የአውሮጳ ኅብረት የድርድር መመሪያ ጸደቀ | አውሮጳ/ጀርመን | DW | 29.04.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አውሮጳ/ጀርመን

የአውሮጳ ኅብረት የድርድር መመሪያ ጸደቀ

ቤልጂየም ብራስልስ ውስጥ ዛሬ የተገናኙት 27ቱ የአውሮጳ ሃገራት መሪዎች ብሪታንያ ከኅብረቱ የምትወጣበትን የመደራደሪያ ሐሳብ በሙሉ ድምጽ አጽድቀዋል።

አውዲዮውን ያዳምጡ። 05:56
አሁን በቀጥታ እየተሰራጨ ያለ
05:56 ደቂቃ

የአውሮጳ ኅብረት 27ቱ አባል ሃገራት በሙሉ ድምጽ አጽድቀውታል

ቤልጂየም ብራስልስ ውስጥ ዛሬ የተገናኙት 27ቱ የአውሮጳ ሃገራት መሪዎች ብሪታንያ ከኅብረቱ የምትወጣበትን የመደራደሪያ ሐሳብ በሙሉ ድምጽ አጽድቀዋል።  የአውሮጳ ኅብረት ምክር ቤት ፕሬዝዳንት ዶናልድ ቱስክ ባለፈው መጋቢት ያቀረቡት የድርድር መመሪያ  ከ15 ደቂቃ ባነሰ ጊዜ ውስጥ ዛሬ መፅደቁ ተሰምቷል። በዛሬው የኅብረቱ ጉባኤ ላይ ግን ፈታኝ ድርድር የሚጠብቃቸው የብሪታንያዋ ጠቅላይ ሚኒሥትር ቴሬሳ ሜይ አልተገኙም። ብሪታኒያ ከምታደርገው ምርጫ በኋላ ወዲያውኑ ይጀመራል የተባለው ድርድር ከሁለት አመት ገደማ በኋላ በጎርጎሮሳዊው መጋቢት 29 ቀን 2019 ዓ.ም. እንዲጠናቀቅ ውጥን ተይዞለታል። መሪዎቹ ቁልፍ ጉዳዮች ላይ ሥምምነት ሳይደረስ ብሪታኒያ ከአውሮጳ ኅብረት ጋር ወደ ፊት በሚኖራት ግንኙነት ላይ ምንም አይነት ውይይት አይኖርም ብለዋል። «ስለወደፊቱ ከመምከራችን በፊት ያለፈውን መልክ ልናበጅለት ይገባል» ያሉት ዶናልድ ቱስክ ድርድሩን «በቀና ልብ ነገር ግን በከፍተኛ ጥንቃቄ እናደርጋለን» ብለዋል።

ዛሬ የጸደቁት መመሪያዎች ብሪታኒያ ከአውሮጳ ኅብረት ጋር በሚኖራት የንግድ ግንኙነት ላይ ከድርድሩ ጎን ለጎን ለመወያየት የነበራት ተስፋ ላይ ውሀ የሚቸልስ ነው ተብሏል። የቤልጅየሙ ጠቅላይ ሚኒሥትር ቻርለስ ሚሼል የብሪታኒያ መንግሥት 27ቱን አባል አገራት ለመከፋፈል አቅሙ የፈቀደውን ሁሉ ሊያደርግ ስለሚችል ሊፈጠር የሚችለውን ወጥመድ ልናስወግድ ይገባል ብለዋል። መሪዎቹ የብሪታኒያ ግዛት የሆነው ሰሜናዊ አየርላንድ በሕዝበ-ውሳኔ ከአየርላንድ ሪፐብሊክ ጋር ከተቀላቀለ ወዲያውኑ የአውሮጳ ኅብረት አባል እንደሚሆኑ አስታውቀዋል። በጉባኤው የአየርላንድ ጠቅላይ ሚኒሥትር ኤንዳ ኬኒ ሰሜናዊ አየርላንድ ከአየርላንድ ጋር ከተዋሐደች የአውሮጳ ኅብረት  አባልነቷ እንዲጸድቅ ከመሪዎቹ መተማመኛ ጠይቀዋል።

ብሪታንያ ሕዝበ-ውሳኔ ካደረገች በኋላ ከአውሮጳ ኅብረት ለመውጣት ጥያቄ  ያቀረበችው የኅብረቱን አንቀጽ 50 በመጥቀስ ነበር። ይኽ ጥያቄ ከቀረበ በኋላ ብሪታንያ ከኅብረቱ እንዴት ነው መውጣት የምትችለው?  የመደራደሪያ ሐሳቦቹ ምንድን ናቸው? ብሪታንያ እና  የአውሮጳ ኅብረት ሲፋቱ በምን ጉዳዮች ላይ መደራደር አለባቸው የሚሉ ነጥቦች ሁለቱ ወገኖችን ሲያነጋግሩ ሰንብቷል።

ኅብረቱ የመደራደሪያ ሐሳቡን ለአባል ሃገራቱ አቅርቦ ከተወያዩበት በኋላ ዛሬ በተደረገው ስብሰባ 27ቱም አባል ሃገራት ከ15 ደቂቃ ባነሰ ጊዜ ውስጥ መመሪያውን ተቀብለው አጽድቀዋል። ለመኾኑ የመደራደሪያ ሐሳቦቹ ምንድን ናቸው? 

ገበያው ንጉሤ

እሸቴ በቀለ

ማንተጋፍቶት ስለሺ

 

Audios and videos on the topic