ሰላማዊ ሰልፍ በአዲስ አበባ

ግንቦት 25 ቀን 2005ዓም ሰልፈኞቹ 4ኪሎ ግንፍሌ አካባቢ ከሚገኘው የሰማያዊ ፓርቲ ዕህፈት ቤት ተነስተው ወደ ኢትዮ-ኩባ ወዳጅነት አደባባይ ነበር ያመሩት። በሺዎች የሚቆጠሩ ሰልፈኞች ተገኝተዋል።

«መንግስት በሐይማኖት ጣልቃ አይግባ»፣ «ሰብዓዊ እና ዲሞክራሲያዊ መብቶች ይከበሩ» እነኚህ እና ሌሎች የተለያዩ መፈክሮች ሲታዩ እና ሲሰሙ ነበር።

ከ97 የብሔራዊ ምርጫ በኋላ መንግስት ፍቃድ ሰጥቶ ሰላማዊ ሰልፍ ሲካሄድ የመጀመሪያው ነው። ሰልፉም በሰላማዊ መንገድ ተከናውኗል።

በርካታ የሀገር ውስጥ እና የውጭ ጋዜጠኞች በሰልፍ ላይ ተገኝተው ሰልፉን ሲከታተሉ አርፍደዋል።

በርከት ያሉ የሙስሊሙ ማህበረሰብ አባላት በዚህ ሰልፍ ላይ ተካፋይ ነበሩ። የታሰሩ የሐይማኖት አባላት ይፈቱ ሲሉም ጠይቀዋል።

ኢትዮጵያ ውስጥ የታሰሩት ተቃዋሚ ፖለቲከኞች እና ጋዜጠኞች እንዲለቀቁ የሚጠይቀው መፈክር።