1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ
ማስታወቂያ
ማስታወቂያ

ዜና | 29.01.2023 | 23:00

ኢትዮጵያ፤ የአማራ ክልል መንግስት ከ4ሺ ህ 400 ዜጎች ምህረት አደኩ አለ

የአማራ ክልል መንግስት ከ4ሺህ 400 በላይ ለሚሆኑ የሕግ ታራሚዎች ይቅርታ ማድረጉን የክልሉ ፍትህ ቢሮ አስታወቀ፡፡ የቢሮው የህዝብ ግንኙነት ኃላፊ አቶ ዓለም እሸት ምህረቴ ዛሬ ለዶይቼ ቬሌ እንደተናገሩት የክልሉ መንግስት በይቅርታ ቦርድ ተመርምሮ መስፈርቱን በማሟላታቸው የአማራ ክልል ምክር ቤት ጥር 17ቀን፣ ባካሄደዉ አስቸኳይ ስብሰባ በክልሉ ፍትህ ቢሮ አቅራቢነት 4ሺ ህ 401 ታራሚዎች ካለፈው ቅዳሜ ጥር 20 ቀን ጀምሮ ከሁሉም የክልሉ ማረሚያ ቤቶች መውጣት ጀምረዋል፡፡ ይሁንና ከዚህ በፊት ይቅርታ ተደርጎላቸው የነበሩና ባለፉት 3 ዓመታት ውስጥ እንደገና ወንጀል ፈፅመው የተገኙ የ13 ታራሚዎች ይቅርታ መሰረዙንም ኃላፊው አመልክተዋል፡፡ባህርዳር የሚገኘዉ የዶቼ ቬለ ዘጋቢ በላከልን መረጃ፤ የአማራ ክልላዊ መንግሥት በአስገድዶ መድፈር በጠለፋ፤ በህገወጥ የሰዎች ዝዉዉር በመሳሰሉ ወንጀሎች የተከሰሱ ይቅርታው የማይመለከታቸው መሆኑን የክልሉ የህዝብ ግንኙነት ኃላፊ አቶ ዓለምእሸት ምህረቴ ተናግረዋል። የህዝብ ግንኙነት ኃላፊ አቶ ዓለምእሸት ምህረቴ ይህን ይናገሩ እንጂ በምህረት ተለቀቁ የተባሉት ከአራት ሺህ የሚበልጡት ዜጎች በምን ምክንያት የታሰሩ እንደነበሩ በዝርዝር የገለፁት ነገር የለም።

አፍሪካ ቀንድ: ድርቅ 22 ሚሊዮን ለረሃብ ምክንያት ሆነ

ከደቡብ ኢትዮጵያ እስከ ሰሜን ኬንያ እና ሶማሊያ ድረስ ለአራት አስርት ዓመታት በታየዉ የከፋው ድርቅ ምክንያት በአፍሪቃዉ ቀንድ ወደ 22 ሚሊዮን ያህል ሰዎች ለረሃብ መጋለጣቸዉ ተገለፀ። ድርቅ በተከሰተባቸዉ በእነዚህ አካባቢዎች የሚኖረዉ ህዝብ በአብዛኛው በእንስሳት ርባታና ከእጅ ወደአፍ ላይ ባተኮረ ባህላዊ ግብርና የሚተዳደር ሲሆን ከጎርጎረሳዉያኑ 2020 ዓመት መጨረሻ ጀምሮ ለአምስተኛ ጊዜ ለተከታታይ ዓመት የዝናብ ወቅት ያልታየበት ቦታ ነዉ። እንደ ተባበሩት መንግስታት ድርጅት ገለጻ በኢትዮጵያ 12 ሚሊዮን ህዝብ ፣ በሶማሊያ 5.6 ሚሊዮን ህዝብ እንዲሁም በኬንያ 4.3 ሚሊዮን ህዝብ የአጣዳፊ ጊዜ የምግብ ዋስትና የላቸዉም። በምስራቅ አፍሪቃ በሚገኙት በነዚህ አካባቢዎች በጎርጎጎረሳዉያኑ 2022 ዓመት መጀመርያ 12 ሚሊዮን የነበረ ሲሆን ዘንድሮ በዚሁ አካባቢ የረሃብረኛዉ ህዝብ ቁጥር በእጥፍ መጨመሩን የመንግሥታቱ ድርጅት አክሎ ገልጿል። በዚሁ አካባቢ በተከሰተዉ የዉኃ እጥረት 1.7 ሚሊዮን ህዝብ ከአካባቢዉ መፈናቀሉም ተገልጿል። የአፍሪቃዉ ቀንድ ለአየር ንብረት ለውጥ በጣም ተጋላጭ ከሆኑ አካባቢዎች አንዱ ሲሆን፣ ከጎርጎረሳዉያኑ 2016 ዓመት ጀምሮ ከ13 የዝናብ ወቅቶች ስምንት የዝናብ ወቅቶች አለመከሰታቸዉ ሁኔታዉን ዛሬ አስከፊ እንዳደረገዉ ተመልክቷል። በጎርጎረሳዉያኑ 2011 በሶማልያ በከፊል የዓለም አቀፉ ማህበረሰብ በፍጥነት ርምጃ ባለመውሰዱ 260 ሺህ ህዝብ በረሃብ መሞቱን የመንግሥታቱ ድርጅት ይፋ ያደረገዉ ዘገባ ያሳያል። በወቅቱ በረሐብ ካለቁት መካከል ገሚሱ ከስድስት ዓመት በታች ህጻናት ነበሩ።

