سوشل ڈیموکریٹک پارٹی کی نئی قیادت

جرمنی کی بڑی سیاسی جماعت سوشل ڈیموکریٹک پارٹی نے گزشتہ ماہ کے پارلیمانی انتخابات میں ناکامی کے بعد اپنی انتظامی تبدیلیوں کا عمل جاری رکھا ہوا ہے۔ پارٹی نے وزیر ماحولیات زیگمار گبریل اپنا نیا سربراہ منتخب کر لیا ہے۔ نئے سربراہ کا انتخاب پارٹی کی مرکزی ایگزیکٹو کمیٹی کے 45 اراکان نے کیا۔

بعض تجزیہ نگاروں کا خیال ہے کہ پارٹی سربراہ کے انتخاب کے حوالے سے سوشل ڈیوکریٹس کے درمیان اختلافات پائے جاتے ہیں، جس کی وجہ سے نئے لیڈر کا انتخاب بند دروازوں کے پیچھے یا خفیہ رائے شماری کے ذریعےے کیا گیا۔ اِس سلسلے میں پارٹی کی آئندہ ماہ ہونے والی قومی کانفرنس میں یہ نامزدگی پیش کی جائے گی ۔ ڈریسڈن شہر میں قومی کانفرنس کے دوران نئی حکمت عملی بھی مرتب کی جائے گی۔

سوشل ڈیموکریٹک پارٹی کے موجودہ چیرمین فرانس میونٹرفیرنگ پہلے ہی اپنے عہدے سے علیحدگی کا اعلان کر چکے ہیں۔ برلن شہر کے میئر کلاؤز ویویرائٹ پارٹی میں نائب صدر کا عہدہ حاصل کرنے میں کامیاب نہیں ہو سکے ہیں۔ خاتون لیڈر آندریا ناہلیز کو پارٹی کی جنرل سیکریٹری نامزد کیا گیا ہے۔

زیگمار گبریل کو بطور مقرر پسند کیا جاتا ہے۔ وہ کچھ عرصہ تک جرمن صوبے زیریں سیکسنی کے وزیر اعلیٰ بھی رہ چکے ہیں۔ وہ چانسلر میرکل کے ساتھ گرینڈ مخلوط حکومت میں بائیس دسمبر سن 2005 سے ماحولیات کے شعبے کے وزیر ہیں۔

زیگمار گبریل بارہ ستمبر سن 1959ء کو لوئر سیکسنی کے تاریخی شہر گوزلار میں پیدا ہوئے۔ زیگمار گبرییل نے اپنے دورِ وزرات میں توانائی کے متبادل کے استعمال کو فروغ دینے کی کامیاب کوشش کی ہے۔

نامزد سیکریٹری جنرل ماریا آندریا ناہلس بیس جون سن 1970 میں رائن لینڈ پلاٹی نیٹ صوبے کے شہر مینڈنگ میں پیدا ہوئیں تھیں۔ وہ فکری طور پر خود کو بائیں بازو سے نتھی کرتی ہیں۔ ناہلس نوجوان سوشل ڈیموکریٹس سیاستدانوں کی سرخیل سمجھی جاتی ہیں۔