ميانمار ميں نئی آزادياں

اگرچہ ميانمار ميں پارليمنٹ کی چوتھائی نشستيں اور چوتھائی کليدی عہدے اب بھی فوج ہی کے پاس ہيں ليکن اصلاحات کی خواہش بالکل نماياں ہے۔ پريس کو زيادہ آزادی دے دی گئی ہے۔ ٹريڈيونينوں کو منظم ہونے کی اجازت دی گئی ہے اور سياسی قيدی آزاد کر ديے گئے ہيں۔ جرمنی کے شمالی بندرگاہی شہر ہيمبرگ کے ايشيائی مطالعات کے انسٹيٹيوٹ میں برما کے امور کے ايک ماہر مارکو بيونٹے نے محتاط پر اميدی کے ساتھ کہا:  ’’نئے صدر کے آنے کے بعد سے بہت سی اصلاحات شروع کی جا چکی ہيں ليکن انتظاميہ اور فوج ميں بہت سے مخالفين بھی ہيں جو پرانے، جابرانہ ڈھانچوں کی اصلاح کو بہت مشکل بنا رہے ہيں۔‘‘

اصلاحات کے عمل ميں ايک بہت اہم قدم نومبر سن 2010 ميں ملک کے جمہوری ضمير کی سی حيثيت رکھنے والی امن کی نوبل انعام يافتہ آنگ سان سو چی کی کئی برسوں کی نظر بندی کا خاتمہ تھا۔ وہ سن 1988 سے ملک ميں جمہوريت کے ليے لڑ رہی ہيں۔ اس وقت انہوں نے قومی ليگ برائے جمہوريت قائم کی تھی اور دھمکيوں کے باوجود انتخابی مہم چلائی تھی۔ جولائی سن 1989 ميں انہيں رياستی سلامتی کو خطرے ميں ڈالنے کے الزام ميں پہلی مرتبہ گھر ميں نظر بند کر ديا گيا تھا۔ ليکن يہ اور اس کے بعد آنے والی تمام سختياں آنگ سان سو چی کو جمہوريت کے لئے کوششيں جاری رکھنے سے روک نہيں سکيں۔ اب انہوں نے اپريل ميں ہونے والے انتخابات کے لنے باضابطہ طور پر اپنا اندراج کرا ديا ہے۔ ان انتخابات ميں 48 پارليمانی نشستوں کے ليے مقابلہ ہو گا کيونکہ سن 2010 ميں ان نشستوں پر منتخب ہونے والے اراکين کو حکومتی عہدے قبول کرنے کی وجہ سے يہ نشستيں خالی کرنا پڑی ہيں۔

غير ملکی رہنما آنگ سان سو چی سے ملنے آتے رہتے ہيں۔ امريکہ، برطانيہ اور فرانس کے وزرائے خارجہ اُن سے ملاقاتيں کر چکے ہيں۔ اب فروری ميں جرمنی کی ترقياتی امداد کے وزير ڈرک نيبل ميانمار جائيں گے تاکہ حاليہ مثبت تبديليوں کے بعد ملک کی صورتحال کا جائزہ لے سکيں۔ آئندہ کی پيش رفت پر ہی ميانمار پر عائد پابنديوں ميں نرمی کے فيصلے کا انحصارہو گا۔ يورپی يونين اپريل کے آخر ميں ميانمار پر عائد پابندياں جاری رکھنے کے بارے ميں فيصلہ کرے گی۔

ميانمار يورپ ميں بہت پسند کی جانے والی ٹيک لکڑی اور اعلٰی قسم کے جواہرات سے مالا مال ہونے کے باوجود ايشيا کا ايک غريب ملک ہے۔ اصلاحات سے اس کی اقتصادی حالت بھی بہتر ہو سکتی ہے۔

رپورٹ: زابينے ہارٹرٹ مجدحی / شہاب احمد صديقی

ادارت، شادی خان سيف