سویڈن کی اسانج سے لندن میں پوچھ گچھ کی پیشکش

جمعے کے روز سویڈش دفتر استغاثہ نے کہا کہ پانچ برس قبل سامنے آنے والے ان الزامات کے بعد جولیان اسانج نے ابتدا میں برطانیہ سے سویڈن جانے سے انکار کر دیا تھا اور برطانیہ میں سیاسی پناہ کی درخواست دے دی تھی، جب کہ برطانیہ کی جانب سے سیاسی پناہ کی درخواست مسترد ہونے کے بعد انہوں نے لندن ہی میں ایکواڈور کے سفارت خانے میں پناہ لے لی تھی۔

جنسی حملوں کے یہ مقدمات سویڈن میں قائم ہیں اور وہاں کے پراسیکیوٹرز نے اس سلسلے میں اسانج سے پوچھ گچھ لندن میں کرنے سے انکار کیا تھا، تاہم اب ان کی جانب سے پیشکش کی گئی ہے کہ وہ اسانج سے پوچھ گچھ کے لیے لندن جانے پر آمادہ ہیں۔ اعلیٰ وکیل استغاثہ ماریانے نی نے وضاحت کی ہے کہ پوزیشن میں اس تبدیلی کی وجہ یہ ہے کہ اسانج پر عائد کیے جانے والے متعدد الزامات رواں برس اگست میں اپنی حدِ اختتام کو چھونے والے ہیں اور اس سے قبل اس سلسلے میں پیش رفت کی کوشش کی جائے گی۔

انہوں نے کہا، ’’میرا ہمیشہ سے یہ خیال رہا ہے کہ ایکواڈور کے سفارت خانے میں اسانج سے انٹرویو اس کے معیار میں کمی کا باعث ہو گا اور انہیں (اسانج) کو مستقبل میں بھی ہر مقدمے کا سامنا کرنے کے لیے سویڈن ہی آنا ہو گا۔‘‘

نی نے مزید کہا، ’اب وقت بہت اہم ہے۔ میں نے اس پر غور کیا ہے اور بالآخر اس نتیجے پر پہنچی ہوں کہ تفتیش کے معیار میں اس کمی کو قبول کیا جائے۔ کیوں کہ یہ انٹرویو کیس کو آگے بڑھنے سے روکے ہوئے ہے۔‘‘

انہوں نے بتایا کہ جمعے کے روز اسانج کی قانونی ٹیم سے درخواست کر دی گئی ہے اور اسانج کے ڈی این اے کا نمونہ بھی حاصل کیا جائے گا۔

اسانج کے ایک وکیل دفاع ساموئلسن نے سویڈش استغاثہ کے اس فیصلے کا خیرمقدم کرتے ہوئے کہا ہے کہ ان کے مؤکل تفصیلات دیکھنے کے بعد یقیناﹰ یہ پیش کش قبول کر لیں گے۔ ان کا یہ بھی کہنا تھا کہ جمعے کی صبح اس سلسلے میں انہوں نے اسانج سے بات بھی کی۔

ان کا مزید کہنا تھا، ’’اسی بات کا مطالبہ ہم پچھلے چار برس سے کرتے آئے ہیں۔ جولیان اسانج چاہتے ہیں کہ وہ انٹرویو دیں اور بات واضح ہو۔ ظاہر ہے کہ ہم اس پیش کش کا خیرمقدم کرتے ہیں۔‘‘