فیس بک کے صارفین کی تعداد نصف ارب ہو گئی

نئے اعدادوشمار کے مطابق دُنیا میں ہر چودھواں شخص سماجی رابطے کی یہ آن لائن سہولت استعمال کر رہا ہے۔ فیس بک کے بانی مارک زکربرگ کہتے ہیں صارفین کی تعداد کے حوالے سے اگلا سنگ میل 75 کروڑ کا ہوگا، جس میں اب زیادہ دیر نہیں لگے گی۔

انہوں نے اپنے بلاگ میں لکھا کہ بدھ کی صبح فیس بُک کے باقاعدہ صارفین کی تعداد نصف ارب ہو گئی۔ انہوں نے کہا کہ ان تمام لوگوں کے لئے یہ ایک سنگ میل ہے جنہوں نے دنیا بھر میں فیس بک کے فروغ میں کردار ادا کیا۔ زکربرگ نے اپنے حالیہ ایک بیان میں کہا تھا کہ ان کی ویب سائٹ کے صارفین کی تعداد ایک ارب تک پہنچنا یقینی ہے۔ انہوں نے اس ویب سائٹ کی بنیاد 2004ء میں رکھی تھی۔

زکر برگ کا کہنا ہے کہ ان کی کمپنی کا مقصد دنیا میں رابطے اور وسعت کا فروغ ہے۔ ان کا کہنا ہے کہ چھ سال قبل انہوں نے یہ ویب سائٹ شروع کی تو انہیں اس قدر کامیابی کا اندازہ بھی نہیں تھا۔ تاہم فیس بک نے سماجی رابطے کے آن لائن میدان میں اپنے حریفوں کو کہیں پیچھے چھوڑ دیا ہے۔

فیس بک نے صارفین سے سماجی رابطے کی اس سروس کے استعمال کے تجربات اسی ویب سائٹ پر شیئر کرنے کے لئے کہا ہے۔ منتظمین کا کہنا ہے کہ وہ اس ویب سائٹ کو استعمال کرنے والوں کے تجربات کو عاجزی اور قدر کی نگاہ سے دیکھتے ہیں۔

رپورٹ: ندیم گِل

ادارت: عابد حسین