’شرعی پولیس‘ قبول نہیں، جرمن حکام

چھوٹے چھوٹے گروپوں کی شکل میں راتوں کو گشت پر نکلنے والے یہ انتہا پسند سلفی مسلمان بظاہر اپنے ہم مذہب نوجوانوں کو شراب، موسیقی، فحاشی اور منشیات وغیرہ سے بچانا چاہتے ہیں اور اس مقصد کے لیے اُنہوں نے انٹرنیٹ پر ایک پراپیگنڈہ ویڈیو بھی جاری کر رکھی ہے۔ تاہم پولیس کا کہنا ہے کہ یہ لوگ مقامی آبادی کو عدم تحفظ اور بے یقینی کے احساس سے دوچار کرتے ہیں اور مسلمان نوجوانوں پر اثر انداز ہوتے ہوئے اُنہیں اپنے تنظیمی ڈھانچے کا حصہ بنانے کی کوشش کرتے ہیں۔

جرمنی کی مشہور ترین سلفی شخصیات میں سے ایک سوَین لاؤ کے خیال میں نظم و ضبط کا پابند بنانے والے اس طرح کے اہلکار کوئی ناجائز کام نہیں کر رہے۔ جرمن ٹیلی وژن سے باتیں کرتے ہوئے اُس نے کہا:’’جب کار میں بیلٹ وغیرہ نہ لگانے پر کسی شخص کو جرمانے کی پرچی ملتی ہے تو وہ آگے سے یہ تھوڑی کہتا ہے کہ تم نے ہمیں کیوں چَیک کیا ہے؟ وہ آگے سے چُپ چاپ اِسے قبول کر لیتا ہے۔‘‘

تاہم وُوپرٹال کی پولیس کی خاتون سربراہ بریگیٹا راڈے ماخر کا نقطہء نظر مختلف ہے۔ وہ کہتی ہیں:’’میرے خیال میں یہ ہمارے آئینی نظام، ہمارے ریاستی ڈھانچے، خود مجھ پر اور میرے پولیس کے محکمے پر بھی ایک حملے کے مترداف ہے۔‘‘

وُوپرٹال کی رہائشی ایک خاتون نے اپنے تاثرات کا اظہار کرتے ہوئے کہا:’’میرے خیال میں ہر شخص کا اپنا عقیدہ ہوتا ہے۔ یہودیت، مسیحیت، بودھ مت اور اسلام میں بھی، ہر شخص کو اپنے عقیدے کے مطابق زندگی بسر کرنی چاہیے، کسی اور کو اُس میں مداخلت کی اجازت نہیں ہونی چاہیے۔‘‘

جرمن حکومت نے اس نام نہاد ’شرعی پولیس‘ کے خلاف سخت کارروائی کا فیصلہ کیا ہے۔ وزیر داخلہ تھامس ڈے میزیئر نے کہا کہ ’جرمن سرزمین پر شریعت کو برداشت نہیں کیا جائے گا اور کسی بھی شخص کو جرمن پولیس کی نیک نامی کو ناجائز طور پر استعمال کرنے کی اجازت نہیں دی جائےگی‘۔

پولیس نے اُنیس سے لے کر تینتیس سال تک کے گیارہ مردوں کے خلاف اجتماع سے متعلق قوانین کی خلاف ورزی کے الزام میں تحقیقات شروع کر دی ہیں البتہ ابھی تک کسی کو گرفتار نہیں کیا گیا ہے۔

جرمنی کی مختلف سیاسی جماعتوں کے رہنماؤں نے حکومتی اقدامات کی تائید و حمایت کی ہے اور کہا ہے کہ کسی متوازی نظام عدل کی کوئی گنجائش نہیں ہونی چاہیے۔

اسی دوران جرمنی میں مسلمانوں کی مرکزی کونسل نے بھی وُوپرٹال میں ایک متبادل ’شرعی پولیس‘ کی تشکیل کی مذمت کی ہے۔ کونسل کے چیئرمین ایمن مزائیک نے کہا کہ ’یہ لوگ ناجائز طور پر اسلام کے نام کو اپنے مقاصد کے لیے استعمال کر رہے ہیں اور اپنے مضحکہ خیز اور مکمل طور پر بے معنی اقدامات سے پوری مسلمان کمیونٹی کو نقصان پہنچا رہے ہیں‘۔