ہر چوری سے قبل ہدف کا معلوماتی دورہ: ہسپانوی گروہ گرفتار

اسپین کے دارالحکومت میڈرڈ سے اتوار پانچ جولائی کو ملنے والی نیوز ایجنسی ایسوسی ایٹڈ پریس کی رپورٹوں میں بتایا گیا ہے کہ نقب زنوں کے اس گروہ کے رکن تین مشتبہ مجرموں کو پولیس نے جنوبی اسپین کے شہر مالاگا سے گرفتار کیا اور اپنی گرفتاری سے پہلے یہ ملزم کم از کم 26 مسلح وارداتیں کر چکے تھے۔

مالاگا پولیس کے آج جاری کردہ ایک بیان میں کہا گیا ہے کہ یہ ملزم کسی بھی گھر میں چوری کرنے یا ڈاکہ ڈالنے سے پہلے ہمیشہ اس گھر کا اچانک دورہ کرتے تھے۔ اس مقصد کے لیے وہ خود کو کسی نہ کسی ٹیلی فون کمپنی کے تکنیکی معائنہ کار ظاہر کرتے تھے جنہیں اس گھر میں بچھی ٹیلی فون کی تاروں اور تنصیبات کے بارے میں کچھ نہ کچھ معلوم کرنا ہوتا تھا۔ لیکن اس دوران یہ جرائم پیشہ افراد یہ بھی دیکھ لیتے تھے کہ کسی گھر میں اگر کوئی سکیورٹی الارم یا حفاظتی کیمرے نصب ہیں تو کہاں پر اور اگر قیمتی سامان کے لیے کوئی سیف بھی موجود ہے تو کس کمرے میں۔

پولیس کے مطابق ایسے ’معلوماتی دوروں‘ کے بعد اسی دن یا کسی دوسرے روز یہ نقب زن رات کو کسی وقت دوبارہ اس گھر میں داخل ہوتے اور ویلڈنگ کے لیے استعمال ہونے والے دستی آلات استعمال کرتے ہوئے فولادی سیف کو کاٹ کر یا الماریوں وغیرہ میں رکھے ہوئے زیورات اور نقدی لے کر فرار ہو جاتے۔

ایسوسی ایٹڈ پریس نے پولیس کے بیان کا حوالہ دیتے ہوئے لکھا ہے کہ اس طرح یہ نقب زن نقدی، جواہرات اور قیمتی سامان کے ساتھ ساتھ مہنگے ملبوسات اور گیراج میں کھڑی لگژری کاریں تک بھی چوری کر لیتے تھے۔

اس تین رکنی گروہ کا پتہ اس وقت چلا جب ایک پیشہ ور سکیورٹی گارڈ کو ان کی حرکتیں بہت مشکوک لگیں۔ اس وقت بھی اس گروہ کا رکن ایک ملزم ایک فون کمپنی کے تکنیکی عملے کی یونیفارم پہنے ہوئے تھا لیکن وہ بار بار ان کمروں کے معائنے پر بھی اصرار کر رہا تھا، جن میں کوئی ٹیلی فون کنکشن موجود ہی نہیں تھا۔

اس پر پولیس کو مطلع کر دیا گیا۔ پولیس اہلکاروں نے موقع پر پہنچ کر اس ’ٹیلی فون ٹیکنیشن‘ کی شناختی دستاویزات کا جائزہ لیا تو وہ اس کی اپنی نہیں بلکہ کسی دوسرے شہر میں رہنے والے ایک ایسے شہری کی نکلیں، جس کی عمر 76 برس ہے۔ مزید تفتیش پر پولیس کا شبہ اور بھی گہرا ہو گیا اور نتیجہ ان تینوں ملزمان کی گرفتاری کی صورت میں نکلا۔