سکرٹ کے نیچے نو کلوگرام چاکلیٹ، دو خواتین گرفتار

جرمنی کے شہر براؤن شوائیگ سے جمعرات چھبیس اپریل کو ملنے والی نیوز ایجنسی ڈی پی اے کی رپورٹوں کے مطابق اس خاتون کو، جس کی عمر 35 سال بتائی گئی ہے، سپر مارکیٹ کے عملے کے ایک رکن نے اس وقت رنگے ہاتھوں پکڑ لیا، جب وہ چاکلیٹ کے پیکٹ اپنی سکرٹ کے نیچے چھپا رہی تھی۔

رومانیہ: ٹرک پر چاکلیٹ نہیں مہاجرین لدے ہوئے تھے

چلی میں بچوں کے ’سرپرائز ایگز’ پر پابندی

حلوائی کے بھائی کا انتقام: لڈوؤں میں زہر، درجنوں افراد ہلاک

بعد ازاں جب سپر مارکیٹ کے عملے کی ایک خاتون رکن نے اس عورت کی ایک کمرے میں لے جا کر جامہ تلاشی لی، تو اس کی سکرٹ کے نیچے سے، جس کی مختلف جیبوں والی تہیں تھیں، مجموعی طور پر قریب نو کلوگرام رنگ برنگی چاکلیٹیں برآمد ہوئیں۔

اس پر سپر مارکیٹ کے ڈیوٹی مینیجر نے پولیس کو اطلاع کر دی، جو فوراﹰ موقع پر پہنچ گئی۔ ملزمہ نے پولیس کو بتایا کہ اس کی ایک ساتھی قریب ہی اپنی گاڑی میں اس کی واپسی کا انتظار کر رہی تھی۔ پھر جب ملزمہ کے ساتھ پولیس اس کی دوست تک پہنچی اور تلاشی لی گئی، تو اس گاڑی سے مزید 50 کلوگرام چاکلیٹیں برآمد ہوئیں۔

پولیس نے مجموعی طور پر ان دونوں خواتین کے قبضے سے جو قریب ڈیڑھ من چاکلیٹ برآمد کی، وہ طرح طرح کے برانڈز اور ذائقوں والی تھی۔

اس میں سینکڑوں کی تعداد میں چاکلیٹ بارز کے ایسے پیکٹ بھی تھے، جن کا فی کس وزن عام طور پر 100 گرام یا 200 گرام ہوتا ہے۔ چوری شدہ لیکن برآمد کر لی گئی اس تقریباﹰ 60 کلوگرام چاکلیٹ کی مالیت کا اندازہ ایک ہزار یورو سے زائد لگایا گیا ہے۔

براؤن شوائیگ پولیس کی ایک خاتون ترجمان نے اس بارے میں جمعرات کے روز بتایا، ’’ملزمہ نے جو سکرٹ پہن رکھی تھی، اس کی کئی جیبیں اور تہیں تھیں۔ اسی لیے وہ اس سکرٹ کے نیچے نو کلوگرام چاکلیٹ چھپانے میں کامیاب رہی تھی۔‘‘

دونوں خواتین کے خلاف شاپ لفٹنگ (کسی دکان سے چوری) کے الزام میں مقدمہ درج کر لیا گیا ہے۔ یہ بات ابھی واضح نہیں کہ ان دونوں عورتوں کے اس جرم کی وجہ ان کا بہت زیادہ چاکلیٹ کھانے کا شوق بنا یا پھر وہ اتنی زیادہ چوری شدہ چاکلیٹ آگے کسی اور کو بیچنا چاہتی تھیں۔

م م / ش ح / ڈی پی اے