ممبئی، بمبئی یا بومبے؟ نئے اور پرانے نام
دنیا بھر میں اس صدی کے دوران بہت سے شہروں اور مشہور مقامات کو اپنے ناموں کی تبدیلی کے عمل سے گزرنا پڑا کیونکہ وہاں کی مقامی آبادی ایسا چاہتی تھی جبکہ بہت سے مقامات کے نام زبردستی بدل دیے گئے۔
ڈینالی کی واپسی
’ماؤنٹ میکنلی‘ کی اونچائی 6168 میٹر ہے اور یہ شمالی امریکا کا سب سے اونچا پہاڑ ہے۔ تاہم جس علاقے میں یہ پہاڑ موجود ہے، وہاں کے مقامی افراد اسے ’ڈینالی‘ کہہ کر پکارتے ہیں۔ ایک طویل عرصے تک الاسکا کے یہ لوگ کوششیں کرتے رہے کہ اس پہاڑ کو سرکاری طور پر اس کا اصل نام واپس دیا جائے۔ امریکی صدر باراک اوباما نے بالآخر یہ خواہش پوری کر دی ہے اور یہ پہاڑ اب ’ڈینالی‘ یعنی عظیم ہی کہلایا کرے گا۔
ممبئی یا بومبے؟
اگرچہ مقامی آبادی اپنے شہر کو ابھی تک ’بومبے‘ کہہ کر پکارتی ہے، سرکاری سطح پر کروڑوں کی آبادی والا یہ بھارتی شہر اب مُمبئی کہلاتا ہے۔ اس شہر کو پرتگیزی اور برطانوی دور میں بومبے کہا جاتا تھا۔ اپنے اس ماضی سے دُوری اختیار کرنے کے لیے مقامی حکومت نے 1996ء میں نام تبدیل کر کے ممُبئی رکھ دیا۔ اس کا تعلق ہندوؤں کی ممبا دیوی سے جوڑا جاتا ہے۔
ایک یادگار
37 سال تک مشرقی جرمن شہر کیمنٹز کا نام کچھ اور تھا۔ دس مئی 1953ء سے یکم جون 1990ء تک سیکسنی صوبے کا یہ شہر کارل مارکس سٹی کہلاتا تھا۔ مشرقی جرمنی کی اُس وقت حکومت نے معروف محقق و دانشور اور سوشلزم کے بانی کہلانے والے کارل مارکس کو ایک خصوصی اعزاز دینے کے لیے شہر کا نام بدلا تھا۔
بہت سے ناموں والا شہر
آبنائے باسفورس پر واقع ترک شہر استنبول کو کئی مرتبہ ناموں کی تبدیلی کے عمل سے گزرنا پڑا۔ یونانیوں نے اس کا نام ’بازنطیم‘ رکھا پھر اسے ’نووا روما‘ اور پھر ’قسطنطنیہ‘ کے نام سے بھی پکارا گیا۔ اس کے بعد 1930ء میں اسے استنبول کا نام دیا گیا، جو کہ آج بھی اس شہر کی پہچان چلا آ رہا ہے۔
طاقت کا کھیل
زار پیٹر اوّل نے بحیرہٴ بالٹک کے کنارے یہ شہر آباد کیا تھا۔ 1712ء میں اس شہر کو روسی سلطنت کا دارالحکومت بنا دیا گیا۔ 1914ء میں جرمنی کے ساتھ ہونے والی جنگ کے دوران سینٹ پیٹرز برگ کو پیٹرو گراڈ کہا جانے لگا۔ اس کے دس سال بعد اس شہر کا نام لینن گراڈ رکھ دیا گیا۔ تاہم 1991ء سے اس شہر کو پھر سے اس کا پرانا نام سینٹ پیٹرز برگ واپس دے دیا گیا ہے۔
مستقبل میں واپسی
نمیبیا کے زیادہ تر شہری جرمن نوآبادیاتی دور سے چھٹکارا حاصل کرنا چاہتے ہیں، خاص طور پر وہ لوگ جو یورپی نژاد ہیں۔ ایک تجویز ہے کہ بندرگاہی شہر’لوڈریٹز‘ کا نام تبدیل کر کے’ نامی نس‘ کر دیا جائے۔ کچھ لوگوں کا خیال ہے کہ نام کی تبدیلی کاروباری نقصان کا باعث بن سکتی ہے جبکہ کچھ کہتے ہیں کہ ’نامی نس‘ کہنے کے لیے زبان کو خاص انداز میں موڑ کر کلِک کی آواز نکالنا پڑتی ہے، جو صرف مقامی لوگ ہی کر سکتے ہیں۔