የማሊ ወታደራዊ ተልዕኮና ECOWAS | አፍሪቃ | DW | 17.01.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

የማሊ ወታደራዊ ተልዕኮና ECOWAS

ማሊ ዉስጥ በፈረንሳይ ወታደሮች በሚታገዘዉ የሀገሪቱ ጦርና በእስላማዊ ታጣቂዎች መካከል ትናንት ዉጊያዉ ተጀምሯል። የምዕራብ አፍሪቃ የኤኮኖሚ ማኅበረሰብ ECOWAS 2000 ወታደሮችም ዛሬ ማሊ እንደሚገቡ ይጠበቃል።

በዉጊያዉ ግንባር የተሰማሩትን የፈረንሳይ ወታደሮች የጎበኙት የማሊ ፕሬዝደንት ዲዮንኮንዳ ትራኦሬ ሰሜን ማሊን የተቆጣጠሩትን ፅንፈኛ እስላማዊ ታጣቂዎች ድል እንደሚነሱ በእርግጠኝነት ተናግረዋል። ተንታኞች በበኩላቸዉ የECOWAS ሠራዊት የዉጊያ ልምድ እንደሚያንሰዉ እየጠቆሙ ነዉ። ከተከታታይ የአየር ጥቃት በኋላ የፈረንሳይ ወታደሮች የመጀመሪያዉን የምድር ዉጊያ ትናንት መጀመሩን ተገልጿል። የምዕራብ አፍሪቃ የኤኮኖሚ ማኅበረሰብ ECOWAS ወታደራዊ አዛዦች በበኩላቸዉ ወደማሊ ስለሚዘምተዉ ጦር ለመናገር ባማኮ ላይ ተሰባስበዋል። የምዕራብ አፍሪቃ የኤኮኖሚ ማኅበረሰብ ECOWAS 2000 ወታደሮች ዛሬ ይገባሉ በሚል እየተጠበቀ ነዉ።

ናይጀሪያ፤ ኒዠር፤ ቶጎ እና ቡርኪናፋሶ በነፍስወከፍ 500 ወታደሮችን እንደሚያዘምቱ የECOWAS ኮሚሽን ልዩ ተወካይ አቦዱ ቱሬ ቼካ ለጀርመን የዜና ወኪል ገልፀዋል። እሳቸዉ እንደሚሉትም ሰዓቱን በትክክል ባይገለፅም የናይጀሪያ ሠራዊት ዛሬ ባማኮ ይገባል። የማሊ ጦር አዛዥ ኢምባሪሂም ዴምቤሌ ECWAS ወታደሮቹን በ48 ሰዓታት ዉስጥ ማንቀሳቀስ እንደሚጀምር አመልክተዋል። የፈረንሳይ የመከላከያ ሚኒስትር ዦን ኢቭ ለ ድሪዮን ማሊ ዉስጥ የተሰማሩት የሀገራቸዉ ወታደሮች የሚገጥማቸዉ በደንብ የሰለጠነ፣ ፈጣን እና ቁርጠኛ ኃይል መሆኑን ሲገልፁ የዘመቻዉን አስቸጋሪነት ጠቁመዋል። ሰሜን ማሊ ዉስጥ ከተንሰራፋዉ ከአልቃኢዳ ጋ ትስስር እንዳለዉ ከሚነገረዉ እስላማዊ ታጣቂ ቡድን ጋ ለመዋጋት የሚዘምተዉ የECOWAS ጦርስ ዝግጅቱ እንዴት ይታያል? በብሪታኒያ ቻተም ሃዉስ የአፍሪቃ ዘርፍ ኃላፊ አሌክስ ቫይንስ ያን ያህል ልምድ ያለዉ ነዉ የሚል እምነት የላቸዉም።

