پابندیوں سے کوئی فرق نہیں پڑے گا، ایران

پیر کو امریکہ، برطانیہ اور کینیڈا نے ایران کے تونائی اور مالیاتی شعبوں کے خلاف نئی پابندیاں عائد کی تھیں۔ اس خبر سے عالمی منڈی میں خام تیل کی قیمتیں 107 ڈالر فی بیرل سے تجاوز کر گئیں، جس سے دنیا میں تیل کے اس پانچویں بڑے برآمدی ملک کے ساتھ بڑھتے ہوئے تناؤ پر تشویش کا اظہار ہوتا ہے۔

پابندیوں کے ناقدین کا کہنا ہےکہ وہ ایران کے مبینہ جوہری پروگرام کو روکنے میں ناکام رہیں گی اور تہران حکومت ان سے فائدہ اٹھا کر عوامی ہمدردیاں حاصل کرے گی۔

ایرانی وزارت خارجہ کے ترجمان رامین مہمان پرست نے ایک نیوز کانفرنس میں کہا، ’’ایرانی عوام اس طرح کے اقدامات کی مذمت کرتے ہیں اور ان سے ایران کے دوسرے ملکوں کے ساتھ تجارتی اور اقتصادی تعلقات میں کوئی فرق نہیں پڑے گا۔‘‘

تازہ پابندیاں اقوام متحدہ کے جوہری ادارے کی اس رپورٹ کے بعد عائد کی گئی ہیں، جس میں کہا گیا تھا کہ ایران جوہری بم کے ڈیزائن پر کام کرتا رہا ہے۔ تہران کا اصرار ہے کہ اس کا جوہری پروگرام پرامن مقاصد کے لیے ہے اور یہ کہ رپورٹ گمراہ کن مغربی انٹیلی جنس معلومات پر مبنی ہے۔

پارلیمانی اسپیکر علی لاریجانی نے کہا کہ ایران اس پر جوابی اقدامات اٹھائے گا۔ ادھر ایران کے حلیف روس نے ان پابندیوں کی مذمت کرتے ہوئے انہیں ’ناقابل قبول اور  بین الاقوامی قانون سے متصادم قرار دیا ہے‘۔

امریکہ اور اسرائیل کا مؤقف ہے کہ اگر ایران کوجوہری پروگرام سے روکنے کی دیگر تمام کوششیں ناکام ہو گئیں تو وہ اس کے خلاف فوجی کارروائی کو بھی خارج از امکان قرار نہیں دیں گے۔

بین الاقوامی منڈیوں میں یہ تشویش پائی جاتی ہے کہ اگر خلیج فارس میں لڑائی چھڑ گئی تو آبنائے ہرمز بند ہو سکتی ہے، جہاں سے بحری جہاز خلیجی ریاستوں کا بیشتر خام تیل لے کر گزرتے ہیں۔

ترکی کے صدر عبد اللہ گل نے ایران اور عالمی طاقتوں کے درمیان مذاکرات کی میز پر واپسی پر زور دیا ہے۔ دونوں فریقوں کے درمیان مذاکرات جنوری کے بعد سے تعطل کا شکار ہیں۔

نیشنل ایرانیئن امریکن کونسل نامی گروپ نے کہا ہے کہ نئی پابندیوں کے نتیجے میں ’ایرانی حکومت کی کارروائیوں کا خمیازہ ایرانی عوام کو بھگتنا پڑے گا‘ اور ان سے ایران کو خوراک، ادویات اور دیگر ضروری اشیاء کی فراہمی متاثر ہو گی۔

ایران کی جمہوریت نواز حزب اختلاف نے بھی انتباہ کیا ہے کہ یہ پابندیاں ایرانی حکومت کے لیے نعمت غیر مترقبہ ثابت ہوں گی اور ان سے اس کے ہاتھ مضبوط ہوں گے۔

ابھی ان پابندیوں کے اثرات واضح نہیں ہیں، تاہم قومی ایرانی آئل کمپنی کے سربراہ احمد غلہ بانی نے کہا ہے کہ ایرانی کو یورپی ملکوں کی جانب سے اس کا تیل نہ خریدنے سے کوئی فرق نہیں پڑے گا کیونکہ بہت سے دیگر ملک اس سے تیل خریدنا چاہتے ہیں۔

امریکہ کی طرف سے اگرچہ ایران کے تمام بینکاری شعبے پر پابندیاں عائد کی گئی ہیں مگر اس کے مرکزی بینک کو اس وجہ سے پابندیوں کا شکار نہیں کیا گیا کیونکہ اس سے عالمی منڈی میں تیل کی قیمتیں بڑھ جائیں گی اور عالمی معیشت پر مضر اثرات مرتب ہو سکتے ہیں۔

لندن میں اکنامسٹ انٹیلی جنس یونٹ کے علاقائی ڈائریکٹر ڈیوڈ بٹر کا کہنا ہے کہ نئی پابندیوں سے ایران کے تجارتی لین دین کے اخراجات میں تو اضافہ ہوگا مگر ان سے ایرانی معیشت پر کوئی بہت زیادہ اثر نہیں پڑے گا۔

رپورٹ: حماد کیانی

ادارت: عاطف بلوچ