قاہرہ ڈونرز کانفرنس: غزہ پٹی کی تعمير نو کے ليے 5.4 بلين ڈالر کے وعدے

قاہرہ ميں گزشتہ روز منعقدہ امدادی کانفرنس ميں غزہ کی تعمير نو کے ليے مجموعی طور پر 5.4 بلين ڈالر کے وعدے سامنے آئے ہيں۔ جان کيری نے فلسطينيوں کے ليے اضافی 212 ملين ڈالر کا اعلان کيا۔ ديگر ممالک ميں قطر نے ايک بلين ڈالر جبکہ کويت، متحدہ عرب امارات اور ترکی نے دو، دو سو ملين ڈالر کے وعدے کيے ہيں۔ اس کے علاوہ فرانس نے چاليس ملين يورو اور جرمنی نے پچاس ملين يورو دينے کا وعدہ کيا۔ قاہرہ ميں تعينات برطانوی سفير جان کيسن کے مطابق لندن حکومت بھی بتيس ملين ڈالر دے گی۔ يورپی يونين کے خارجہ امور سے متعلق محکمے کی سربراہ کيتھرين ايشٹن کے بقول اٹھائيس رکنی يورپی يونين کی طرف سے دی جانے والی امداد کا حجم ساڑھے چار سو ملين ڈالر بنتا ہے۔

رواں برس جولائی اور اگست کے مہينوں ميں حماس کی طرف سے اسرائيل کی طرف راکٹ فائر کيے جانے کے رد عمل ميں غزہ پٹی و ديگر فلسطينی علاقوں ميں کی گئی اسرائيلی کارروائی کے نتيجے ميں قريب اکيس سو فلسطينی مارے گئے تھے اور شہر بھی بری طرح متاثر ہوا تھا۔ فلسطينی حکام کے مطابق غزہ پٹی کی تعمير نو پر قريب چار بلين ڈالر کے اخراجات آئيں گے۔

قاہرہ ڈونرز کانفرنس کے موقع پر امریکی وزیر خارجہ جان کيری نے کہا ہے کہ فلسطين اور اسرائيل کے علاوہ خطے کے ديگر ملکوں کے درميان امن کے قيام کے ليے کوئی ديرپا ڈيل اب بھی ممکن ہے تاہم انہوں نے امن مذاکرات کی بحالی کے حوالے سے کوئی بات نہيں کی۔ امريکی وزير خارجہ نے يہ بيان فلسطين اور حماس کے درميان رواں سال ہونے والی مسلح جھڑپوں کے نتيجے ميں غزہ پٹی کو آنے والے نقصانات کے تعين اور وہاں کی تعمير نو کے ليے مصری دارالحکومت قاہرہ ميں اتوار بارہ اکتوبر کے روز منعقدہ ڈونرز کانفرنس ميں کہی۔

يہ امر اہم ہے کہ اسرائيليوں اور فلسطينيوں کے مابين تعطل شدہ مذاکراتی عمل امريکا کی کوششوں سے دوبارہ شروع ہونے والے امن مذاکرات رواں سال اپريل ميں بے نتيجہ ختم ہو گئے تھے۔ مذاکراتی عمل معطل ہونے کی وجہ فلسطين ميں حماس اور الفتح

کی متحد حکومت کو قائم کرنے کی ابتدائی بات چیت بنی اور اِس پر اسرائيل کو شديد تحفظات تھے۔

امريکی وزير خارجہ کيری نے قاہرہ ميں کہا کہ اس کانفرنس ميں نہ صرف مالی امداد بلکہ تمام فريقوں کی طرف سے ايسے امن کے قيام کے ليے عزم کا مظاہرہ بھی سامنے آنا چاہيے، جو اسرائيليوں، فلسطينيوں اور خطے کے دوسرے افراد کی خواہشات کے مطابق ہو۔ انہوں نے مزيد کہا، ’’اور ميں آپ کو صدر باراک اوباما، ميری اور امريکا کی مکمل حمايت کی يقين دہانی کراتا ہوں۔‘‘