ዓለም አቀፍ የምጣኔ ሃብት እና የማህበራዊ መድረኮች | ኤኮኖሚ | DW | 22.01.2004
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ኤኮኖሚ

ዓለም አቀፍ የምጣኔ ሃብት እና የማህበራዊ መድረኮች

በማህበራዊ ጉዳዮች ላይ ያተኮረው እና በህንድ ከተማ በሙባይ ሲካሄድ የሰነበተው ዓለም አቀፍ መድረክ ትላንት ተጠናቀቀ ። ምንም ውሳኔዎችን ሳያስተላልፍ የተጠናቀቀው ይኸው መድረክ ድንበር የለሹን የኤኮኖሚ ስርዓት የሚቃወም ሲሆን ሰልፍም ተካሂዶበታል ። በሌላ በኩል ብልፅግና እና ፀጥታ በሚል መሪ መፈክር ዓለም አቀፉ የምጣኔ ሃብት መድረክ በስዊዘርላንድ የመዝናኛ ደሴት በዳቮስ ትላንት ተጀምሯል ።

ድንበር የለሹ የኤኮኖሚ ስርዓት መኖር የለበትም የሰውን ልጅ ሰብአዊ መብት ይጻረራል በሚል ተቃውሞው እየተጋጋለ የመጣው እአአ በ1999 ዓ.ም ነበር ። የተዳቀሉ እና ሰው ሰራሽ ምግቦች በነጻው የገበያ ስም ወደ ታዳጊው ዓለም እንዳይሰራጭ እንዲሁም የስደተኞች መብትን ዋናው መነሻ አድርጎ ከሲያትል የተጀመረው ይህ ተቃውሞ ዛሬ የልዩ ልዩ መድረኮችን አጀንዳ ይጋራል ። እ.አ.አ በ2001 ዓም መካሄድ የጀመረው ዓለም አቀፉ የማህበራዊ መድረክም ከውልደቱ ጀምሮ ድንበር የለሹን የኤኮኖሚ ስርዓት እንደተቃወመ ነው ። አንድ መቶ ሺ ሰዎች ከአንድ መቶ ሃምሳ ሁለት ሃገራት የተካፈሉበት የሰሞኑ መድረክም ይህንኑ የድንበር የለሽ የንግድ ስርዓት ሲቃወም ሰንብቷል ። በተለይ ትላንት ጉባኤው ሲጠናቀቅ ጉባኤውን ያስተናገደችው እና ቀድሞ ቦንቤ በመባል ስትጠራ የነበረችው ሙባይ ከተማ በበርካታ ሺ ሰልፈኞች ተጣባ ነበር ። ሰልፈኞቹ የተቃወሙት ድንበር የለሹን የንግድ ስርዓት ብቻ አልነበረም ። የፕሬዝዳንት ጆርጅ ቡሽን ምስል በትላልቅ ሰሌዳ ለጥፈው የወጡት ሰልፈኞች የኢራቅን ጦርነት መቃወማቸውን ይገልፁ ነበር ። ዩናይትድስቴትስ እና ብሪታንያ ከኢራቅ ምድር እንዲወጡ ጠይቀዋል ። ቶኒ ብሌርን እና ጆርጅ ቡሽን ሰው በላ ጨካኞች ብለዋቸዋል ።