ቱኒዚያ: በምርጫ በቂ ህዝብ ሳይሳተፍ ቀረ

በቱኒዚያ የተካሄደው ሁለተኛው ዙር የፓርላማ ምርጫ በቂ ህዝብ ሳይሳተፍበት መቅረቱ ተነገረ። የመምረጥ ህጋዊ ፍቃድ ካላቸዉ ዜጎች መካከል ድምፅ የሰጡት አሥራ አንድ ነጥብ ሦስት በመቶ የሚሆኑት ብቻ መሆናቸዉ ተዘግቧል። ፕሬዝዳንት ካይስ ሳይድ ከጀመሩት አወዛጋቢ ከተባለዉ ህገ-መንግስታዊ ተሃድሶ ወዲህ የህዝብ ተወካዩ ፓርላማ ምንም አይነት ስልጣን ስለሌለው በምርጫዉ አነስተኛ የመራጭ ቁጥር መታየቱ ምንም የማያስገርም አይደለም የሚጠበቅ ነዉ ተብሏል። በቱኒዝያ የሚገኙት አብዛኞቹ የፖለቲካ ፓርቲዎች በምርጫዉ ላለመሳተፍ መወሰናቸዉም ተመልክቷል። ፓርቲዎቹ ፕሬዚዳንት ሳይድ እያካሄዱት ነው በተባለዉ ተሃድሶ ሕገ ወጥ በሆነ መንገድ ፓርላማውን አዳክመዋል፤ በቱኒዝያ ዲሞክራሲን ቀብረዋል ሲሉ ይወነጅሏቸዋል። ይሁንና ጥቂት መራጮች ተገኙበት የተባለዉ የምርጫ ዉጤት እስካሁን ይፋ አልተደረገም።

ጣሊያን፤ አዲሱ የጣልያን ህግ ስደተኞችን ሞት ይጨምራል

የጣሊያን አዲስ የፀረ-ስደተኝነት እርምጃ እና ህግ በሜዲትራኒያን ባህር ሰዎች እንዲሞቱ ያደርጋል ሲሉ የጀልባ ስደተኞችን ከመስመጥ የሚታደጉ መድን ቡድኖች አስጠነቀቁ። ባለፈዉ የጎርጎረሳዉያን ዓመት ወደ ስልጣን የመጡት የኢጣልያዊትዋ ጠቅላይ ሚኒስትር ጆርጂያ ሜሎኒ ወደ ስልጣን ሲመጡ ጣልያን የሚገቡትን የስደተኞች ቁጥር እቀንሳለሁ ሲሉ ቃልመግባታቸዉ ይታወቃል። ወደጣልያን ከሚገቡት አብዛኞቹ ስደተኞች መካከል ከሰሜን አፍሪቃ በጀልባ ተሳፍረዉ ጣልያን ባህር ዳርቻ የሚደርሱት ናቸዉ። የጣልያንዋ ጠቅላይ ሚኒስትር ስደተኞችን ወደ ኢጣልያ መጉረፍ ለመግታት ስደተኞችን የሚታደጉ ጀልባዎችን ለማስቆም እቅድ እንደያዙ ተዘግቧል።