«ወደማሊ የሚዘምቱት የECOWAS ወታደሮች እጅግም ብቃት ያላቸዉ አይደሉም፤ የጦርነት ፍፁም ልምድ የላቸዉም። ስለዚህ እቅዱ እነሱን ከግንባር ማስቀደም መሆን አይኖርበትም። ሆኖም የተሻለ ስልጠና ላለዉ የማሊ ጦር ድጋፍ እንዲሰጡ ማድረግ ነዉ። እቅዱም በዚህ መልኩ ይመስላል። የምዕራብ አፍሪቃ ወታደሮች ወደማሊ ባስቸኳይ መዝመታቸዉ አስፈላጊ ይመስለኛል። ነገር ግን በዚህ ማጥቃት ምን ያህል ዉጤታ ይሆናሉ የሚል ከፍተኛ ግምት መያዝ አይኖርብንም።»

የECOWAS ወታደሮች ወደማሊ ዘምተዉ ለግዳጅ የሚሰማሩ ከሆነ የሚሰለፉት በእስላማዊ ታጣቂዎቹ ወደተያዘዉ በረሃማ አካባቢ እንደሚሆን ይገመታል። ተንታኙ እንደሚሉት በረሃማዉን አካባቢ ከመለማመድ አንፃር እንደሴኔጋል ካሉ ሀገሮች የሚመጡት ችግር ይገጥማቸዋል ባይባልም እንዲህ ባለ ጦርነት የመሳተፍ ልምድ እንደማይኖራቸዉ ይገመታል። እሳቸዉ እንደሚሉትም የፈረንሳይ ጦር ከወዲሁ ጠንካራ መካች ኃይል ገጥሟቸዋል።

«አንዳንዶቹ ወታደሮች በረሃማ ሁኔታ ካለባቸዉ ሀገሮች የሚመጡ ናቸዉ። ለምሳሌ ሴኔጋል። ስለዚህ መጠነኛ ልምድ ሊኖራቸዉ ይችላል። ነገር ግን አሁን እንደሚካሄደዉ ባለ ጦርነት በቂ የሚባል የጦር ልምድ የላቸዉም፤ ፈረንሳዮች ጠንካራ መካች ኃይል ነዉ የገጠማቸዉ። ወደዚህ ከመግባታቸዉ በፊትም የECOWAS ወታደሮች እንዲህ ይህ እንዲገጥማቸዉ አይፈለግም።»

እንዲያም ሆኖ 3300ዎቹ የECOWAS ወታደሮች ምን ያህል ታጣቂ እንዳለዉ ካልታወቀዉ እስላማዊ ቡድን ጋ ለመፋለም ወደማሊ እንደሚገቡ ይጠበቃል። ችግሩ ብዛቱ አለመታወቁ ሳይሆን ይላሉ የቻተም ሃዉሱ አሌክስ ቫይንስ የዉጊያዉ አዉድ ነዉ፤

«ይህ እንደአፍጋኒስታን አይደለም፤ እጅግ በጣም የተለየ ሁኔታ ነዉ። ይህ የብዛት ጉዳይ አይደለም፤ አካባቢዉ በጣም ሰፊ እና በዉስጡ በቀላሉ ሊቆጣጠሩት የማይቻል በጣም ጥቂት አክራሪ እስላማዉያንን የያዘ ነዉ።»

ፈረንሳይ ለECOWAS ወታደሮች ስልጠና እንደምትሰጥ የተገለፀ ሲሆን የአዉሮጳ ኅብረት በበኩሉ የማሊን ጦር እንደሚያሰለጥን ተንታኙ ጠቁመዋል። ዛሬ የወጡ ዘገባዎች ደግሞ ብራስልስ ላይ የአዉሮጳ ኅብረት የዉጭ ጉዳይ ሚኒስትሮች ወታደራዊ ስለጠናዉ በየካቲት ወር አጋማሽ እንዲጀመር መወሰናቸዉን አመልክተዋል። ሆኖም አሰልጣኞቹ መቼ እዚያ እንሚገኙ ግልፅ አይደለም። አንድ የአዉሮጳ ዲፕሎማትን የጠቀሰዉ የጀርመን የዜና ወኪል በደቡባዊ ማሊ መረጋጋት ካልሰፈነ እንደማይሆን ገልጿል።

ሸዋዬ ለገሠ

አርያም ተክሌ

Audios and videos on the topic