مغربی یورپی مسیحیوں میں تارکین وطن کے حوالے سے برداشت کم

امریکی تحقیقاتی ادارے پیو ریسرچ سینٹر کے ایک مطالعاتی جائزے سے پتہ چلتا ہے کہ مغربی یورپی ممالک میں بسنے والے مسیحی افراد خواہ وہ باقاعدگی سے گرجا گھروں میں جاتے ہوں یا نہیں، یہودیوں، مسلمانوں اور تارکین وطن کے حوالے سے غیر  مذہبی افراد کے مقابلے میں زیادہ منفی نظریات کے حامل ہوتے ہیں۔

رپورٹ کے مطابق یہ مسیحی افراد عموماﹰ اپنے ملک کی ثقافت اور اقدار کو ارفع ترین گردانتے ہیں۔ رپورٹ کے مصنفین لکھتے ہیں کہ اگر موازنہ کیا جائے تو منفی نظریات کے حامل افراد کے مقابلے میں زیادہ تر جواب دہندگان نے تارکین وطن کو ایماندار اور محنتی قرار دیا۔

مہاجرین کے لیے دل کھلے رکھو، پوپ فرانسس

پیو ریسرچ سینٹر کے تحقیقاتی جائزے کی رُو سے تاہم،’’ ایک واضح رحجان صاف نظر آتا ہے اور وہ یہ کہ چرچ جانے یا نہ جانے والے دونوں طرح کے مسیحی افراد غیر مذہبی وابستگیاں رکھنے والے بالغوں کے مقابلے میں زیادہ تارکین وطن اور اقلیت مخالف نظریات رکھتے ہیں۔‘‘

یہ تحقیقاتی رپورٹ پندرہ ممالک میں چوبیس ہزار پانچ سو نناوے افراد سے ٹیلیفون پر بات چیت کر کے مرتب کی گئی ہے۔ سروے کے مطابق عبادت کے لیے باقاعدگی سے گرجا گھروں کا رخ کرنے والے پینتالیس فیصد برطانوی شہریوں اور مذہبی عبادات کی پابندی نہ کرنے والے سینتالیس فیصد کا کہنا تھا کہ مذہبِ اسلام اُن کی ثقافت اور اقدار کے ساتھ بنیادی طور پر مطابقت نہیں رکھتا۔

فرانس میں قریب بہّتر فیصدی چرچ جانے والے مسیحیوں کا ماننا تھا کہ ایک صحیح فرانسیسی ہونے کے لیے وہاں کا آبائی ہونا ضروری ہے۔ مذہب پر عمل نہ کرنے والے باون فیصد فرانسیسی مسیحیوں کی مذہبی وابستگی نہ رکھنے والے تینتالیس فیصد لوگوں کے مقابلے میں بھی یہی رائے تھی۔

یہ سروے سن 2017 اپریل سے اگست کے دوران کیا گیا۔ یورپی بارڈر کنٹرول کی ایجنسی فرنٹیکس کے مطابق اس سے قبل کے دو سالوں میں 2.3 ملین کے قریب مہاجرین اور تارکین وطن یورپ داخل ہوئے تھے۔

سياسی پناہ کے بہتر امکانات کے ليے ترکِ اسلام کے واقعات

اس مطالعے سے یہ بھی چلتا ہے کہ سویڈن کے باشندے مہاجرین اور اقلیتوں کے بارے میں خیالات کا اظہار کرنا پسند نہیں کرتے جبکہ اطالوی باشندوں میں یہ رحجان اس کے برعکس ہے۔

مغربی ممالک میں کیے گئے اس سروے میں مختلف افراد سے یہودیوں کے حوالے سے بھی رائے پوچھی گئی۔ مسیحی اور غیر مذہبی دونوں طرح کے افراد کی ایک چوتھائی تعداد کا کہنا تھا کہ وہ ایک یہودی کو بطور فیملی ممبر رکھنا پسند نہیں کریں گے۔

یہودیوں کے حوالے سے یہی جواب برطانیہ میں تیئس فیصد، آسٹریا میں اکیس فیصد اور جرمنی میں انتیس فیصد افراد سے موصول ہوا۔

ص ح / اے پی