ፓኪስታን ፤ ቢያንስ 44 ሰዎች ተገደሉ

በሰሜናዊ ምዕራብ ፓኪስታን ፐሻዋር ከተማ በሚገኝ አንድ መስጊላይ በደረሰ ፍንዳታ ቢያንስ 44 ሰዎች ተገደሉ። የፓኪስታን ፖሊስ እንዳስታወቀዉ ከሆነ ፓፐሻወር ቀትር ላይ ለፀሎት በተሰበሰቡ ምዕመናን ሞልቶ በነበረዉ መስጂድ ላይ በደረሰዉ የፍንዳታ ጥቃት ቢያንስ 44 ሰዎች ተገድለዋል፤ ከ 150 ሰዎች በላይ ደግሞ ጉዳት ደርሶባቸዋል። የፒሻወር ሆስፒታል ቃል አቀባይ በበኩሉ አሁንም ከፍንዳታዉ ቦታ በርካታ አስክሪን እየመጣ ነዉ ይላሉ። በፍንዳታዉ የመስጊዱ ህንፃ ከፍተኛ ጉዳት እንደደረሰበትም ተነግሯል።

ዓለም፤ ደቡብ ኮሪያ ወታደራዊ ድጋፍ እንድትሰጥ ተጠየቀ

ደቡብ ኮሪያ ለዩክሬን ወታደራዊ ድጋፍ እንድትሰጥ ተጠየቀ። ደቡብ ኮሪያ ለዩክሬን ወታደራዊ ድጋፍ መስጠትዋን "እንድታሻሽል" ያሳሰቡት የሰሜን አትላንቲክ ጦር ቃልኪዳን ሃገሮች የኔቶ ዋና ፀሐፊ የንስ ሽቶትልተንበርግ ናቸዉ። የኔቶ ዋና ፀሐፊ ዛሬ ደቡብ ኮርያ መዲና ሶል ላይ ተገኝተዉ ባደረጉት ንግግር ደቡብ ኮርያ ወደ ግጭት ቀጠና የጦር መሳርያ ያለመላክ ህግዋን እንድትከልስ ጠይቀዋል። «ደህንነት ክልላዊ አይደለም። በዘመናችን ያለው የደኅንነት ጉዳይ ዓለም አቀፋዊ ከመሆኑም በላይ በዩክሬኑ ጦርነት ይህን እንገነጠባለን። ፕሬዝዳንት ፑቲን በዩክሬኑ ጦርነት ካሸነፉ ለዩክሬናውያን አሳዛኝ ነገር ነዉ ። ከዚህ ሌላ ግን በመላው ዓለም ለሚገኙ ፈላጭ ቆራጭ መሪዎች እጅግ አደገኛ መልዕክት የሚያስተላልፍ ይሆናል።»የደቡብ ኮሪያው ፕሬዝዳንት ዩን ሱክ ዮል ከጥቂት ጊዜ በፊት ሀገራቸው ወታደራዊ ግጭቶች ውስጥ ለሚገኙ ሀገራት የጦር መሳሪያን ማቅረብ እንደማትችል የሚደነግግ ህግ አውጀው ነበር። በሌላ በኩል ሩስያ በዩክሬይን ላይ ወረራ እንደጀመረች ደቡብ ኮሪያ ለኔቶ አባል ሃገር ለሆነችዉ ለፖላንድ በመቶዎች የሚቆጠሩ ታንኮችን፣ የጦር አውሮፕላኖችን እና ሌሎች የጦር መሣሪያዎችን ለመስጠት ውል ተፈራርማ ነበር። ከዚህ ሌላ በጦርነት ለተጎዳችዉ ለዩክሬንም ሰብዓዊ እርዳታ ልካ እንደነበር የሚታወስ ነዉ።

