سری دیوی باتھ ٹب میں میں ڈوب کر ہلاک ہوئیں، دبئی پولیس
26 فروری 2018
پیر26 فروری کو دبئی پولیس نے مقبول بالی ووڈ اداکارہ سری دیوی کے انتقال کر جانے کی وجہ باتھ ٹب میں ڈوبنے سے بتائی ہے۔ پولیس کے مطابق وہ ہوٹل میں اپنے کمرے کے باتھ ٹب میں کسی وجہ سے حواس کھو کر گریں اور ٹب میں بھرے پانے میں ڈوب گئیں۔
دبئی پولیس نے یہ بیان پوسٹ مارٹم مکمل ہونے کے بعد مرتب کی جانے والی ابتدائی رپورٹ کی بنیاد پر جاری کیا ہے۔ بعض پولیس ذرائع کے مطابق رپورٹ سے ظاہر ہوا ہے کہ سری دیوی شراب کے زیر اثر بھی تھیں۔
معروف بھارتی اداکارہ سری دیوی انتقال کر گئیں
’ٹوائلٹ‘ کے بعد ’مردانہ کمزوری‘، بالی ووڈ کے نئے موضوعات
کرن جوہر شادی اور بیوی کے بغیر باپ بن گئے
دبئی پولیس نے سری دیوی کی موت کا معاملہ دفتر استغاثہ کو منتقل کرنے کا بھی بتایا ہے۔ اندازوں کے مطابق مزید تفتیش اب یہی دفتر استغاثہ کرے گا کہ ہوٹل کے باتھ ٹب میں اُن کی ہلاکت کیوں کر ہوئی۔ خلیجی ریاست دبئی کی پولیس نے یہ بھی نہیں بتایا کہ آیا سری دیوی کی نعش اُن کے ورثا کے حوالے کر دی گئی ہے۔
پہلے یہ تاثر دیا گیا تھا کہ فرانزک محکمے کی جانب سے پوسٹ مارٹم مکمل ہونے کے بعد نعش اُن کے اہلِ خانہ کو دے دی جائے گی۔ اُن کی نعش کو ایک چارٹرڈ پرواز کے ذریعے پیر کی رات تک بھارت لے کر جانے کو پلان کیا گیا ہے۔ خاندانی ذرائع کے مطابق سری دیوی کی آخری رسومات منگل کے روز تک ہو سکتی ہیں۔
پولیس کی جانب سے یہ بھی کہا گیا ہے کہ باتھ ٹب میں سری دیوی کا اپنے حواس کھو کر گرنا ایک حادثاتی امر ہے۔ سری دیوی چوبیس فروری کو انتقال کر گئی تھیں۔ ابھی تک یہ بھی نہیں واضح کہ سری دیوی کی آخری رسومات اُن کے آبائی شہر مدراس یا پھر اُؑن کی سکونت کے موجودہ شہر ممبئی میں ادا کی جائیں گی۔
بھارت کی مختلف زبانوں میں بننے والی تین سو سے زائد فلموں میں اداکاری کرنے والی سری دیوی کو رائے عامہ کے ایک جائزے میں گزشتہ ایک سو برس کی سب سے معروف اور پسندیدہ اداکارہ قرار دیا گیا تھا۔ اُن کا اصل نام شری امّا یانگر ایاپن تھا۔ انہوں نے سن 1996 میں ممتاز فلم ساز آچل ’بونی‘ کپور سے شادی کر لی تھی۔ اُنہوں نے پسماندگان میں دو بیٹیاں جھانوی اور خوشی چھوڑی ہیں۔