کم عمر مجرموں کی سزائے موت پر پابندی کے لیے ایران پر زور

اقوام متحدہ کے مطابق ایران میں اس سال 18 برس سے کم عمر افراد جرم کرنے والوں کی سزائے موت پر عملدرآمد میں اضافہ ہوا ہے۔ سال 2017 میں ایسے پانچ مجرموں کی سزا پر عمل کیا گیا تھا جبکہ اس برس کے آغاز میں ہی ایران اب تک تین کم عمر مجرموں کی سزائے موت پر عملدآمد کر چکا ہے۔یہ بھی بتایا گیا ہے کہ  اس وقت ایران میں اسّی ایسے مجرم اپنی موت کی سزا کے انتظار میں ہیں جنہوں نے کم عمری میں جرم کیا تھا۔

نیا ایرانی قانون سزائے موت کے منتظر پانچ ہزار قیدیوں کی زندگی بچا لے گا

سزائے موت دینے میں چین سب سے آگے

اقوام متحدہ میں  کمشنر برائے انسانی حقوق زید رعد الحسینی نے اپنے ایک بیان میں ایران پر زور دیتے ہوئے کہا ہے کہ ایران کو بین الاقوامی قوانین کی پابندی کرتے ہوئے ان تمام مجرموں کی سزائے موت کو معطل کر دینا چاہیے جنہوں نے اٹھارہ برس کی عمر سے قبل جرم کیا تھا۔ الحسینی کے مطابق، ’’ دنیا کا کوئی بھی ملک گزشتہ دس برسوں میں کم عمری میں کیے جانے والے جرم کی پاداش میں دی جانے والی موت کی سزا کی عملدرآمدگی میں ایران کے مساوی نہیں۔‘‘

یاد رہے کہ اس برس  چار جنوری کو ایرانی حکام نے عامر حسین نامی کم عمر فرد کو ایک تین سالہ بچی کے سے ’زیادتی اور قتل‘ کے جرم میں پھانسی دی۔ انھوں نے یہ جرم سولہ سال کی عمر میں کیا تھا۔ اسی طرح پندرہ برس کی عمر میں قتل کرنے والے علی کاظمی کو بھی 30 جنوری کو پھانسی دی گئی۔

 محبوب موفیدی نامی لڑکی کو  بھی اس برس پھانسی دی جا چکی ہے۔ محبوب  نے سن 2014 میں اپنے شوہر کو قتل کیا تھا۔ اس وقت محبوب کی عمر تیرہ برس تھی۔