1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

لیبیا میں چار اطالوی صحافیوں کا اغوا

25 اگست 2011

لیبیا میں پیدا شدہ جنگی صورتحال میں الزاویہ شہر کے قریب چار اطالوی صحافیوں کو مسلح افراد نے اغوا کر لیا ہے۔ اطالوی وزارت خارجہ کے مطابق اغوا کار قذافی کے حامی جنگجو ہیں۔

https://p.dw.com/p/12NFB
تصویر: dapd

اغوا ہونے والے یہ صحافی تین مختلف اطالوی اخبارات کے لیے رپورٹنگ کر رہے تھے۔ بتایا گیا ہے کہ ان چاروں افراد کو مسلح افراد نے گن پوائنٹ پر اغوا کر کے طربلس پہنچا دیا ہے۔ اطلاعات کے مطابق وہ اس وقت لیبیا کے دارالحکومت طرابلس میں کسی نامعلوم مقام پر واقع ایک اپارٹمنٹ میں رکھے گئے ہیں۔

 ان میں سے ایک مغوی سے اطالوی سفارت خانے کے کونسلر Guido de  Sanctis  نے ٹیلی فون پر بات بھی کی ہے۔ اغوا ہونے والوں میں ایک خاتون Elisabetta Rosaspina کا تعلق ایک معروف روزنامہ سے ہے۔ اٹلی کی وزارت خارجہ نے بھی اس وقوعے کی تصدیق کردی ہے۔

اطالوی سفارت کار کے مطابق چاروں صحافی بظاہر بہتر حالات میں رکھے گئے ہیں اور ان کو ٹیلی فون پر بات کرنے کی اجازت بھی دی گئی ہے۔ سفارت کار کے مطابق ان کو افطار کے وقت بقیہ افراد کے ساتھ باقاعدہ خوراک بھی فراہم کی گئی۔

Superteaster NO FLASH Libyen Aufständische haben den Stützpunkt Bab al Asasija in Tripolis gestürmt
طرابلس شہر کے حالات انتہائی کشیدہ ہیںتصویر: picture-alliance/dpa

اغوا کے وقت چاروں صحافی الزاویہ شہر کے نزدیک کوسٹل ہائی وے پر طرابلس کی جانب محو سفر تھے۔ مسلح افراد نے صحافیوں کے ڈرائیور کو ہلاک کر کے انہیں اپنی تحویل میں لیا۔ ڈرائیور کی ہلاکت کی بھی اطالوی سفارت کار نے تصدیق کی ہے۔ اغوا کاروں نے بعد میں ان مغوی صحافیوں کو دوسرے افراد کے حوالے کردیا جو امکاناً قذافی کے حامی ہیں۔

جس صحافی سے ٹیلی فون پر بات کی گئی ہے، اس کا خیال ہے کہ وہ جس اپارٹمنٹ میں رکھے گئے ہیں، انہیں وہ Rixos ہوٹل کے نزدیک محسوس ہوتا ہے۔ اسی ہوٹل میں دو درجن سے زائد غیر ملکی صحافی شدید جنگ کی وجہ سے گزشتہ پانچ چھ روز سے محصور ہو کر رہ گئے ہیں۔

ایک اطالوی بشپ کے اخبار Avvenire کے مغوی صحافی نے بھی اپنے اخبار کے دفتر فون کر کے بتایا کہ وہ تمام فی الحال بہتر حالات میں ہیں۔ صحافیوں کے اغوا پر اطالوی حکومت بھی نگاہ رکھے ہوئے ہے۔ روم میں وزارت خارجہ کا کہنا ہے کہ ان صحافیوں کو قذافی کی حامی قوتوں نے اغوا کیا ہے۔

ان صحافیوں کا تعلق جن تین اطالوی اخبارت سے ہے، ان میں La Stampa ، Avvenire  اور معروف روزنامہ Corriere della Sera  شامل ہیں۔

رپورٹ:  عابد حسین

ادارت:  عاطف بلوچ

اس موضوع سے متعلق مزید سیکشن پر جائیں

اس موضوع سے متعلق مزید

مزید آرٹیکل دیکھائیں