አፍሪቃ እና የአደንዛዥ እፅ ዝዉዉር | አፍሪቃ | DW | 16.10.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

አፍሪቃ

አፍሪቃ እና የአደንዛዥ እፅ ዝዉዉር

ዚምባቡዌ ላይ የአደንዛዥ እፅ ዝዉዉርና አጠቃቀምን አስመልክቶ የሚካሄደዉ ጉባኤ፤ መሪዎቹ ወሳኝ ርምጃ ካልወሰዱ የአህጉሩን መረጋጋት ሊጎዳ እንደሚችል አመለከተ። የምዕራብ አፍሪቃ የኤኮኖሚ ማኅበረሰብና በተመድ የእፅ ተከታታይ ጽ/ቤት አፍሪቃ ዉስጥ ሕገ ወጥ የአደንዛዥ እፅ ዝዉዉርን ለመግታት የሚያስችል አዲስ ርምጃ ላይ እየመከሩ ነዉ።

የአፍሪቃ ኅብረት የማኅበራዊ ጉዳይ ኃላፊ ዶክተር ኦላዋሌ ማየጉን እንደሚሉት አፍሪቃ በአህጉር ደረጃ የHIV ቫይረስ ስርጭትን ለመግታት ባደረገችዉ ጥረት ዉጤት እንዳስመዘገበች ሁሉ፤ ቀጣይ ዘመቻዋን ሕገ ወጥ የአደንዛዥ እፅ ዝዉዉርንና አጠቃቀምን መግታት መሆን ይኖርበታል፤

«የበሽታዉ ስርጭት በአዲስ መልክ ይነሳል የሚል ፍራት ከኖረ ሊሆን የሚችለዉ የአደንዛዥ እፅ ተጠቃሚዎችን በመርፌ በመዉጋት ነዉ የሚሆነዉ። ከሕገ ወጥ የእጽ ዝዉዉርና ከተደራጀ ወንጀል የሚገኘዉን በርካታ ገንዘብ ዴሞክራሲና መልካም አስተዳደርን ለማደናቀፍና ምርጫዎችን ለማወክ እያዋሉት ነዉ። በድፍረት ዴሞክራሲን ለማደናቀፍና ወደኤኮኖሚያችን ገብቶ የሚፈጥረዉን ዝብርቅርቅ ለማስወገድና ም በተደራጀ ወንጀል የሚገኝ ገንዘብን አንድ ነገር ማድረግ ይኖርብናል። በማሊና ጊኒ ባሳዉ የተፈጠረዉን ትርምስ መዉሰድ ይቻላል።»

Drogenkonsum Dänemark

ዴንማርክ፤ የአደንዛዥ እፅ ተጠቃሚ

ይህን መሰሉን ሕገ ወጥ የአደንዛዥ እፅ ዝዉዉርና አጠቃቀም ለመግታትም አፍሪቃ እና የተመድ በጋራ ጥረት ጀምረዋል። ዶክተር ማይየጉን በኬንያ ዋና ከተማ በቅርቡ በአንድ የገበያ አዳራሽ ዉስጥ የተፈጸመዉ ጥቃት የተደራጀ ወንጀል አፍሪቃን መረጋጋት ስጋት ላይ የሚጥል ታላቅ ፈተና የመሆኑ ማረጋገጫ ነዉ። ናይጀሪያዊዉ ማይየጉን የአፍሪቃ ኅብረት የአደገኛ እፅ ቁጥጥር እና ወንጀል መከላከል የተግባር እቅድ አስፈጻሚ የሆነዉ የኅብረቱ ኮሚሽን አባል ናቸዉ። ዶክተሩ ወንጀለኞች የአፍሪቃ ሃገራትን ክፍት ድንበሮችና ከፍተኛ ደረጃ ላይ የደረሰዉን ድህነት ይጠቀማሉ ባይ ናቸዉ። ወደአዉሮጳና ምዕራብ ሃገራት የሚጓዘዉ አደንዛዥ እፅ መሸጋገሪያም አፍሪቃ መሆኗን ያመለክታሉ።

«ከደቡብ አሜሪካ የሚመጣዉ ኮኬይን በአብዛኛዉ በምዕራብ አፍሪቃና ጥቂቱ ደግሞ በደቡብ አፍሪቃ በኩል ነዉ የሚያልፈዉ። ከአፍጋኒስታን የሚመጣዉን ሄሮይን ብንወስድ ደግሞ የሚያልፈዉ በምስራቅ አፍሪቃ በኩል ነዉ። አፍሪቃ ዉስጥ ከግጭት ወጥተዉ ያልተጠናከሩ በርካት ሃገራት መሸጋገሪያ እየሆኑ ነዉ። አንዳንድ አደንዛዥ እፆችም እዚያዉ ይቀራሉ። ስለዚህ በአህጉሪቱ የሚታየዉ የአደንዛዥ እፅ አጠቃቀምም በእነዚህ በሚቀሩት ላይ የሚመሠረት ነዉ።»

Koka Anbau in Bolivien Archiv 2006

የቦሊቪያ የኮካ ተክል

በጉባኤዉ የተገኙት የተመድ የአደንዛዥ እፅ ክትትል ቢሮ ኃላፊ ሻብ ሳላህ ለተሰብሳቢዎቹ ያመለከቱት ጽሕፈት ቤታቸዉ በዓለም ዓቀፍ ደረጃ ሕገወጥ የአደንዛዥ ዝዉዉርና አጠቃቀምን በመዋጋት ሂደት ያካበተዉን ልምድ አፍሪቃ ዉስጥም ለማዋል እንደሚሻ ነዉ።

«የተመድ የአደንዛዥ እፅ ቁጥጥር ጽህፈት ቤት፤ አፍሪቃ ለልማት ማለትም በመላ አህጉሪቱ የትምህርት፣ የኤኮኖሚ እድገት እና የጤና ችግሮች ዋነኛ እንቅፋት የሆነባትን ችግር ይገነዘባል። አፍሪቃ ዉስጥ የአደንዛዥ እፅ መጠቀም በተለይም በወጣቶች ዘንድ በፍጥነት እየተስፋፋ በመሄድ ላይ ነዉ። የተመድ የአደንዛዥ እፅ ቁጥጥር ጽህፈት ቤት አባል ሃገራት የአደንዛዥ አጠቃቀም፤ ዝዉዉር፣ ሙስናና አሸባሪነትን የመታገል ጥረትና አቅማቸዉን እንዲያጠናክሩ የቴክኒክ ድጋፍ ያደርጋል።»

ከመላዉ አፍሪቃ የተለያዩ መንግስታትን ሚኒስቴር መስሪያ ቤቶች በመወከል በጉባኤዉ የተገኙ ባለሙያዎች፤ ወደአህጉሪቱ የሚዘልቀዉን የአደንዛዥ እፅ አቅርቦት ለመቀነስ የታየዉ ተነሳሽነት ተስፋ እዳሳደረባቸዉ እየገለጹ ነዉ።

ኮሎምበስ ማቩንጋ
ሸዋዬ ለገሠ

አርያም ተክሌ

Audios and videos on the topic