ملالہ کی کتاب: پاکستانی نجی اسکولوں نے پابندی لگا دی

اسلام آباد سے موصولہ خبر رساں ادارے ایسوسی ایٹڈ پریس کی اتوار کی سہ پہر ملنے والی رپورٹوں کے مطابق پاکستان کے تمام نجی اسولوں میں ملالہ یوسفزئی کی اس کتاب پر یہ الزام لگاتے ہوئے پابندی لگا دی گئی ہے کہ پیدائشی طور پر سوات سے تعلق رکھنے والی اور اس وقت برطانیہ میں مقیم یہ نابالغ طالبہ ’مغربی دنیا کے ہاتھوں میں آلہء کار بنی ہوئی ہے۔‘

ملالہ یوسفزئی کو اس وقت عالمی توجہ ملی تھی جب گزشتہ برس سوات میں طالبان نے اسے ایک حملے میں سر میں گولی مار کر شدید زخمی کر دیا تھا۔ اس حملے کی وجہ ملالہ کی طرف سے طالبان کی مخالفت بنی تھی، جس میں اس کی ڈائریوں کی اشاعت نے مرکزی کردار ادا کیا تھا۔

بعد ازاں شمال مغربی پاکستان سے تعلق رکھنے والی اس طالبہ نے اسی سال اکتوبر میں اپنی ایک خود نوشت سوانح عمری بھی جاری کر دی تھی، جو ملالہ کے ساتھ مل کر برطانوی خاتون صحافی کرسٹینا لیمب نے لکھی تھی۔

ایسوسی ایٹڈ پریس کے مطابق I am Malala نامی اس کتاب کے بارے میں اب پاکستان کے نجی اسکولوں کے انتظامی اداروں کی ملکی تنظیم آل پاکستان پرائیویٹ اسکولز مینیجمنٹ ایسوسی ایشن نے فیصلہ کیا ہے کہ اس ’متنازعہ‘ کتاب کے اس تنظیم کے رکن تعلیمی اداروں کی 40 ہزار لائبریریوں میں رکھے جانے پر پابندی لگا دی جائے۔

پاکستانی نجی اسکولوں کی اس تنظیم کے صدر ادیب جاودانی نے اتوار کے روز بتایا کہ اس کتاب پر پابندی اس لیے لگائی گئی ہے کہ ملالہ مبینہ طور پر ’’پاکستان کی نہیں بلکہ مغربی دنیا کی نمائندگی کر رہی ہے۔‘‘

ملالہ یوسفزئی کا نام اس سال امن کے نوبل انعام کے لیے بھی نامزد کیا گیا تھا۔ یہ پاکستانی طالبہ اب پاکستان میں طالبان عسکریت پسندوں کی مخالفت اور بچیوں کی تعلیم کے حق میں آواز اٹھانے کی وجہ سے ایک عالمی ہیرو بن چکی ہے۔

تاہم منقسم رائے عامہ والے پاکستان میں اس طرح کی عوامی سوچ کی بھی کوئی کمی نہیں جس کے تحت ملالہ کی ساری جدوجہد ایک ’سازش‘ ہے اور اس پر عسکریت پسندوں کے حملے کا واقعہ بھی ’ایک ڈرامہ تھا، جس کا مقصد مغربی دنیا کے لیے ایک ہیرو کو وجود میں لانا تھا۔‘‘