መካከለኛው ምሥራቅ፤ የብሊንከን ጉብኝት

የዩናይትድ ስቴትስ የውጭ ጉዳይ ሚኒስትር አንቶኒ ብሊንከን በእስራኤልና በፍልስጤማውያን መካከል እየተባባሰ የመጣዉን ግጭት ለማረጋጋት ወደ መካከለኛዉ ምሥራቅ ጉዙዋቸዉን ዛሬ ሰኞ ከካይሮ ግብፅ መጀመራቸዉ ተነገረ። የዋሽንግተኑ ከፍተኛ ዲፕሎማት አንቶኒ ብሊንከን ካይሮ ላይ ከግብፅ ፕሬዚዳንት አብደል ፋታ አል ሲሲ ጋር ተገናኝተዉ ተነጋገረዋል ተብሏል። ብሊንከን በመቀጠል "ውጥረትን ለማስወገድ እና እርምጃዎችን ለመውሰድ ወደ እስራኤል እና ወደ ፍልስጤም እንደሚጓዙ የዩናይትድስቴትስ የዉጭ ጉዳይ ሚኒስትር ያወጣዉ መግለጫ ያሳያል። ባለፈዉ ሳምንት የእስራኤል ጦር በምዕራባዊ ዮርዳኖስ ወንዝ ዳርቻ በሚገኝ አንድ የስደተኞ መጠለያ ሰፈር በከፈተዉ ተኩስ አስር ፍልስጤማዉያን መገደላቸዉ ይታወቃል። ባለፈዉ አርብ እንዲሁ አንድ ፍልስጤማዊ ታጣቂ እየሩሳሌም ዉስጥ ባስነሳዉ ተኩስ ሰባት እስራኤላዉያንን መግደሉ ይታወሳል። በመካከለኛው ምስራቅ የዲፕሎማሲ ስራ ዩናይትድ ስቴትስ በታሪክ ግንባር ቀደም ብትሆንም፤ ከእስራኤል ጋር ግንኙነት ያላት ግብፅ በመካከለኛው ምስራቅ ግጭት አስታራቂ ሆና ለረጅም ጊዜ ማገልገልዋ ይታወቃል።

ቱርክ ኤርዶጋን ለስዊድን እና ፊላንድ ያላቸዉ መልስ ይለያያል

የቱርክ ፕሬዚዳንት ሬቺፕ ታይፕ ኤርዶጋን ስዊድን እና ፊንላንድን ወደ ሰሜን አትላንቲክ ጦር ቃል ኪዳን ሃገራት ማለትም ከኔቶ ጋር ለመቀላቀል በሚያደርጉት ጥረት ላይ ያላቸዉ አቋም የተለያየ መሆኑን ለመጀመርያ ጊዜ በይፋ ተናገሩ። እንደ ኤርዶጋን አገላለፅ ከሆነ፣ ቱርክ ለስዊድን የምትሰጠዉ መልስ ከፊንላንድ ቢለይ ስቶክሆልም የሚገኘዉ መንግሥት ይደነግጣል ሲሉ ሃገራቸዉ ቱርክ ፊላንድ ኔቶን እንድትቀላቀል ልትደግፍ እንደምትችል ተናግረዋል። ፕሬዝዳንት ኤርዶዋን የፊላንድ አጎራባች የሆነችዉ ስዊድን ቱርክ በአሸባሪነት የፈረጀችዉ የቱርክ ታጣቂ ቡድን አባላትን አሳልፋ አልሰጠችም ሲሉ ይከሳሉ። ፕሬዚዳንቱ በዚህም ምክንያት ስዊድን ወደ ኔቶ ለመቀላቀል ያቀረበችዉን ጥያቄ እንደማይቀበሉ ተናግረዋል። ኤርዶጋን ስዊድን ኔቶን መቀላቀል ከፈለገች የያዘቻቸዉን እና ቱርክ ባሸባሪነት የፈረጀቻቸዉን የቱርክ ታጣቂዎች አሳልፋ እንድትሰጥ ጠይቀዋል። ስዊድን እና ፊላንድ ሩስያ በዩክሬን የጀመረችውን ጦርነት ተከትሎ ኔቶን ለመቀላቀል በጋራ ማመልከታቸዉ ይታወቃል። ኔቶን ለመቀላቀል የአባል ሃገራቱ ሙሉ ስምምነት የሚያስፈልጋቸዉ ፊላንድ እና ስዊድን ለወራቶች በቱርክ ይሁንታ ማጣት አሁንም ኔቶን መቀላቀል አለመቻላቸዉ ይታወቃል። AT/MS