በኢራቅ የነዳጅ ዘይት ላይ የሚደርሰው ጥቃት | ኤኮኖሚ | DW | 01.09.2004
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ኤኮኖሚ

በኢራቅ የነዳጅ ዘይት ላይ የሚደርሰው ጥቃት

በኢራቅ የሽምቅ ተዋጊዎች በነዳጅ ዘይት ማስተላለፊያ ቧንቧ ላይ የሚፈፀመው ጥቃት ተደጋጋሚ ተግባር ሆኗል ። ባሳለፍነው የሳምንት መጨረሻም በደቡባዊው ክፍል በሚገኝ የነዳጅ ማከማቻ ላይ ጥቃት ተፈጽሞ ነበር ። ድርጊቱ በአሁኑ ወቅት ለኢራቅ ብቸኛ የገቢ ምንጭ የሆነውን የነዳጅ ገበያ የሚያስተጓጉል ነው ።

በኢራቅ በነዳጅ ዘይት ማከማቻ እና ማስተላለፊያ ቧንቧ ላይ ጥቃት መፈፀም እንደ ኢራቃውያን ሞት እንደውጭ ዜጎች መታገት ተደጋጋሚ ተግባር ሆኗል ። ቁጥሩ በትክክል ተለይቶ ባይታወቅም ዩናይትድስቴትስ መራሹ ጦርነት ከተጀመረ አንስቶ መቶ ያህል ጥቃቶች በነዳጅ ዘይት ሃብት ላይ ተፈፅሟል ። የነዳጅ ዘይት መስሪያ ቤቶች እና ነዳጅ ጫኝ መኪናዎች የጥቃቱ ዒላማዎች ነበሩ ። ናቸውም ። የሚታለመው እና የሚቀነባበረው ጥቃት ዩናይትድስቴትስን እስከ ደጋፊዎቻ እና የኢራቅ ባለስልጣናትን ዒላማ ቢያደርግም የሃገሪቱን ብቸኛ ገቢ እየጎደ ነው ። ከህዝቡ ሃምሳ በመቶው ሥራ አጥ እንደሆነ ፤ ሃገሪቱም በአንድ መቶ ቢሊዮን ዶላር የሚገመት ዕዳ ውስጥ እንደተዘፈቀች የመቆየት ዕድሏን የሚያጠናክር ነው ።

አምና የዩናይትድስቴትስ ጦር የኢራቅን በወረረበት የመጀመሪያዎቹ ጊዚያት የሳዳም ሁሴን መንግስት የሰባት የነዳጅ ጉድጓዶችን ሥራ በማስተጓጎል እና እሳት በመለኮስ የወራሪውን ጦር ዒላማ ለማሰናከል ጥሮ ነበር ። ይህን ደግሞ የዩናይትድስቴትስ ባለስልጣናት አስቀድመው ጠብቀውታል ። እንደውም በጊዜው የደረሰው ጉዳት ከሚገመቱት ያነሰ ነበር ። የተዘጋጁበት ይህን ጥቃት ለመከላከል አስቀድሞ የተነደፉ ስልቶች ቢኖሩም ጥቃቱን ለማስቆም አልተቻላቸውም ። ሰባት ሺ ኪሎ ሜትር ርዝመት ያለው የነዳጅ ዘይት ማስተላለፊያ ቧንቧን ለማስጠበቅ አሁንም ጥረት ያደርጋል ። በባስራ ፣ በባግዳድ እና ከባግዳድ ሰሜናዊ ምስራቅ በምትገኘው በባዶጂ የሚገኙትን ሶስት ዋና የነዳጅ ጉድጓዶችን አያያዝ ለማሻሻል እድሳቶች ተደርገዋል ። ከነዚህ የነዳጅ ጉድጓዶች የሚገኘው ምርት የሃገር ውስጥ ፍጆታን እየሸፈነ መሆኑን ባለስልጣናት ይናገራሉ ።

