شہزادی ڈیانا کی بیسویں برسی

بیس برس قبل ڈیانا ایک کار حادثے میں ہلاک ہو گئی تھیں اور دنیا بھر میں اپنے مداحوں کو سوگوار کر گئی تھیں۔ گزشتہ شب شہزادی ڈیانا کے بیٹے ہیری اور ویلیم نے کینسنگٹن پیلس میں اپنی مرحوم والدہ کو خراج عقیدت پیش کیا۔ ولیم، ہیری اور شہزادہ ولیم کی اہلیہ کیٹ نے اس موقع پر سین ہارکن سے ملاقات کی جو محل کے باہر عارضی باغیچے کی ڈیزائنر ہیں۔ ڈیانا کینسنگٹن پیلس میں اپنے بیٹوں اور سابق شوہر پرنس چارلس کے ہمراہ رہتی تھیں۔

ڈیانا کے بچوں نے گراہم ڈیلمور سے بھی ملاقات کی۔ گراہم ڈیلمور لیڈی ڈیانا کی رہائش گاہ کے باغبان تھے اور انہوں نے اس دوران ڈیانا سے دوستی کر لی تھی۔ اس تقریب میں کئی ايسی سماجی تنظیموں کی نمائندوں نے بھی شرکت کی جنہیں لیڈی ڈیانا کی معاونت حاصل تھی۔ کینسنگٹن پیلس کی جانب سے جاری کردہ بیان میں کہا گیا ہے،’’ اس تقریب کے ذریعے ولیم اور ہیری نے عوامی طور پر اپنی والدہ اور ان کی خدمات کو خراج عقیدت پیش کیا ہے۔‘‘

 

لیڈی ڈیانا سپنسر کو ’’کوئین آف ہارٹس‘‘ بھی کہا جاتا ہے۔ وہ صرف 36 برس کی تھيں جب وہ اور ان کے بوائے فرینڈ ڈوڈی ال فید فرانسيسی دارالحکومت پيرس ميں ایک کار حادثے میں 31 اگست 1997 کو ہلاک ہو گئے تھے۔ بیسویں برسی سے قبل 35 سالہ شہزادہ ولیم اور 32 سالہ شہزادہ ہیری نے کئی نشریاتی اداروں کو انٹرویوز میں بتایا کہ کیسے ان کی والدہ کی موت نے ان کی زندگی کو متاثر کیا تھا۔