چیک جمہوریہ:عدالتی فیصلہ لزبن ٹریٹی کے حق میں

یورپی یونین میں بڑے پیمانے پر اصلاحات کے معاہدے لزبن ٹریٹی پر یورپی یونین کے ستائیس رکن ممالک میں صرف چیک جمہوریہ وہ واحد ملک ہے، جس نے اب تک اس معاہدے کی توثیق نہیں کی تھی۔ عدالتی فیصلے کے بعد یہ معاہدے باقاعدہ منظوری کے لئے صدر واسلاو کلاؤس کے پاس دستخط کے لئے بھیج دیا گیا ہے۔

اس معاہدے کی توثیق چیک جمہوریہ ، آئرلینڈ اور پولینڈ کے علاوہ تمام ممالک پہلے کرچکے تھے۔ پچھلے ماہ آئرلینڈ کی عوام نے بھی ایک ریفرینڈم کے ذریعے اس معاہدے کو منظور کر لیا تھا۔ پولینڈ نے بھی گزشتہ ماہ اس معاہدے کی توثیق کر دی تھی تاہم چیک جمہوریہ میں اس معاہدے کو مخالفت کا سامنا تھا۔

صدر کلاؤس اس معاہدے کے مخالف تھے۔ صدر کلاؤس کے مطابق اس معاہدے کے اطلاق سے ممبر ممالک کی خودمختاری متاثر ہوگی اور اختیارات کا سرچشمہ یورپی یونین بن جائے گی نہ کہ ریاستی حکومت۔ تاہم چند روز قبل انہوں نے اپنے ایک بیان میں کہا تھا کہ عدالتی فیصلے کے بعد وہ اس معاہدے کی مزید مخالفت نہیں کریں گے۔ لزبن ٹریٹی کی منظوری کے بعد یورپی یونین کی پارلیمان کو رکن ممالک کے حوالے سے مزید اختیارات حاصل ہو جائیں گے۔ اگر چیک جمہوریہ کے سربراہ واسلاو کلاؤس اس معاہدے پر دستخط کر دیتے ہیں تو اس معاہدے کا اطلاق رواں برس یکم دسمبر سے ہی تمام رکن ممالک پر ہو جائے گا۔

خبررساں ادارے

ادارت : عاطف توقیر