مالیاتی منڈیوں کی بہتر نگرانی: جرمن، امریکی مشاورت

حالیہ بین الاقوامی مالیاتی بحران کے پس منظر میں ٹموتھی گائٹنر نے جرمن دارالحکومت برلن میں جمعرات کے روز اپنے جرمن ہم منصب وولفگانگ شوئبلے کے ساتھ مذاکرات کے بعد کہا کہ اس بارے میں تو امریکہ اور یورپ کے مابین اتفاق رائے پایا جاتا ہے کہ بڑی مالیاتی منڈیوں میں ان پر خطر کاروباری فیصلوں پر، جیسے فیصلے حالیہ بحران کا سبب بنے، زیادہ بہتر انداز میں نظر رکھی جانی چاہیے۔ تاہم گائٹنر کے بقول ایسا کرتے ہوئے اس امر کو یقینی بنانا بھی انتہائی اہم ہوگا کہ بہتر نگرانی سے متعلق یہی اقدامات بین الاقوامی سطح پر معاشی بحالی کے عمل میں رکاوٹ نہ بنیں یا اسے سست رفتار نہ بنا دیں۔

ٹموتھی گائٹنر نے وولفگانگ شوئبلے کے ساتھ ایک مشترکہ پریس کانفرنس میں کہا کہ ان کی رائے میں اس بات پر سبھی متفق ہیں کہ سرمائے کی انٹرنیشنل مارکیٹوں میں خطرات کا قبل از وقت ازالہ کرنے والے اور قدامت پسندانہ نوعیت کے زیادہ اقدامات کی ضرورت ہے، تاکہ ان مالی منڈیوں کی کارکردگی کو زیادہ شفاف اور محفوظ بنایا جا سکے۔ لیکن امریکی وزیر خزانہ نے ساتھ ہی یہ بھی کہا کہ یہ امر بھی فراموش نہیں کیا جا سکتا کہ امریکہ میں مالیاتی شعبے کے اداروں کی روایات اور ڈھانچے بر اعظم یورپ میں ایسے اداروں اور منڈیوں کے ڈھانچوں سے قدرے مختلف ہیں۔

برلن میں اپنے امریکی ہم منصب کے ساتھ مل کر صحافیوں سے گفتگو کرتے ہوئے جرمن وزیر خزانہ وولفگانگ شوئبلے نے کہا کہ چند ہی ہفتوں میں کینیڈا میں بیس کے گروپ کی جو سربراہی کانفرنس ہونے والی ہے، اس کے مرکزی ہدف سے متعلق تو تمام بیس ملکوں میں ایک ہی رائے پائی جاتی ہے تاہم اس بارے میں مختلف ملک اختلاف رائے کا شکار ہیں کہ اس منزل کے حصول کے لئے سب سے بہتر راستہ کون سا ہو سکتا ہے۔

برلن میں جمعرات کے روز ہونے والی جرمن امریکی وزارتی مشاورت کے بعد یہ بھی کہا گیا کہ جون کے آخر میں جی ٹوئنٹی کی سربراہی کانفرنس کے حوالے سے برلن اور واشنگٹن بنیادی طور پر ایک دوسرے سے اس حد تک متفق ہیں کہ کینیڈا میں عالمی مالیاتی نظام اور بین الاقوامی مالیاتی منڈیوں کی کارکردگی سے متعلق ایک ایسے فریم ورک کی منظوری کی راہ ہموار کی جانا چاہیے، جو عالمی معیشت کو کسی بھی بحران کا کامیابی سے مقابلہ کرنے کے قابل بنا سکے۔

امریکی وزیر خزانہ گائٹنر کے مطابق واشنگٹن اس امر کا تہیہ کئے ہوئے ہے کہ حالیہ مالیاتی بحران اور مستقبل کے ایسے کسی بھی دوسرے بحران کے نتیجے میں مالی نقصانات کے ازالے کے لئے وسائل ان خصوصی رقوم کی صورت میں جمع کئے جائیں، جو بڑے بڑے مالیاتی اداروں کو ادا کرنی چاہییں۔

گائٹنر کے بقول یہ امر خوش آئند ہے کہ یورپ میں بھی امریکہ کی اس سوچ کے حق میں رائے پائی جاتی ہے، اور خاص طور پر جرمنی بھی بڑے بڑے مالیاتی اداروں کو ایسی ادائیگیوں کا پابند بنانے کی تائید کرتا ہے۔

جہاں تک اس بات کا تعلق ہے کہ موجودہ حالات میں مالیاتی شعبے میں امریکہ اور جرمنی کی سوچ میں بڑا اختلاف کن فوری ترجیحات کے سلسلے میں پایا جاتا ہے، تو اس کا جواب یہ ہے کہ امریکہ مالیاتی بحران کے بعد عالمی معیشت میں بحالی کی کوششوں پر زیادہ توجہ دئے جانے کا حامی ہے جبکہ جرمنی کا مؤقف یہ ہے کہ سب سے پہلے بڑی معیشتوں میں عوامی شعبے کی مالی حالت مستحکم بنائی جانی چاہیے۔

رپورٹ: مقبول ملک

ادارت: شادی خان سیف