کیا امداد متاثرین تک پہنچ رہی ہے؟

عالمی ادارے کے ایک سینئر اہلکار نے بدھ کے روز ایک بیان میں کہا ہے کہ نیپال کو زلزلے کی تباہی کے بعد اب مون سون بارشوں سے خطرات لاحق ہیں اور ایک ایسے وقت میں ہمالیہ کی اس ریاست کو پہنچائی جانے والی امداد کا کام ملک کے سست روی کے شکار بیوروکریٹک طریقہ کار سے بری طرح متاثر ہو رہا ہے۔

25 اپریل کو نیپال میں آنے والے 7.8 شدت کے تباہ کن زلزلے کے نتیجے میں نصف ملین گھر تباہ ہو گئے تھے اور ہزاروں بے گھر نیپالی باشندوں کو غذا، پینے کے صاف پانی اور سر چھپانے کے لیے شیلٹر کی شدید ضرورت ہے۔

ایک اندازے کے مطابق نیپال کے تباہ شدہ بنیادی ڈھانچے کی تعمیر نو کے لیے قریب 6.7 بلین ڈالر درکار ہیں۔ نیپالی حکومت کو غیر ملکی امداد کی ترسیل کو روکے رکھنے کے سبب شدید تنقید کا سامنا ہے جبکہ 2007 ء میں کھٹمنڈو حکومت نے اقوام متحدہ کے ساتھ اُس معاہدے پر دستخط کر دیے تھے، جس کے تحت کسی بھی ناگہانی آفت کی صورت میں کھٹمنڈو حکومت کو انسانی بنیادوں پر موصول ہونے والی امداد کی تیز رفتار کسٹم کلیئرنس کی یقین دہانی کرائی گئی تھی۔

اقوام متحدہ کے انسانی امور کی رابطہ کاری کے دفتر کے ڈائریکٹر آپریشنز جان گنگ نے خبر رساں ایجنسی اے ایف پی کو بیان دیتے ہوئے کہا، ’’فوری ضرورت کے احساس کے مدنظر ہم انتظامی تاخیر کے متحمل نہیں ہو سکتے۔ اب مون سون بارشں کا سلسلہ حالات کو سنگین تر کر دے گی۔ اس اثناء میں ہمیں انسانی امداد کی ترسیل کو جلد سے جلد تیز رفتار بنانا ہو گا۔‘‘

سب سے زیادہ مشکلات کے شکار دور افتادہ کوہستانی علاقے ہیں، جہاں مون سون بارش کی وجہ سے مٹی کے تودے گرنے کی خطرات بہت زیادہ ہیں اور یہ زلزلے سے تباہ حال سڑکوں کو مزید نقصان پہنچانے کا باعث بنیں گے۔

اقوام متحدہ کے مطابق نیپال میں اب بھی 2.8 ملین باشندے انسانی امداد کے منتظر ہیں۔ اس امداد میں غذا، حفظان صحت اور طبی نگہداشت شامل ہے۔ عالمی ادارے کی طرف سے نیپال کے زلزلہ زدگان کے لیے 422 ملین ڈالر کی ابتدائی امداد کی اپیل کے باوجود اب تک محض 168 ملین ڈالر فنڈ ہی پیدا ہو پائے ہیں۔

جان گنگ کے مطابق اقوام متحدہ کے اہلکاروں نے کھٹمنڈو حکومت سے مطالبہ کیا ہے کہ وہ کسٹم کے طریقہ کار کو بہتر بنانے کے لیے ممکنہ اقدامات کرے تاکہ غیر ملکی امداد دہندگان کو زیادہ سے زیادہ امداد دینے کی ترغیب دلائی جا سکے۔ ان کا کہنا تھا، ’’غیر ملکی امداد دہندہ اس امر کی یقین دہانی چاہتے ہیں کہ امداد مستحقین تک پہنچ رہی ہے۔ وہ یہ سننا نہیں چاہتے کہ بیوروکریسی اور کسٹم کے طریقہ کار کی وجہ سے امدادی اشیا گوداموں اور امدادی رقوم دارالحکومت کھٹمنڈو میں ہی رُکی ہوئی ہیں۔‘‘

آٹھ ہزار آٹھ سو انسانوں کی ہلاکت کا سبب بننے والے حالیہ زلزلے سے پہلے بھی نیپال دنیا کے غریب ترین ممالک میں سے ایک تھا، جہاں گھروں، اسکولوں اور ہسپتالوں کی تعمیر کے لیے کھٹمنڈو حکومت کو غیر ملکی امداد کی اشد ضرورت تھی۔