سن 2016 کے لیے کرہٴ ارض کا بہترین فٹ بالر: کرسٹیانو رونالڈو

کرسٹیانو رونالڈو کو’بیلن ڈے اور‘ ایوارڈ کے حصول میں ارجنٹائن کے لیونل میسی اور فرانسیسی فٹ بالر انٹوائن گریسمَن کا سامنا تھا۔ لیونل میسی کو گزشتہ برس اِس ایوارڈ کا حقدار ٹھہرایا گیا تھا۔ رواں برس توقع کی جا رہی تھی کہ یہ انعام ایک مرتبہ پھر ارجنٹائن کے فٹ بالر ہی جیت جائیں گے لیکن ایسا ممکن نہیں ہو سکا۔

جریدے ’فٹ بال فرانس‘ کے اِس ایوارڈ کے لیے کسی کھلاڑی کا انتخاب دنیا کے تقریباً دو سو صحافیوں کی ووٹنگ سے کیا جاتا ہے۔ اس سے قبل کرسٹیانو رونالڈو تین مرتبہ یہ ایوارڈ جیت چکے ہیں۔ اُن سے زیادہ یہ ایوارڈ لیونل میسی نے جیتا رکھا ہے۔ اُنہیں پانچ مرتبہ فٹ بال کھیلنی والی اقوام کا بہترین کھلاڑی قرار دیا گیا۔

اس ایوارڈ کے حوالے سے ریال میڈرڈ کے کوچ زینادین زیدان نے کہا کہ انہیں پہلے سے یقین تھا کہ یہ ایوارڈ رواں برس رونالڈو کو ہی ملے گا کیونکہ اُس کی کارکردگی بلاشبہ بقیہ تمام کھلاڑیوں سے کہیں زیادہ بہتر رہی تھی۔ زیدان کے مطابق انہیں امید ہے کہ وہ اگلے برسوں میں بھی ایسی کارکردگی کا مظاہرہ کرتے رہیں گے۔ رونالڈو چیمپئنز لیگ میں مشہور یورپی کلب ریال میڈرڈ کی نمائندگی کرتے ہیں۔

اس ایوارڈ کے ساتھ ساتھ رونالڈو کو ٹیکس چھپانے کے الزامات کا بھی سامنا ہے۔ گزشتہ جمعرات کو پرتگالی کھلاڑی نے پچھلے سال 240 ملین ڈالر کمانے کی تمام تفصیل عام کرتے ہوئے کہا کہ وہ کسی مالی بےضابطگی کے مرتکب نہیں ہوئے ہیں۔ رونالڈو نے یہ بھی کہا کہ انہوں نے کچھ بھی غلط نہیں کیا اور اس باعث وہ کسی تفتیش سے قطعاً خوفزدہ نہیں ہیں۔

’بالون ڈور‘ نامی ایوارڈ فرانسیسی جریدے ’فٹ بال فرانس‘ نے سن 1956 متعارف کرایا تھا۔ پہلے یہ یورپ کے بہترین فٹ بالر کو دیا جاتا تھا۔ سن 1991 سے اس ایوارڈ کی سرپرستی فٹ بال کے عالمی ادارے فیفا نے شروع کی تھی۔ سن 2010 سے فیفا اور ’فٹ بال فرانس‘ نے دنیا کے بہتر کھلاڑی کے دو مختلف ایوارڈ کو ضم کر دیا تھا۔ رواں برس سے فیفا نے اپنا سالانہ ایوارڈ ایک مرتبہ پھر متعارف کرا دیا ہے۔ سب سے پہلا ’بالون ڈور‘ کا ایوارڈ سن 1956 میں اسیٹلے میتھیوز کو دیا گیا تھا۔