کویت میں شیعہ سُنی اتحاد کا مظاہرہ

کویت سے شائع ہونے والے اخبار الوطن کی خبروں کے مطابق کویت سٹی کی سب سے بڑی سُنی مسجد میں اس بار جمعے کی باجماعت نماز میں سینکڑوں شیعہ اور سُنی نمازیوں نے مل کر نماز ادا کی اور اس موقع پر کویت کے حکمران الشيخ صباح الأحمد الجابر الصباح بھی نماز میں شریک ہوئے۔ روزنامے کی رپورٹوں کے مطابق کویت کی دیگر مساجد میں بھی آج شیعہ اور سُنی مسلمانوں نے اکھٹے نماز جمعہ ادا کی۔ کویت کے باشندوں کی طرف سے قومی یکجہتی کا یہ علامتی اقدام اس لیے غیر معمولی اہمیت کا حامل ہے کہ ابھی چند روز قبل ہی کویت سٹی میں قائم امام الصادق مسجد پر ایک خود کُش بم حملے کے نتیجے میں دو درجن سے زائد افراد ہلاک ہوئے تھے۔ کویتی حکام نے حملہ آور کی شناخت بتاتے ہوئے کہا تھا کہ وہ ایک سعودی باشندہ تھا جس کا تعلق انتہا پسند سُنی اسلامک ملیشیا سے تھا۔ سرکاری ذرائع ابلاغ کے مطابق وزرات داخلہ نے خودکش حملہ آور کی شناخت سلیمان عبدالمحسن القعبہ کے نام سے کی تھی۔ حکام کا کہنا تھا کہ مشتبہ شخص جمعے کو مسجد پر حملے سے کچھ دیر قبل ہی کویت پہنچا تھا۔

گزشتہ جمعہ کو کویت میں شیعہ مسلک سے تعلق رکھنے والے افراد کی مسجد پر حملے کی ذمہ داری دولتِ اسلامیہ نے قبول کی تھی۔ گزشتہ مہینے سعودی عرب میں کام کرنے والی دولتِ اسلامیہ کی شاخ نے دو مسلسل جمعوں کو شیعہ مساجد پر حملے کیے تھے۔

تیل کے ذخائر سے مالا مال خلیجی ریاست کویت کی آبادی 1.3 ملین ہے اور شیعہ مسلمان اس کا ایک تہائی حصہ بنتے ہیں۔ 26 جون کے دہشت گردانہ حملے کے بعد سُنی اور شیعہ مذہبی اور سیاسی اہم شخصیات نے اتحاد کا مظاہرہ کیا۔ مسجد امام الصادق میں ہونے والے حملے کے چند منٹوں بعد ہی شيخ صباح الأحمد نے مسجد کا دورہ کیا تھا اور انہوں نے جاں بحق ہونے والوں کو قوم کے شہدا قرار دیا تھا۔ اُن کے اس اقدام کو شیعوں نے سراہا تھا۔ اس دہشت گردانہ حملے میں ہلاک ہونے والوں کے لواحقین سے ایک خصوصی ملاقات میں کویت کے اسپیکر پارلیمان مرزوق الغانم کا کہنا تھا، ’’جہادی دونوں فرقوں کے مابین نفاق کی آگ کو بھڑکانا چاہتے تھے جبکہ ہم سب ایک دین سے تعلق رکھتے ہیں اور ایک متحد قوم ہیں‘‘۔ اس موقع پر حملے کا نشانہ بننے والی مسجد کے ایک سینئیر معلم شیخ عبداللہ المازیدی کا کہنا تھا، ’’کویتی عوام نے تاہم قومی یکجہتی کا ایک اور مظاہرہ کیا ہے۔ ہم 1990ء میں عراق قبضے کے وقت جیسے متحد ہوئے تھے ویسے ہی دوبارہ متحد ہو گئے ہیں‘‘۔

اسی طرح کا بیان ایک شیعہ رکن پارلیمان یوسف الزلزالہ نے پارلیمان میں دیتے ہوئے کہا، ’’کویتی عوام نے دہشت گردوں کو یہ واضح پیغام دے دیا ہے کہ وہ کبھی بھی معاشرے کو تقسیم کرنے میں کامیاب نہیں ہو سکیں گے‘‘۔

کویت کی سب سے بڑی سُنی مسجد نے امام الصادق مسجد پر ہونے والے حملے کے صدمے اور شیعہ مسلمانوں کے ساتھ اظہار ہمدردی کے طور پر تین روز کے سوگ کا اعلان کیا تھا اور کویت کے سینیئیر اہلکاروں نے شیعہ سُنی تقسیم کے خلاف آواز اُٹھائی تھی۔