አብዛኛው የኢራቅ የነዳጅ ሃብት የሚገኘው በደቡባዊ ክፍለ ነው በተለይም ከባግዳድ ሰሜናዊ ክፍል የምትገኘው የኪርኩክ ከተማ ሶስት እጁን የነዳጅ ሃብት በመያዝ ትታወቃለች ። ሆኖም ከኪርኩክ ወደ ቱርክ የሚሸጋገረው የነዳጅ ዘይት ቧንቧ በየጊዜው የደፈጣ ተዋጊዎች እና አሻጥር ፈጻሚዎች ጥቃት ሲደርስበት አብዛኛውንም ጊዜ ሥራው ቆሟል ። የነዳጅ ቧንቧው የሚያልፈው ደግሞ የሳዳም ሁሴን ደጋፊዎች የሱኒ ጎሳ አባላት ተጠናክረው በሚገኙበት ነው ። ሁለተኛው የኢራቅ ከተማ የባስራ የነዳጅ ቧንቧዎችም የደፈጣ ተዋጊዎቹ ጥቃት ሰለባዎች ናቸው ። እስከአለፈው ሰኔ ድረስ የኢራቅ የነዳጅ ሚኒስትር ሆነው የቆዩት ኢብራሂም ባህሩል ኡሉም እንዳሉት በኪርኩክ እና በባስራ ከአስር እስከ አስራ አንድ የሚደርሱት ጥቃቶች የተፈፀሙት ፀረ መንግስት አቋም ባላቸው የሱኒ ጎሳ አባላት ነው ። የጠቅላይ ሚኒስትር ኢያድ አላዊ መንግስት ከዚህ ጎሳ ጋር የሰላም ድርድር ሙከራዎች ማድረጉንም ኡሉም ገልፀዋል ። እንደሳቸው እምነት ከጎሳ አባላቱ ጋር መደራደር ይቻላል ፤ ሆኖም ዋናው መፍትሄ የሃገሪቱን ፀጥታ ማስከበር ነው ። ኡሉም በስልጣን ላይ በነበሩበት ወቅት እንደሚያውቁት የነዳጅ ቧንቧዎች እና ማምረቻዎችን ለማስጠበቅ አስራ አራት ሺ ጠንካራ የፀጥታ አስጠባቂ ሃይል ተሰማርቷል ። ይህንኑ የፀጥታ አስከባሪ ሃይል በእጥፍ ለማሳደግም እቅድ ነበር ።

ኢራቅ አንድ ሺ አምስት መቶ የነዳጅ ማከማቻ ጉድጓዶች እንዳሏት ይገመታል ። እነዚህን ሁሉ የነዳጅ ጉድጓዶች ማስጠበቅ በርግጥ አይቻልም ። መንግስት የፀጥታ ጥበቃውን ከማስከበሩ ጎን የነዳጅ ማከማቻ ጉድጓድ ፣ የነዳጅ ማስተላለፊያ ቧንቧ እና የሌሎች ግንባታዎች ጥገና ለማድረግ እቅድ አለው ። የነዳጅ ሚኒስቴር መስሪያ ቤቱ ለዘንድሮው የአውሮጳውያን ዓመት ከሰባት መቶ እስከ ስምንት መቶ ሚሊዮን ዶላር በጀት አስፈልጎት ነበር ። ሆኖም የጥምሩ ጊዚያዊ መንግስት እስከ አለፈው ሰኔ ድረስ ገቢ ያስገኘው ከገመተው ከግማሽ በታች ነው ። በሌላ በኩል የኢራቅ ባለስልጣናት የነዳጅ ኢንዱስትሪውን ምዋለ ንዋይ ለማስፋፋት ከተለያዩ የነዳጅ ኩባንያዎች ጋር ስምምነት ተፈራርመዋል ። በርግጥ በዘርፉ የውጭ ኩባንያዎች ተሳትፎ እየጨመረ ነው ። ምንም እንኳን ከፍተኛ ፍላጎት በኢራቅ ፤ ከኢራቅም በነዳጇ ላይ ቢያሳድሩም ይፈራሉ ። የሃገሪቱ የፀጥታ አስተማማኝነት ስጋታቸውን ያበረታዋል ። የፀጥታ እና የደህንነት ዋስትና ኢራቅን ርቋታል እና ።

  • ቀን 01.09.2004
  • አዘጋጅ sdesta
  • ያትሙ ገፁን ያትሙ
  • Permalink https://p.dw.com/p/E0fP
  • ቀን 01.09.2004
  • አዘጋጅ sdesta
  • ያትሙ ገፁን ያትሙ
  • Permalink https://p.dw.com/p/E0fP