የሞያሌ ሕዝብ ወደ ኬንያ መሰደዱን ቀጥሏል | ኢትዮጵያ | DW | 14.03.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

ኢትዮጵያ

የሞያሌ ሕዝብ ወደ ኬንያ መሰደዱን ቀጥሏል

ከኦሮምያ ክልል ቦረና ዞን ሞያሌ ከተማ ህዝቡ ዛሬም ወደ ኬንያ መሰደድ መቀጠሉን የዓይን ምስክር ለዶቼቬለ ተናገሩ። እኚሁ የአካባቢው ነዋሪ በሞያሌ ከተማ  ትናንት ማታ አንድ ሰው ሞቶ መገኘቱን ገልጸዋል።

አውዲዮውን ያዳምጡ። 04:02

ከሞያሌ መሰደዱ ቀጥሏል

ባለፈው ቅዳሜ በመከላከያ ሠራዊት ጥቃት 10 ሰላማዊ ሰዎች የተገደሉባት እና 12 የቆሰሉባት የሞያሌ ከተማ ነዋሪዎች ዛሬም ወደ ኬንያ መሰደዳቸው መቀጠሉ ተገልጿል። ሰዎቹ የሚሰደዱት ደግሞ ከሞያሌ ከተማ ብቻ ሳይሆን ከገጠር ቀበሌዎች ጭምር መሆኑን አንድ የዓይን ምስክር ለዶቼቬለ ተናግረዋል። እንደ ዓይን ምስክሩ ከሞያሌ የተሰደደው ህዝብ ቁጥር ብዙ ነው። ወደ ኬንያ የሚሰደዱትም በተለያዩ አቅጣጫዎች ነው።
«ሞያሌ ኢትዮጵያ ውስጥ መረጋጋት የለም። ሰዉ በጣም እየተሰደደ ነው። ዛሬም ማታ አካባቢም እየወጣ ነው። ከገጠር ቀበሌዎችም የተሰደዱ አሉ። አሁን ራሱ እዛ ሄጄ ነው የመጣሁት። ብዙ ህዝብ ነው እዛ ተሰዶ ያለው። በተለይ ህጻናት እና ሴቶች ሽምግሌዎች ብዙ ናቸው ተሰደው እዛ ያሉት።» 
ስደተኞቹ ያሉበት ቦታ ደርሰው መመለሳቸውን የተናገሩት እኚሁ የዓይን ምስክር ወደ ኬንያ ተሰዷል የሚሉት ነዋሪ ቁጥር በርሳቸው ግምት እስከ 50 ሺህ ይደርሳል። ዶቼቬለ ትናንት ያነጋገራቸው የኬንያ ቀይ መስቀል ማህበር ተጠሪ አባስ ጉሌት ግን ቁጥሩ ምናልባት ማምሻውን እስከ 6 ሺህ ይድረስ አይድረስ እናያለን ሲሉ፣ ብዙ ሰዎች ወደ ኬንያ እየመጡ ስለመሆኑ ከኢትዮጵያ ሞያሌ ፣ኬንያ ከገቡት ስደተኞች ያገኙት መረጃ ጠቅሰው ተናግረው ነበር። ሚስተር ጉሌት እንደሚሉት ስደተኞች አሁን ኬንያ ውስጥ በተለያዩ ቦታዎች ነው የሚገኙት። በተለይ በአንድ አካባቢ ቁጥራቸው በጣም እየጨመረ ነው። 

«ስደተኞቹ በሶሎሎ ንኡስ ወረዳ 3 ቦታዎች ነው የሚገኙት። በሞያሌ ደግሞ በ4 ቦታዎች ነው ያሉት።ስለዚህ ድንበር አቋርጠው ከኢትዮጵያ ወደ ኬንያ ከተለያዩ አቅጣጫዎች ነው የሚመጡት። በኬንያም ኬንያ ሞያሌ ከገቡት ይልቅ በሶሎሎ ገጠር አካባቢዎች የሚገቡት ቁጥር በፍጥነት እየጨመረ ነው።»
በሌላ በኩል ከተማዋ አለመረጋጋትዋን የሚናገሩት የዓይን ምስክር ትናንት ማታ አንድ ሰው ተገድሎ ተገኝቷል ብለዋል። ይህም ነዋሪዎችን ፍርሀት ውስጥ መክተቱን ገልጸዋል። 
«ትናንት እና ማታም ሰው ሞቶ ነው የተገኘው። መነኻሪያ አካባቢ ነው። ማን እንደገደለው አይታወቅም። ማታ ሰው እየሞተ ነው። ሰዉ በጣም ፈርቶ ነው የሚሰደደው። ባለፈውም ሞቷል። እሱንም እኛ ነን የቀበርነው። አንቀው እየገደሉ ነው ያሉት በቃ አይታወቅም።»
በአሁኑ ጊዜ በሞያሌ ከተማ ውስጥ የመከላከያ ሠራዊት እንደሚገኝ አልፎ አልፎም ሰዎች እንደሚታሰሩ የዓይን ምስክሩ ተናግረዋል። ህዝቡ በከተማዋ ባለፈው ቅዳሜ እና ከዚህ ቀደምም የንፁሀንን ህይወት ያጠፉ ለፍርድ ይቀርቡ የሚል ጥያቄ አቅርቧል። ወደ ኬንያ የተሰደዱትም ወደ ሀገራቸው የሚመለሱት አንድ ቅድመ ሁኔታ ሲሟላ መሆኑን ተናግረዋል እንደ ዓይን ምስክሩ።
«ኮማንድ ፖስቱ ከተነሳ ነው እኛ የምንመለሰው ነው የሚሉት ሰዎቹ። ሰዉ እነሱን ካየ ይሸሻል። እነርሱ ደግሞ 3 ሆነew አራት ሆነው ውስጥ ለውስጥ ይሄዳሉ። ማታ አካባቢ አሥራ ሁለት አስራ አንድ ሰዓት አካባቢ ። ሰዉ ደግሞ ህዳናቱ እነርሱን ካዩ ይሸሻሉ።ወይ ወደ ግቢ ይገባሉ።ወይም ደግሞ ወደ ሌላ ቦታ ይሄዳሉ።»
ኬንያ ለተሰደዱት የኢትዮጵያ ሞያሌ ነዋሪዎች የኬንያ ቀይ መስቀል በራሱ ተነሳሽነት በሰብዓዊነት  ምግብ እያቀረበ መሆኑን ሃላፊው ጉሌት ለዶቼቬለ ተናግረዋል። የሞያሌው ነዋሪ ግን ሰዎቹ ለልዩ ልዩ ችግሮች መዳረጋቸውን ገልጸዋል።
«በጣም ችግር ውስጥ ነው ያሉት።ህጻናት ይበዛሉ። ሴቶች ይበዛሉ።የሚበላ ነገር የለም። ውሐ ራሱ የለም። የውሐ እጥረት አለ። ማደሪያ ራሱ የለም። ትምሕርት ቤት ውስጥ ነው ያሉት። በጣም ችግር ውስጥ ነው ያሉት።»
ካለፈው ቅዳሜ አንስቶ ወደ ኬንያ ስለ ሚሰደዱት የሞያሌ ነዋሪዎችም ሆነ ትናንት ሞቶ ተገኝቷል ስለተባለው ሰው ጉዳይ የሞያሌ ከተማ  ከንቲባን ለማነጋገር ተደጋጋሚ የስልክ ጥሪ ብናደርግም ልናገኛቸው አልቻልንም።

ኂሩት መለሰ

አዜብ ታደሰ

Audios and videos on the topic

ተዛማጅ ዘገባዎች