ኢትዮጵያ በሪያዱ ጀናድሪያ ፌስቲቫል | ዓለም | DW | 26.02.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
ማስታወቂያ

ዓለም

ኢትዮጵያ በሪያዱ ጀናድሪያ ፌስቲቫል

በሳዑዲ ዓረቢያ መዲና ሪያድ በየዓመቱ የሚከበረው የጀናድሪያ የባህል የታሪክ እና የቅርስ ፌስቲቫል ከአንድ ሚሊዮን በላይ የሀገር ውስጥ እና የውጭ ሀገር ጎብኚዎችን ያስተናገዳል፡፡ በዘንድሮው ሰላሳ ሁለተኛው ፌስቲቫል ኢትዮጵያ ለመጀመሪያ ጊዜ ሪያድ በሚገኘው ኤምባሲዋ እና በሪያድና አካባቢው በሚኖሩ ኢትዮጵያዊያን ተወክላ ለሶስት ቀናት ተሳትፋለች፡፡

አውዲዮውን ያዳምጡ። 03:34

የጀናድሪያ ፌስቲቫል ከሚሊዮን በላይ ጎብኚ አለው

በሰሜናዊ ሪያድ አርባ ሁለት ኪሎ ሜትር ርቀት ላይ በሚገኘው የጀናድሪያ አካባቢ በሚገኝ እጅግ ሰፊ ቦታ ላይ ነው ዓመታዊው የጀናድሪያ ፌስቲቫል የሚከበረው፡፡ መጠሪያውንም ያገኘው ከሚከበርበት ቦታ ላይ ነው፡፡ አዘጋጆቹ ይፋ እንዳደረጉት እስከ አንድ ሚሊዮን የሚጠጋ ጎብኚ በሶስት ሳምንት ቆይታው ጀናድሪያን ተመልክቷል፡፡ በተለይ አስከምሽቱ ስድስት ሰዓት ጀናድሪያ በሰው እንደተጨናነቀች ሶስት ሳምንት ሰንብታለች፡፡ ንጉስ ሰልማን ቢን አብዱል አዚዝም አንዱን ምሽት ከነ ቤተሰቦቻቸው ታዳሚ ነበሩ፡፡

ሳዑዲ ዓረቢያ እንደ ታላቅ ክስተት በምትወስደው ዓመታዊው የጀናድሪያ ፌስቲቫል ጥንታዊ ታሪክ እና ባህሏን ከዘመናዊ ስልጣኔዋ ጋር ጎን ለጎን ይዛ ትቀርባለች፡፡ ከጥንታዊ ግመሎቿ እስከ ዘመናዊ አውቶ ሞቢሎቿ በአካልም በፎቶ ግራፍም ይታደማሉ፡፡ ከጥንታዊው ጦር እና ጎራዴ እስከ ዘመናዊ ሚሳይል እና ብረት ለበስ ታንኮቿ ጭምር የፌስቲቫሉ አካል ነበሩ፡፡ 

በዲፕሎማሲው መስክ ያለፉባቸውን ጉዞም ሆነ ዛሬ የደረሱበትን ደረጃ ፤ በጉምሩክ እና አደንዛዥ እጽ ቁጥጥር እና ክትትል ከባህላዊው ጀምሮ ዛሬ እስከደረሱበት ስልጡን እና ብቁ የተባሉ አነፍናፊ ውሾቻቸው ድረስ በአካል አቅርበው ለታዳሚው አሳይተዋል፡፡ 

ያለፈው ዓመት የክብር እንግዳ ጀርመን ነበረች ፡፡ የዘንድሮዋ ህንድ ነች ፡፡ የክብር እንግዳው ሰፊ ቦታ ይዞ ሶስቱንም ሳምንት ጎብኚዎችን ይቀበላል፡፡ ሌሎች ሀገሮች ደግሞ እንደየ ቀረቤታቸው ለሶስት ቀናት ቦታ ይሰጣቸዋል ፡፡ ለኢትዮጵያም የመጨረሻዎቹ ሶስት ቀናት ተሰጥተዋታል ፡፡ የመጨረሻዎቹ ቀናት ጎብኚ የሚጎርፍባቸው በመሆኑ ለኢትዮጵያ መልካም አጋጣሚ ነበር የሆነላት፡፡ አምባሳደር አሚን አብዱል ቃድር በሳዑዲ ዓረቢያ የኢትዮጵያ መንግስት ልዩ መልዕክተኛ እና ባለ ሙሉ ስልጣን አምባሳደር ናቸው፡፡ ስለ ኢትዮጵያ ተሳትፎ ማብራሪያ አላቸው።

አቶ መሀመድ ሀሰን የጀናድሪያ ፌስቲቫል ሲመሰረት ጀምሮ እዚሁ ሪያድ ነበሩ፡፡ ባለፉት 32 ዓመታትም በየ ዓመቱ ይመጡ ነበር ዘንድሮ ኢትዮጵያ ቦታ በማግኘቷ ተደስተዋል፡፡ አቶ ሻወል ጌታሁን ደግሞ ዋና ጽህፈት ቤቱ አዲስ አበባ የሆነውን የቱሪዝም እና የጉዞ ወኪላቸውን ለማስተዋወቅ መልካም አጋጣሚ እንደፈጠረላቸው ይናገራሉ፡፡

በሰላሳ ሁለተኛው የጀናድሪያ ፌስቲቫል ለመጀመሪያ ጊዜ የተሳተፈችው ኢትዮጵያም ሪያድ በሚገኘው ኤምባሲዋ በኩል የኢትዮጵያ ኮሚኒቲ ማህበርን የኢትዮጵያ ዓለም ዓቀፍ ትምህርት ቤትንም ሆነ በሪያድ እና አካባቢው የሚኖሩ ኢትዮጵያዊያንን በማስተባበር ለሶስት ቀናት ተሳትፎ አድርጓል፡፡ በተለይ የቡና ስነስርዓቱ እና የተማሪዎቹ ባህላዊ ውዝዋዜ የብዙዎቹን ጎብኚዎች ቀልብ የሳበ ነበር ፡፡ 

ሙሉ ዘገባውን ለማድመጥ የድምጽ ማዕቀፉን ይጫኑ። 

ስለሺ ሽብሩ 
ነጋሽ መሐመድ 
 

Audios and videos on the topic