ለስድስት ቀን የተካሄደው የማህበራዊ መድረክ ጉባኤ ዘንድሮ ሲካሄድ ለአራተኛ ጊዜ ነበር ። ላለፉት ሶስት ተከታታይ ዓመታት ጉባኤውን ያስተናገደችው የብራዚላዊቷ ከተማ ፖርቶ አልጌር ነበረች ። ዘንድሮ ወደ ህንዷ ከተማ ሙንባይ እንዲዛወር የተደረገበት ምክንያት የድንበር የለሹን ስርዓት ተቃውሞ በእስያ ውስጥ የበለጠ ለማጠናከር እንደሆነም ተነግሮለታል ። ጉባኤው ከኢራቅ ጉዳይ እስከ ግብርና ምርት ሲመክር እና ሲዘክር ቢሰነብትም የተጠናቀቀው የአቋም መግለጫ ወይም ውሳኔዎችን ሳያስተላልፍ ነው ። የማህበራዊው መድረክ በሙባይ ከተማ ሲጠናቀቅ ዓለም አቀፉ የምጣኔ ሃብት መድረክ ደግሞ በስዊዘርላንዷ የመዝናኛ ከተማ በዳቮስ በተመሳሳይ ቀን ተጀምሯል ። ይህኛው መድረክ ግን የዓለም የንግድ እና የምጣኔ ሃብት ምን ያህል አድጓል የሚለው ጥያቄ የሚያስደስታቸውን የዓለም ልዑካን አሳትፏል ። የመድረኩ መስራች እና ሊቀመንበር ክላውስ ሽዋብ እንደተናገሩት በዓለም ፀጥታ እና ሰላም ከሌለ ብልፅግና የለም ። ብልፅግና ከሌለም ሰላም የለም ። ስለሆነም ይላሉ ሊቀመንበሩ የዳቮስ ጉባኤ ቀመር ፀጥታ ሲደመር ብልፅግና ሲደመር ሰላም ነው ።

በዚህ ቀመር የተጀመረው ጉባኤ የዓለምን የኤኮኖሚ እድገት ይመረምራል ፤ የንግድ ስርዓቱ አካሄድን ይገመግማል ። የኤኮኖሚ ጠበብቶች እንደሚሉት ባለፈው የአውሮጳውያን ዓመት ብልፅግና የታየባቸው ሃገሮች ተብለው የሚወሰዱት ቻይና እና ዩናይትድስቴትስ ናቸው ። የእስያ ቁንጮ ለመሆን እየበቃች ያለችው ቻይና የስምንት ነጥብ አምስት በመቶ የኤኮኖሚ ዕድገት አስመዝግባለች ። በአንጻሩ የዩናይትድስቴት ኤኮኖሚ የበለፀገ ነው ቢባልም የዋዠቀ ኤኮኖሚ በመሆኑ ከራሱ አልፎ በዓለም የምጣኔ ሃብት ዕድገት ላይ ተፅዕኖ እያመጣ ነው ። በበገባችበት ጦርነት እና በምትከተለው የበጀት አጠቃቀምብክንተ የተነሳ የተረጋጋ ኤኮኖሚ አላት ማለት እንደማይቻል ባለሙያዎቹ ጨምረው ገልፀዋል ። በኤኮኖሚ ዕድገት በዓለም የሁለተኝነቱን ተርታ ይዛ የምትገኘው ጃፓንም ባለፈው ዓመት በሁለት በመቶ ዕድገት ማሳየቷ ሲገለፅ በዚህ ዓመትም ዕድገቱ ሊቀጥል ይችላል ተብሏል ። ሆኖም ይህ ሊሆን የሚችለው ያለባትን የበጀት እጥረት ለማስወገድ ጥረት ካደረገች ብቻ ነው ። እንደ ምጣኔ ሃብት ጠበብቶቹ ትንተና የአውሮጳ ክፍለ ዓለም በአዝጋሚ የኤኮኖሚ ዕድገት ውስጥ ትገኛለች ። ምክንያቱ የአውሮጳ ህብረት አባል ሃገራትን ያስተሳሰረው የጋራ ገንዘብ የዩሮ ምንዛሬ ዋጋ ከሚገባው በላይ መጨመር ነው ። በሌላ በኩል የመስከረም አንዱን የአሸባሪዎች አደጋ ተከትሎ ወድቆ የነበረው የባንኮች ፣ የዋስትና ኩባንያዎች እና የበጀት ተቆጣጣሪ ድርጅቶች የተሻለ ሥራ እና ዕድገት እያሳዩ እንደመጡ ተነግሯል ። ዕድገቱ መኖሩ ጥሩ ነው የሚሉት እና በዳቮስ ጉባኤ የህዝብ ዓይን ሆነው የተቆጠሩት መንግስታዊ ያልሆኑ ድርጅት ተወካዮች ግን ዕድገቱ የሰው ልጆችን ሰብአዊ መብትም ያከበረ እንዲሆን ይሻሉ ። የህዝብ ዓይንነታቸውን ለማሳየትም በጉባኤው ላይ ይህን ማንፀባረቃቸው ይጠበቃል

ተዛማጅ ዘገባዎች