کشمير ميں پانچ مشتبہ باغی ہلاک

بھارتی پوليس اور فوج کے دستوں نے مشترکہ طور پر کارروائی کرتے ہوئے اتوار چھ مئی کی صبح شوپياں کے علاقے ميں اس مکان کے گرد گھيرا ڈال ديا، جہاں انہيں شک تھا کہ باغی چھپے ہوئے ہيں۔ ابتداء ميں باغيوں سے کہا گيا تھا کہ وہ اپنے ہتھيار ڈال ديں تاہم انہوں نے مسلح افواج پر فائرنگ شروع کر دی۔ بعد ازاں مسلح جھڑپ شروع ہو گئی، جس کے نتيجے ميں پانچوں مشتبہ باغی مارے گئے۔

رياست کے پوليس چيف ايس پی ويد نے تصديق کر دی ہے کہ جائے واقعہ سے پانچ لاشيں برآمد ہوئی ہيں۔ ہلاک ہونے والے مشتبہ باغيوں ميں رياست کی ايک يونيورسٹی کے اسسٹننٹ پروفيسر محمد رفيع بھٹ بھی شامل تھے، جو مبينہ طور پر عليحدگی پسند گروہ حزب المجاہدين کے رکن بن گئے تھے۔ بھارتی نشرياتی ادارے اين ڈی ٹی وی کے مطابق شوپياں ميں اتوار کی صبح ہونے والی اس جھڑپ ميں اس گروہ کے دو اہم کمانڈرز بھی ہلاک ہوئے۔

بعد ازاں اس پيش رفت کے بعد رياستی دارالحکومت سری نگر ميں عليحدگی پسند رہنماؤں نے ہڑتال کی کال جاری کی جبکہ باغيوں کی جانب سے ہلاک کيے جانے والے مقامی افراد کے اہل خانہ نے عسکریت پسندوں کے خلاف احتجاج بھی کيا۔

بھارتی افواج نے متنازعہ کشمير ميں عليحدگی پسند تحريک کے خاتمے کے ليے اپنی کارروائياں بڑھا دی ہيں۔ پچھلے ايک سال کے عرصے ميں تقريباً 270 مشتبہ جنگجوؤں کو مارا جا چکا ہے۔ يہ امر اہم ہے کہ کشمير ميں دو دہائيوں سے زائد عرصے سے مسلح عليحدگی پسند تحريک جاری ہے، جس ميں اب تک قريب چواليس ہزار شہری، باغی، جنگجو اور فوجی اہلکار ہلاک ہو چکے ہيں۔ نئی دہلی حکومت روايتی حريف پاکستان پر عليحدگی پسند تحريک کو ہوا دينے اور اس کی حمايت کرنے کا الزام عائد کرتی ہے جبکہ اسلام آباد حکومت ان الزامات کی ترديد کرتے ہوئے باغيوں کو ’آزادی حاصل کرنے کے مجاہدین‘ قرار ديتی ہے۔

ع س / ع ح، نيوز ايجنسياں