና የሶማሊያ ስደተኞች ሞት | ዓለም | DW | 31.01.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

ዓለም

የኢትዮጵያ እና የሶማሊያ ስደተኞች ሞት

በየመን ባሕር ሰርጥ አቅራቢያ ባለፈው ሃሙስ የሞቱ ኢትዮጵያውያን እና ሶማሊያውያን ስደተኞች ቁጥር መጨመሩን የተባበሩት መንግሥታት የስደተኞች ጉዳይ ከፍተኛ ኮሚሽን አስታወቀ :: ኮሚሽኑ በተለይ ለዶቼቬሌ እንደገለጸው መርከቡ ሕገወጥ የሰዎች አዘዋዋሪዎች በከፈቱት የመሣሪያ ጥቃት የሰጠመ ሲሆን የተጓዦቹም ቁጥር ከ 300 ይበልጣል ::

አውዲዮውን ያዳምጡ። 03:22

በየመን የባህር ዳርቻ የኢትዮጵያ እና ሶማሊያ ስደተኞች ሞት

ከ 300 በላይ ስደተኞችን ጭኖ ከየመን ወደ ጅቡቲ ይጓዝ በነበረው መርከብ ላይ ጥቃት የተከፈተበት ባለፈው ሃሙስ ነበር :: ወደ አውሮፓ ለመፍለስ ከሶማሊያ እና ኢትዮጵያ መርከቡን የሞሉት ተሳፋሪዎች መርከቡን የሸጡላቸው ሕገ ወጥ የስደተኛ አዘዋዋሪዎች ተጨማሪ ብር እንዲከፍሉ ማስገደዳቸው በፈጠረው አለመግባባት መርከቧ በተተኮሰ ጥይት ተመታ ልትሰጥም ችላለች :: ጄኔቫ የሚገኘው የተባበሩት መንግሥታት የስደተኞች ከፍተኛ ኮሚሽን ቃል አቀባይ ዊልያም ስፒንድለርን በስልክ አግኝተን አነጋግረናቸው ነበር :: ባለፉት ተከታታይ ቀናት አል ቡራ ኢቃ አቅራቢያ በሚገኘው የባሕር ሰርጥ ተጨማሪ አስክሬኖች መገኘታቸው የሟቾቹን ቁጥር ከ 30 በላይ በእጥፍ ሊጨምረው እንደቻለ የኮምሽኑ ቃል አቀባይ ዊልያም ስፒንድለር ጥነግረውናል ::

" በርካታ ሶማልያውያን እና ኢትዮጵያውያን ስደተኞች በመርከቡ ውስጥ ነበሩ :: በድንገት መርከቡን የሸጡላቸው ሕገ ወጥ የሰው አዘዋዋሪዎች ተጨማሪ ገንዘብ እንዲከፍሉ አስገደዷቸው :: የተጠየቁትን ማድረግ ባለመቻላቸው በመርከቡ ላይ የመሣሪያ ጥቃት ፈጸሙ :: በርካታዎችም በጥይት ተመተው እና ባሕሩ ውስጥ ሰጥመው ሕይወታቸው አልፏል :: "
ዓለማቀፉ የስደተኞች ድርጅት መረጃ እንደሚጠቁመው እ.ኤ.እ በ 2017 ዓ.ም ብቻ ከ 87 ሺ የሚልቁ አፍሪቃውያን ስደተኞች ለሕገወጥ የሰው አዘዋዋሪ ደላሎች ገንዘብ በመክፈል ሕይወታቸውን ለአደጋ የሚያጋልጡ አሮጌ መርከቦችን እየገዙ የትውልድ ሃገራቸውን ጥለው በየመን አቆራርጠው ወደ አውሮፓ ለመሻገር ጥረት አድርገዋል :: አብዛኛዎቹም በሕገወጥ ደላሎች አካላዊ ጥቃት ስቃይ እና ግፍ ተፈጽሞባቸዋል :: ገሚሶቹም በሚያሳዘን ሁኔታ የባሕር ሲሳይ ሆነዋል :: ያም ሆኖ ዛሬም አደገኛው የባህር ላይ ፍልሰቱ አልቆመም :: የተባበሩት መንግስታት የስደተኞች ከፍተኛ ኮሚሽን ቃል አቀባይ ዊልያም ስፒንድለር ሰዎች ሕይወታቸውን አደጋ ላይ የሚጥሉት ወደው አይደለም ይላሉ ::
" ሰዎች እንዲህ ዓይነቱ አሳዛኝ አደጋ ላይ ህይወታቸውን የሚጥል ተግባር የሚፈጽሙት ምንም ምርጫ ስለሌላቸው እንደሆነ እናውቃለን :: የትውልድ ሃገራቸውን ጥለው እንዲፈልሱ

Überfahrt Mittelmeer Zustände an Bord der Schiffe Überfüllung Flash-Galerie

የሚገደዱት ድህነት ስራ አጥነት የሰብአዊ መብት ጥሰት አፈና ጭቆና እና የእርስ በእርስ ግጭትን ከሃገራቸው በመሸሽ እንዲሁም ነጻነታቸውን በመሻት ጭምር ነው "
ከሊቢያ በሜዲትራኒያን ባሕር በሚደረገው አደገኛ ጉዞም በርካታ አፍሪቃውያን ስደተኞች በሕገ ወጥ የሰዎች አዘዋዋሪዎች እየታገቱ የባርነት ሰለባ ሆነው ጉልበታቸው እንደሚበዘበዝ ይታወቃል :: ከዚህ ውጭ እስር ግድያ ጥቃት እና የሰውነት አካላቸውን ጭምር በግዳጅ በቀዶ ህክምና እያወጡ የመሸጥ አሰቃቂ ወንጀልም እንደሚፈጸምባቸው በየመገናኛ ብዙኃኑ ተዘግቧል :: የመንግሥታቱ ድርጅት የስደተኞች ኮሚሽን ቃል አቀባይ ስፒንድለር ከሊቢያም አፍሪቃውያን ስደተኞችን የማውጣቱ ተግባር ተጠናክሮ መቀጠሉን ይናገራሉ ::

" ሊቢያ ውስጥ የሚታየው ሁኔታ እጅግ አስከፊ ነው :: በስደተኞች ላይ የሚፈጸመውን ሰቆቃ በጽኑ ስናወግዝ ቆይተናል :: ያ ብቻ ግን አይበቃም :: በሃገሪቱ በእስር እና በባርነት የሚንገላቱ በአስቸኳይ እንዲወጡ ተጨማሪ ሥራዎችን እያከናወንን እንገኛለን :: በተቻለ ፍጥነት መፍትሄ እንሰጣቸዋለንም ብለን እናምናለን "
በአሁኑ ወቅት ሊቢያ ውስጥ ብቻ ከ 400 ሺህ በላይ ስደተኞች እንዳሉ የተባበሩት መንግስታት የሥደተኞች ኮምሽን መረጃ ያመለክታል :: ድርጅቱ በያዝነው የአውሮፓውያን አመት 30 ሺ ያህሉን በፈቃደኝነት መርሃግብር ወደመጡበት ሀገር የመመለስ ዕቅድ እንዳለውም ታውቋል ::

እንዳልካቸው ፈቃደ 

ኂሩት መለሰ

Audios and videos on the topic

ተዛማጅ ዘገባዎች