مقدونیہ نام کا آخر جھگڑا کیا ہے؟

مقدونیہ نام کی وجہ سے یونان نے اس ملک کی نیٹو اور یورپی یونین میں ممکنہ شمولیت کا راستہ روک رکھا ہے اور مقدونیہ اب اس صورتحال میں تبدیلی کا خواہاں ہے۔ بدھ کے روز مقدونیہ کے وزیراعظم زوران زائف نے کہا ہے کہ ملک کا کوئی بھی نیا نام عوامی ریفرنڈم کروانے کے بعد ہی رکھا جائے گا۔

ان کا یہ بیان ایک ایسے وقت میں سامنے آیا ہے، جب یونان اور اس کا شمالی ہمسایہ ملک مقدونیہ ایک معاہدے کے انتہائی قریب آ چکے ہیں۔ وزیراعظم زائف کا کہنا تھا، ’’ہم ایک معاہدے کی بنیادوں اور اصولوں پر متفق ہیں۔‘‘ تاہم ان کا کہنا تھا کہ اس حوالے سے مزید معلومات وہ رواں ہفتے اپنے یونانی ہم منصب سے  ایک ٹیلی فون کال کرنے کے بعد ہی فراہم کریں گے۔

جھگڑا کیا ہے؟

مقدونیہ نام کے تنازعے کا آغاز سن 1991ء میں ہوا تھا، جب اس ملک نے سابق جنگ زدہ یوگوسلاویہ سے اپنی آزادی کا اعلان کیا تھا اور نئی حکومت نے اس نوزائیدہ مملکت کا نام ’جمہوریہ مقدونیہ‘ رکھا۔ اس نام کے انتخاب پر ایتھنز حکومت پریشان ہو گئی تھی۔ تاریخی طور پر مقدونیہ وہ بڑا ملک تھا، جس میں موجودہ یونان کے شمالی حصے بھی شامل تھے۔ قدیم یونانی حکمران سکندر اعظم کو ’مقدونیہ کے سکندر سوئم‘ کے نام سے بھی جانا جاتا تھا۔

اس وقت یہ خدشات پیدا ہوئے تھے کہ یہ نیا ملک علاقائی عزائم رکھتا ہے اور مستقبل میں یہ ماضی کی طرح ہی ایک بڑا ملک بنانے کی کوشش کرے گا۔ یونان مغربی دفاعی اتحاد نیٹو اور یورپی یونین دونوں کا ہی رکن ملک ہے اور یہ اپنی ویٹو طاقت کا استعمال کرتے ہوئے مقدونیہ کی ان میں شمولیت کا راستہ روک چکا ہے۔

ایتھنز حکومت کا مطالبہ ہے کہ مقدونیہ جو کوئی بھی نیا نام رکھے، اسے آئینی ترمیم کے ذریعے سامنے لایا جائے۔ اس کی قانونی حیثیت کو نہ صرف اندرون ملک بلکہ بیرون ملک بھی تسلیم کیا جائے۔ یاد رہے کہ روس اور امریکا کے ساتھ ساتھ متعدد ملک  مقدونیہ کو اس کے موجودہ نام سے ہی تسلیم کر چکے ہیں۔

مقدونیہ کے وزیراعظم کے مطابق مجوزہ معاہدے کی دونوں ممالک کے پارلیمان سے منظوری کے بعد ہی اسے عوام کے سامنے رکھا جائے گا۔ مقدونیہ کے نئے نام کے حوالے سے کئی نام گردش کر رہے ہیں اور ان میں ’نیو مقدونیہ‘ یا پھر  ’اپر مقدونیہ‘ کے نام بھی شامل ہیں۔ امید کی جا رہی ہے کہ اس حوالے ممکنہ ریفرنڈم ستمبر یا اکتوبر میں منعقد کیا جا سکتا ہے۔

ا ا / ع ب (اے ایف پی، اے پی)