کئی ممالک شمالی کوريا کے خلاف سخت تر اقدامات پر متفق

بيس ملکوں کے نمائندوں نے شمالی کوريا کے خلاف تازہ اور يک طرفہ پابنديوں پر غور کرنے کے سلسلے ميں اتفاق کر ليا ہے۔ يہ پيش رفت امريکا اور کينيڈا کے ميزبانی ميں پير اور منگل کو کينيڈا کے شہر وينکُوور ميں ہونے والے اجلاس ميں ہوئی۔ اجلاس کے اختتام پر جاری کردہ ايک مشترکہ بيان ميں کہا گيا ہے کہ شرکاء نے پيونگ يانگ کے متنازعہ جوہری و بيلسٹک ميزائل سازی کے انسداد کے ليے اقوام متحدہ کی سلامتی کونسل کی طے شدہ پابنديوں کے علاوہ اضافی پابنديوں پر غور کرنے پر اتفاق کيا۔ تاہم پابنديوں کے حوالے سے کوئی مزيد تفصيلات نہيں بتائی گئيں۔

اقوام متحدہ اور امريکا کی متعدد کوششوں اور پابنديوں کے اطلاق کے باوجود شمالی کوريا کے رہنما کِم جونگ اُن اپنے ملک کا جوہری و بيلسٹک ميزائل پروگرام ترک کرنے سے انکار کرتے آئے ہيں۔ وہ مسلسل ايسے ميزائل تيار کرنے کے تعاقب ميں ہيں، جو امريکا تک ہدف کو نشانہ بنا سکے۔

کينيڈا ميں منعقدہ اجلاس ميں اس بارے ميں تبادلہ خيال کيا گيا کہ شمالی کوريا پر دباؤ ميں اضافے کے ليے کيا اقدامات اٹھائے جا سکتے ہيں اور اس بارے ميں بھی کہ آيا موجودہ پابنديوں پر عملدرآمد جاری ہے۔ اجلاس ميں وہ ممالک شريک تھے جنہوں نے سن 1950 سے سن 1953 کے دوران لڑی گئی جنگ ميں جنوبی کوريا کی حمايت کی تھی۔

وينکُوور ميں امريکی وزير خارجہ ريکس ٹلرسن نے کہا کہ اگر پيونگ يانگ اپنا متنازعہ جوہری و بيلسٹک ميزائل پروگرام ترک نہيں کرتا، تو اس کے خلاف عسکری کارروائی کا امکان موجود ہے۔ ميزبان ملکوں کے نمائندگان نے شرکاء پر زور ديا کہ وہ شمالی کوريا کے ارد گرد کے سمندروں کی نگرانی شروع کرنے کے عمل کی بھی حمايت کريں۔ اس مجوزہ اقدام کا مقصد اس بات کو يقينی بنانا ہے کہ پيونگ يانگ پابنديوں کے اثرات سے بچنے کے ليے اسمگلنگ کے ذريعے مطلوبہ اشياء کو حاصل نہ کر سکے۔

اس پيش رفت پر فی الحال شمالی کوريا کا رد عمل سامنے نہيں آيا ہے۔ البتہ چين کے مطابق پيونگ يانگ کے خلاف سخت تر اقدامات پر اتفاق سے جزيرہ نما کوريا کے تنازعے کے حل ميں مشکلات کا سامنا ہو گا۔ يہ بيان بيجنگ سے وزارت خارجہ کے ترجمان لُو کانگ نے بدھ کی صبح ديا۔