زمبابوے: صدر کی ریلی میں دھماکا

خبر رساں ادارے اے ایف پی نے میڈیا رپورٹوں کے حوالے سے بتایا ہے کہ ہفتے کے دن صدر ایمرسن منانگاگوا کے ایک ریلی میں دھماکا ہوا، جس کے نتیجے میں متعدد افراد زخمی ہو گئے ہیں۔ ہفتے کے دن زمبابوے کے دوسرے سب سے بڑے شہر بولا وایو میں منعقدہ ریلی میں ہزاروں افراد شریک تھے۔

زمبابوے کے سرکاری ٹیلی وژن پر نشر کیے گئے مناظر میں دیکھا جا سکتا ہے کہ دھماکے کے بعد ایک کھلبلی مچ گئی اور امدادی کارکن لوگوں کو ابتدائی طبی امداد دینے میں کس طرح مصروف ہیں۔ صدر ایمرسن تیس جولائی کے الیکشن کی مہم کے دوران  بولا وایو کے وائٹ سٹی اسٹیڈیم میں منعقدہ اس ریلی میں شریک ہوئے تھے۔

صدارتی ترجمان جارج چارامبا نے بتایا ہے کہ اس واقعے میں ایمرسن محفوظ رہے، ’’صدر کو فوری طور پر محفوظ مقام پر منتقل کر دیا گیا۔ وہ اس وقت بولا وایو کے اسٹیٹ ہاؤس میں ہیں۔‘‘

ان کا کہنا تھا کہ مشتبہ طور پر یہ ایک دھماکا تھا، جو یقینی طور پر وی وی آئی پی لاونج کے انتہائی قریب ہوا۔ میڈیا رپورٹوں کے مطابق ابھی تک دھماکے کی نوعیت کا علم نہیں ہو سکا ہے۔

زمبابوے کے میڈیا کے مطابق اس دھماکے کی وجہ سے حکمران پارٹی زانو پی ایف کے کچھ سنیئر ارکان بھی زخمی ہوئے ہیں۔ یہ بھی کہا جا رہا ہے کہ یہ دراصل ایک حملہ تھا، جس میں صدر کو قتل کرنے کی کوشش کی گئی۔

75 سالہ صدر ایمرسن نے رابرٹ مگابے کے طویل اقتدار کے خاتمے کے بعد گزشتہ برس نومبر میں ہی یہ عہدہ سنھالا تھا۔ مگابے 37 سال اقتدار میں رہے تھے۔

مگابے کی حکومت ختم ہونے کے بعد زمبابوے میں پہلی مرتبہ الیکشن کا انعقاد کیا جا رہا ہے۔ اس انتخابی عمل کو صدر ایمرسن کے لیے انہائی اہم قرار دیا جا رہا ہے۔

ایمرسن بین الاقوامی سطح پر زمبابوے کی ساکھ بہتر بنانے کی کوشش میں ہیں۔ انہوں نے وعدہ کیا ہے کہ تیس جولائی کے انتخابات شفاف اور غیرجانبدار طریقے سے منعقد کرائے جائیں گے۔

ع ب / ع ت / خبر رساں ادارے