یونانی بحران پر غور کے لیے یورپی رہنماؤں کا اجلاس

خبر رساں ادارے روئٹرز کے مطابق یور زون کے سربراہوں کی ایمرجنسی میٹنگ سے قبل یونانی حکومتی اہلکار کا کہنا تھا کہ یونان کی طرف سے بہتر بنائے گئے اس پروپوزل پر آج منگل سات جولائی کو ہونے والی سمٹ کے علاوہ کل بدھ کے روز بھی غور کیا جائے گا۔

یونانی حکومتی اہلکار کے مطابق ایتھنز حکومت چاہتی ہے کہ معاہدہ جلد سے جلد ہو جائے تاکہ یونانی بینکنگ نظام کے لیے رقوم کی فراہمی کا سلسلہ بحال کیا جا سکے۔

اس اہلکار کا نام ظاہر نہ کرنے کی شرط پر کہنا تھا، ’’پروپوزل میں اصلاحات، فنڈنگ، سرمایہ کاری پروگرام اور قرضے کے تصفیے سے متعلق شرائط کو بہتر بنایا گیا ہے۔‘‘

یونانی بحران پر غور کے لیے یورپی رہنماؤں کا اجلاس

یونان کے ریفرنڈم کے نتائج کی روشنی میں طلب کی گئی یورو زون کی سمٹ آج منگل کی شام شروع ہو رہی ہے۔ اِس سمٹ میں انیس رکنی یورو زون کے لیڈران شریک ہیں۔ یونانی وزیراعظم الیکسِس سِپراس بھی اس سربراہ اجلاس میں شرکت کے لیے برسلز پہنچے ہوئے ہیں۔

سربراہ اجلاس شروع ہونے سے قبل سِپراس نے جرمن چانسلر انگیلا میرکل، یورپی کمیشن کے سربراہ ژاں کلُود یُنکر اور فرانسیسی صدر فرانسوا اولانڈ سے ساتھ ملاقات کی ہے۔ یونانی وزیراعظم نے امریکی صدر سے بھی مالی بحران اور مالیاتی پیکج کے حوالے سے ٹیلی فون پر گفتگو کی ہے۔

آج ہی یورو زون کے وزرائے خزانہ کی میٹنگ میں اگلے ممکنہ اقدامات پر غوروخوض کیا گیا۔ یورو زون کے وزرائے خزانہ کی کمیٹی کے سربراہ ولندیزی وزیر خزانہ ژرون ڈیژالبلُوم کا کہنا ہے کہ یونان نئے بیل آؤٹ کی درخواست کل کرے گا۔

یونان کا یوروزون سے اخراج نہیں چاہتے، یورپی کمشنر

یورپی کمشنر برائے یورو ڈوم برووسکِس نے کہا ہے کہ یورپی یونین یونان کا یورو زون سے اخراج نہیں چاہتی، تاہم اگر ایتھنز حکومت کی جانب سے قرض دہندہ اداروں کو قابل اعتماد اصلاحات کا مسودہ پیش نہ کیا گیا، تو یونان کا یورو زون سے اخراج ممکن ہے۔ انہوں نے کہا کہ یورپی یونین ایتھنز حکومت کی جانب سے ٹھوس اور قابل اعتماد اصلاحات کے مسودے کی منتظر ہے۔ یہ بیان ایک ایسے موقع پر سامنے آیا ہے، جب آج یوروزون کے سربراہ برسلز میں مل رہے ہیں۔