ናይጀሪያና ፀረ የሕፃናት ሴት ልጆች ጋብቻው ትግል

በአሁኑ ጊዜ በናይጀሪያ ሕግ መወሰኛ ምክር ቤት የሀገሪቱን ሕገ መንግሥት የማሻሻል ስራ ተጀምሮዋል። በዚህም መሠረት ልጃገረዶች ከተዳሩ በኋላ ዕድሜአቸው ለአካለ መጠን ባይደርስም ለአካለ መጠን እንደደረሱ ይቆጠራል የሚለውን አንቀፅ ለማሻር ጥረት የተደርጎ፣ ከእንደራሴዎቹ መካከል ሁለት ሦስተኛው ደግፈውት ነበር፦ ግን፣ የሕግ መወሰኛው ምክር ቤት እንደራሴ አህመድ የሪማ ሕፃናት ሴቶች ለአካለ መጠን ሳይደርሱ መዳር የለባቸውም የሚለውን ሀሳብ የደገፉት እንደራሴዎች ይህንኑ ውሳኔአቸውን እንዲቀይሩ ለማግባባት ችለዋል። አስገራሚው ነገር የ 53 ዓመቱ እንደራሴ የሪማ ራሳቸው የ 13 ዓመት ግብፃዊት ማግባታቸው ነው። የሪማ የ13 ዓመት ሴት ሕፃን ናት ብለው አያምኑም።

« በእሥልምና ሕግ መሠረት፣ ማንኛዋም ትዳር የምትመሠርት ሴት ለአካለ መጠን ደርሳለች። ለአካለ መጠን አልደረሰችም ካላችሁ እሥላማዊውን ሕግ ትፃረራላችሁ። »

የናይጀሪያ ማዕከላይ መንግሥት ለሀገሪቱ ሕፃናት ከለላ የሚሰጥ ሕግ አውጥቶዋል። በሕጉ መሠረት፣ ከ 18 ዓመት በታች የሆነ ሁሉ እንደ ሕፃን ስለሚቆጠር ከለላ ሊደረግለት ይገባል። በዚህም የተነሳ ትዳር ሕጋዊ የሚሆነው የሚዳረው ልጅ ከ 18 ዓመት በላይ ሲሆን ብቻ ነው ይላል። ይሁንና፣ አንዳንድ የናይጀሪያ ፌዴራዊ ግዛቶች ሕጉን ተግባራዊ አላደረጉም። እንደራሴ የሪማ በብዛት ሙሥሊሞች በሚኖሩበት በሰሜናዊ ናይጀሪያ የሚገኙት ግዛቶች አሁንም የሸሪዓን ሕግ የሚከተሉበትን አሰራር እንደ መከራከሪያ ሀሳብ አቅርበዋል።

የመብት ተሟጋቿ ጆ ኦኬይ ኦዱማኪን ይህ ዓይነቱ ህሳብ እጅግ እንደሚያስቆጣቸው ይናገራሉ።

« ሀይማኖትን እኛን ለመከፋፈያ ሊጠቀሙበት የሚፈልጉትን በግልጽ መቃወም አለብን። ይኸው ጉዳይ በናይጀሪያ ድረ ገፆች ብዙ ክርክር አስነስቶዋል። አንዳንድ የየንተርኔት ተጠቃሚዎች ለአካለ መጠን ያልደረሱ ሕፃናት ሴቶችን መዳር በሀገሪቱ እየተስፋፋ መጥቶዋል ያሉትን ሴተኛ አዳሪነትን ለመቀነስ እንደሚያስችል ገልጸዋል። በናይጀሪያ የስራ አጥነቱ መጠን በጣም ከፍ በማለቱ ውጣት ሴቶችን ለዝሙት ይዳርጋል። በነዳጅ ዘይት ሀብት የታደለችው ናይጀሪያ መንግሥት ከዚሁ ተፈጥሮ ሀብት ሽያጭ የሚያገኘውን ገቢ ለስራ ቦታ ፈጠራ ቢጠቀምበትም፣ የስራ አጡ መጠን ከ50% በላይ ደርሶዋል።

ሴቶችን 18 ዓመት ሳይሞላቸው መዳር ሴተኛ አዳሪነትን ለመቀነስ ይረዳል የሚለውን ሀሳብ የመብት ተሟጋቿ ጆ ኦኬይ ኦዱማኪን የተሳሳተ ነው ይላሉ። #« እንደሚመስለኝ፣ የሕፃናት ጋብቻን የሚያራምዱት እነዚህ ግለሰቦች የራሳቸውን ልጆች ለአካለ መጠን ሳይደርሱ አይድሩም። »

ለሴቶች መብት የሚሟገቱት ኤኔ ኤዴም የኦዱማኪንን አባባል ይጋራሉ። አንድ ለአካለ መጠን ያልደረሰች ልጅ ለአንድ በዕድሜ ጠና ያለ ሰው የምትዳርበት ድርጊት ከለ አልባ ያደርጋታል ብለው ነው የሚያምኑት።

« አንዲት ለአካለ መጠን ያልደረሰች ልጅ ሥነ አዕምሮአዊው እና አካላዊው ዕድገት ከሌላት እንዴት ነው ከትዳር የሚጠበቀባትን ኃላፊነት ልትወጣው የምትችለው። ይህን ጉዳይ በጥሞና ልንመለከተው ይገባል ብዬ አስባለሁ። እና የእንደራሴ የሪማ ርምጃ ለአካለ መጠን ያለደረሰች ሴት በሕይወቷ ልትደርስበት የምትችለውን እንዳትደርስ ዕድሏን የሚነፍግ ሆኖ አየዋለሁ። »

ኤዴ ይህን ያሉት ከራሳቸው ተሞክሮ በመነሳት ነው። በ 11 ዓመታቸው ነበር በዕድሜ በሦስት እጥፍ ለሚበልጡዋቸው ሰው የተዳሩት። ትዳር በልጅነት አንዲትን ልጅ ሕይወቷን እንደፈለገችው መምራት የምትችልበትን መብቷን ይነፍጋል።

ጉዳዩ በናይጀሪያ ብርቱ ክርክር እና ተቃውሞ በማስነሳቱ የሀገሪቱ ሕግ መወሰኛ ምክር ቤት የሴት ሕፃናት ጋብቻን ሕጋዊ ያደረገውን አንቀጽ ከሕገ መንግሥቱ እንዲሰረዝ የቀረበውን ጥያቄ እንደገና ለመመልከት ወስኖዋል።

አድሪያን ክሪሽ/አርያም ተክሌ

አዜብ ታደሰ